ਮਾਂ ਮਾਰ ਗੇੜਾ

ਚੂਰ ਹੋਏ ਕੱਚ ਵਾਂਗ ,
ਅਸੀਂ ਤੇਰੇ ਤੋਂ ਬਗੈਰ,
ਤੇਰੇ ਬਗੈਰ ਹੋਰ ਸਾਡੀ,
ਕੌਣ ਮੰਗਦਾ ਏ ਖੈਰ,
ਖੈਰ ਕੌਣ ਮੰਗਦਾ ਹੁਣ,
ਪਾਏ ਸਭ ਨੇ ਹੀ ਵੈਰ,
ਵੈਰ ਪਾਏ ਸਭ ਨੇ,
ਸਾਡੇ ਨਾਲ ਪੈਰ ਪੈਰ,
ਪੈਰ ਹੁਣ ਪੁੱਟੇ ਜਾਂਦੇ ਨਾ,
ਰਿਹਾ ਹੰਝੂਆਂ ਚ ਤੈਰ,
ਤੈਰਦਾ ਹਾਂ ਹੰਝੂਆਂ ਚ,
ਸਿਖਰ ਦੁਪਹਿਰ ਸ਼ਾਮ ਸਵੇਰ,
ਸ਼ਾਮ ਸਵੇਰ ਨੀ ਮਾਏ ਮੇਰੀ,
ਦੱਸਾਂ ਤੈਨੂੰ ਦੋ ਪਲ ਠਹਿਰ,
ਦੋ ਪਲ ਠਹਿਰ ਕੋਲ,
ਭੈੜਾ ਵਿਛੋੜੇ ਦਾ ਕਹਿਰ,
ਵਿਛੋੜੇ ਦਾ ਕਹਿਰ ਤੇ,
ਆਪਣੇ ਰਹੇ ਘੋਲ ਜ਼ਹਿਰ,
ਜ਼ਹਿਰ ਘੋਲਦੇ ਮੱਖਣ ਨੂੰ,
ਵਸਾਇਆ ਦੁੱਖਾਂ ਦੇ ਸ਼ਹਿਰ,
ਦੁੱਖਾਂ ਦੇ ਸ਼ਹਿਰ ‘ਚ ਮਾਂ,
ਕਦੇ ਤੂੰ ਗੇੜਾ ਮਾਰ ਫੇਰ,
ਮਾਂ ਕਦੇ ਗੇੜਾ ਮਾਰ ਫੇਰ,

ਮੱਖਣ ਸ਼ੇਰੋਂ ਵਾਲਾ
ਪਿੰਡ ਤੇ ਡਾਕ ਸ਼ੇਰੋਂ, ਜਿਲ੍ਹਾ ਸੰਗਰੂਰ।
ਮੋ – 98787-98726