ਸਿੱਖਿਆ ਵਿਭਾਗ ਵਲੋਂ ਲਾਂਚ ਕੀਤੀ ਗਈ ਪੰਜਾਬ ਐਜੂਕੇਅਰ ਐਪ ਵਿਦਿਆਰਥੀਆਂ ਲਈ ਵਰਦਾਨ

ਨਰਸਰੀ ਤੋਂ 12ਵੀਂ ਜਮਾਤ ਤੱਕ ਦੀ ਸੰਪੂਰਣ ਸਿੱਖਿਆ ਸਮਗਰੀ ਇਸ ਵਿੱਚ ਮੌਜੂਦ – ਸਿੱਖਿਆ ਅਧਿਕਾਰੀ

ਪਠਾਨਕੋਟ, 31 ਜੁਲਾਈ (ਪੰਜਾਬ ਪੋਸਟ ਬਿਊਰੋ) – ਕੋਰੋਨਾ ਕਾਲ ਨੂੰ ਇੱਕ ਚੁਣੋਤੀ ਦੇ ਰੂਪ ਵਿਚ ਸਵੀਕਾਰ ਕਰਦੇ ਹੋਏ ਪੰਜਾਬ ਸਿੱਖਿਆ ਵਿਭਾਗ ਵਲੋਂ ਪੰਜਾਬ ਐਜੁਕੇਅਰ ਐਪ ਲਾਂਚ ਕੀਤੀ ਗਈ ਹੈ।ਨਰਸਰੀ ਤੋਂ ਲੈ ਕੇ 12ਵੀਂ ਤੱਕ ਦੇ ਹਰ ਇੱਕ ਵਿਦਿਆਰਥੀ ਅਤੇ ਅਧਿਆਪਕ ਲਈ ਪੰਜਾਬੀ ਅਤੇ ਅੰਗਰੇਜ਼ੀ ਦੋਵਾਂ ਮਾਧਿਅਮ ਵਿੱਚ ਸਿੱਖਣ ਸਮਗਰੀ ਪ੍ਰਦਾਨ ਕਰ ਰਹੀ ਇਹ ਐਪ ਵਿਦਿਆਰਥੀਆਂ ਲਈ ਵਰਦਾਨ ਸਾਬਤ ਹੋ ਰਹੀ ਹੈ ।
                ਜਿਲ੍ਹਾ ਸਿੱਖਿਆ ਅਫਸਰ ਸੈਕੰਡਰੀ ਸਿੱਖਿਆ ਜਗਜੀਤ ਸਿੰਘ ਅਤੇ ਜਿਲ੍ਹਾ ਸਿੱਖਿਆ ਅਫਸਰ ਐਲੀਮੈਂਟਰੀ ਸਿੱਖਿਆ ਇੰਜੀ. ਸੰਜੀਵ ਗੌਤਮ ਨੇ ਦੱਸਿਆ ਕਿ ਇਹ ਐਪ ਸਿੱਖਿਆ ਸਕੱਤਰ ਕ੍ਰਿਸ਼ਨ ਕੁਮਾਰ ਦੀ ਅਗਵਾਈ ਵਿੱਚ ਡਿਪਟੀ ਡਾਇਰੇਕਟਰ ਸ਼ੈਲੇਂਦਰ ਸਿੰਘ ਸਹੋਤਾ ਦੀ ਯੋਜਨਾ ਅਤੇ ਤਿੰਨਾਂ ਮਜ਼ਮੂਨਾਂ ਦੇ ਸਹਾਇਕ ਸਟੇਟ ਪ੍ਰੋਜੈਕਟ ਡਾਇਰੈਕਟਰ ਹਰਪ੍ਰੀਤ ਸਿੰਘ, ਨਿਰਮਲ ਕੌਰ ਅਤੇ ਸੁਸ਼ੀਲ ਭਾਰਦਵਾਜ ਦੇ ਨਿਰਦੇਸ਼ਾਂ ‘ਤੇ ਡੀ.ਐਮ ਦੀ ਟੀਮ ਵਲੋਂ ਤਿਆਰ ਕੀਤੀ ਗਈ ਹੈ।ਇਹ ਐਪ ਇੱਕ ਅਜਿਹਾ ਕਾਮਨ ਸਟੇਸ਼ਨ ਹੈ, ਜਿਥੇ ਅਧਿਆਪਕ ਅਤੇ ਵਿਦਿਆਰਥੀ ਆਪਣੇ ਵਲੋਂ ਸਬੰਧਤ ਕਿਸੇ ਵੀ ਪ੍ਰਕਾਰ ਦੀ ਸਿੱਖਣ ਸਮੱਗਰੀ ਨੂੰ ਕੇਵਲ ਵੇਖ ਹੀ ਨਹੀਂ, ਸਗੋਂ ਡਾਉਨਲੋਡ ਵੀ ਕਰ ਸਕਦੇ ਹਨ ।
              ਉਪ ਜਿਲ੍ਹਾ ਸਿੱਖਿਆ ਅਫਸਰ ਸੈਕੰਡਰੀ ਸਿੱਖਿਆ ਰਾਜੇਸਵਰ ਸਲਾਰੀਆ ਅਤੇ ਉਪ ਜਿਲ੍ਹਾ ਸਿੱਖਿਆ ਅਫਸਰ ਐਲੀਮੈਂਟਰੀ ਸਿੱਖਿਆ ਰਮੇਸ਼ ਲਾਲ ਠਾਕੁਰ ਨੇ ਦੱਸਿਆ ਕਿ ਇਸ ਐਪ ‘ਤੇ ਸਾਰੇ ਮਜਮੂਨਾਂ ਦੀਆਂ ਤਿੰਨਾਂ ਮਾਧਿਅਮ ਵਿੱਚ ਈ-ਬੁੱਕ ਉਪਲੱਬਧ ਹਨ।ਇਸ ਦੇ ਇਲਾਵਾ ਵਿਭਾਗ ਦੁਆਰਾ ਰੋਜ਼ਾਨਾ ਭੇਜੀ ਜਾ ਰਹੀ ਅੰਗਰੇਜ਼ੀ ਵਿਸ਼ੇ ਦੀ ਡੇਲੀ ਡੋਜ਼, ਵਿਗਿਆਨ ਅਤੇ ਹਿਸਾਬ ਦੀਆਂ ਗਤੀਵਿਧੀਆਂ, ਅੰਗਰੇਜ਼ੀ ਅਤੇ ਪੰਜਾਬੀ ਵਲੋਂ ਸਬੰਧਿਤ ਅਜੋਕਾ ਸ਼ਬਦ, ਉਡਾਨ ਸ਼ੀਟ ਆਦਿ ਤਾਰੀਕ ਅਨੁਸਾਰ ਇਸ ‘ਤੇ ਸਹਿਜ ਹੀ ਮਿਲਦੀਆਂ ਹਨ।ਉਨ੍ਹਾਂ ਨੇ ਦੱਸਿਆ ਕਿ ਇਹ ਐਪ ਗੂਗਲ ਪਲੇ ਸਟੋਰ ‘ਤੇ ਮੁਫਤ ਉਪਲੱਬਧ ਹੈ।ਆਨਲਾਈਨ ਸਿੱਖਿਆ ਦੇ ਵੱਲ ਵਿਭਾਗ ਦਾ ਇਹ ਇੱਕ ਬਹੁਤ ਹੀ ਚੰਗਾ ਕਦਮ ਹੈ, ਜਿਸਦਾ ਵਿਦਿਆਰਥੀ ਘਰ ਬੈਠੇ ਫਾਇਦਾ ਉਠਾ ਰਹੇ ਹਨ।
                    ਇਸ ਮੌਕੇ ਜਿਲ੍ਹਾ ਕੋਆਡਿਨੇਟਰ ਐਮ.ਆਈ.ਐਸ ਮੁਨੀਸ਼ ਗੁਪਤਾ, ਜਿਲਾ ਕੋਆਡਿਨੇਟਰ ਮੀਡੀਆ ਬਲਕਾਰ ਅੱਤਰੀ ਆਦਿ ਮੌਜ਼ੂਦ ਸਨ।