ਨਾਟਸ਼ਾਲਾ ਵਿਖੇ ਮਿਰਚ-ਮਸਾਲਾ ਨਾਟਕ ਦੇ 253ਵੇਂ ਸ਼ੋਅ `ਚ ਹਾਉਸ ਫੁੱਲ ਰਿਹਾ

ਅੰਮ੍ਰਿਤਸਰ, 3 ਜੂਨ (ਪੰਜਾਬ ਪੋਸਟ- ਜਗਦੀਪ ਸਿੰਘ ਸੱਗੂ) – ਪੰਜਾਬ ਨਾਟਸ਼ਾਲਾ ਵਿਖੇ ਚੱਲ ਰਹੇ ਜਤੀਂਦਰ ਬਰਾੜ ਲਿਖਿਤ ਪੰਜਾਬੀ ਨਾਟਕ ਮਿਰਚ-ਮਸਾਲਾ ਨੇ 250 ਤੋਂ ਜਿਆਦਾ ਹਾਉਸ ਫੁਲ ਸ਼ੋਅ ਕਰਕੇ ਨਵਾਂ ਇਤਹਾਸ ਰਚਿਆ ਹੈ।ਇਸ ਦੇ 253ਵੇਂ ਸ਼ੋਅ ਦੌਰਾਨ ਸੀਟਾਂ ਫੁਲ ਹੋ ਚੁੱਕੀਆਂ ਸਨ।ਇਸ ਬਾਰੇ ਜਦੋਂ ਦਰਸ਼ਕਾਂ ਨਾਲ ਗੱਲ ਕੀਤੀ ਗਈ ਤਾਂ ਉਨ੍ਹਾਂ ਨੇ ਮੰਨਿਆ ਕਿ ਇਹ ਨਾਟਕ ਗੁਣਵਤਾ, ਅਤਿਆਧੁਨਿਕ ਤਕਨੀਕ ਅਤੇ ਸਾਫ਼-ਸੁਥਰਾ ਵਿਸ਼ਾ ਹੋਣ ਦੇ ਕਾਰਨ ਲੋਕਾਂ ਨੂੰ ਆਕਰਸ਼ਿਤ ਕਰਦਾ ਹੈ ।
ਨਾਟਕ ਦੀ ਕਹਾਣੀ ਉਨ੍ਹਾਂ ਤਿੰਨ ਭਰਾਵਾਂ ਬਾਰੇ ਹੈ, ਜੋ ਕੁੰਵਾਰੇ ਹਨ ਅਤੇ ਸਮਾਜ ਵਿੱਚ ਅਜਿਹੇ ਲੋਕਾਂ ਦੀ ਹਾਲਤ ਨੂੰ ਨਾਟਕੀ ਰੂਪ ਵਿੱਚ ਦਿਖਾਇਆ ਗਿਆ ਹੈ, ਜਦ ਮੁਹੱਲੇ `ਚ ਰਹਿੰਦੇ ਪਰਿਵਾਰ ਉਨ੍ਹਾਂ ਨੂੰ ਚੰਗਾ ਨਹੀਂ ਸਮਝਦੇ।ਇਹਨਾਂ ਭਰਾਵਾਂ ਦੀ ਸਮੱਸਿਆ ਹੈ ਕਿ ਉਹ ਆਪਣੀ-ਆਪਣੀ ਪਸੰਦ ਦੀਆਂ ਵਹੁੱਟੀਆਂ ਦੇ ਚੱਕਰ ਵਿੱਚ ਕੁੰਵਾਰੇ ਰਹਿ ਜਾਂਦੇ ਹਨ।ਇਸੇ ਘਟਨਾਕ੍ਰਮ ਤੋਂ ਹੀ ਸਟੇਜ਼ `ਤੇ ਕਾਮੇਡੀ ਪੈਦਾ ਹੁੰਦੀ ਹੈ, ਜਿਸ ਦਾ ਦਰਸ਼ਕ ਖੂਬ ਅਨੰਦ ਮਾਣਦੇ ਹਨ।ਇਹ ਸਾਫ਼-ਸੁਥਰੀ ਕਾਮੇਡੀ ਅਤੇ ਸਰਲ ਭਾਸ਼ਾ `ਚ ਸਿੱਧੇ ਸੰਵਾਦ ਦਰਸ਼ਕ ਦੇ ਦਿਲੋ-ਦਿਮਾਗ `ਚ ਉਤਰ ਜਾਂਦੇ ਹਨ ।
ਸਟੇਜ਼ `ਤੇ ਪੇਸ਼ਕਾਰੀ ਦੇ ਦੌਰਾਨ ਰੰਗ ਮੰਚ ਉਤੇ ਨਾਟਕ-ਫਿਲਮ ਅਤੇ ਅਸਲ ਜਿੰਦਗੀ ਤਿੰਨੇ ਹੀ ਇਕੱਠੇ ਚੱਲਦੇ ਹਨ।ਪੰਜਾਬ ਨਾਟਸ਼ਾਲਾ ਦੇ ਮੁੱਖੀ ਜਤਿੰਦਰ ਸਿੰਘ ਬਰਾੜ ਨਾਟਕ ਦੀ ਸਫਲਤਾ ਨੂੰ ਡਾਇਰੈਕਟਰ ਨਰਿੰਦਰ ਸਾਂਘੀ ਅਤੇ ਡਰਾਮੇ ਦੇ ਕਲਾਕਾਰਾਂ ਦੀ ਮਿਹਨਤ ਤੇ ਲਗਨ ਦਾ ਨਤੀਜਾ ਦੱਸਦੇ ਹਨ।ਉਨ੍ਹਾਂ ਦਾ ਕਹਿਣਾ ਹੈ ਕਿ ਮਿਰਚ-ਮਸਾਲਾ ਸਮੇਤ ਨਾਟਸ਼ਾਲਾ ਦੀਆਂ ਹੋਰ ਪੇਸ਼ਕਾਰੀਆਂ ਲੋਕਾਂ ਨੂੰ ਇਸੇ ਤਰ੍ਹਾਂ ਵਲੋਂ ਹਸਾਉਂਦੀਆਂ ਤੇ ਸਮਾਜਿਕ ਤਾਣੇ ਬਾਣੇ ਨੂੰ ਬਿਆਨ ਕਰਦੀਆਂ ਰਹਿਣਗੀਆਂ।