ਸ੍ਰੀ ਮਦ ਭਾਗਵਤ ਗੀਤਾਸਾਰ ਮਨੁੱਖੀ ਜੀਵਨ ਦਾ ਆਧਾਰ – ਬੀ.ਕੇ ਊਸ਼ਾ ਭੈਣ

ਅੰਮ੍ਰਿਤਸਰ, 15 ਨਵੰਬਰ (ਪੰਜਾਬ ਪੋਸਟ –  ਜਗਦੀਪ ਸਿੰਘ) – ਸ੍ਰੀਮਦ ਭਾਗਵਤ ਗੀਤਾ ਮਾਤਾ ਹੈ, ਜਿਸ ਨੇ ਹਰ ਧਰਮ ਰੂਪੀ ਬੱਚੇ ਨੂੰ ਅੰਮ੍ਰਿਤ ਪਿਆਇਆ ਹੈ।ਕਰਮ ਵਿੱਚ ਕਰੁਣਾਭਾਵ ਨੂੰ ਲਿਆਉਣਾ ਅਤੇ ਸਹੀ ਕਰਮ ਕਰਨਾ ਹੀ ਗੀਤਾ ਗਿਆਨ ਦਾ ਸਾਰ ਹੈ।ਯੋਗ ਰਾਜਯੋਗਿਨੀ ਤੇ ਪ੍ਰਜਾਪਿਤਾ ਬ੍ਰਹਮਾ ਕੁਮਾਰੀ ਰੱਬੀ ਯੂਨੀਵਰਸਿਟੀ ਦੇ ਮੁੱਖ ਕੇਂਦਰ ਮਾਊਂਟ ਆਬੂ (ਰਾਜਸਥਾਨ) ਵਿੱਚ ਸੀਨੀਅਰ ਰਾਜਯੋਗ ਬੁਲਾਰੇ ਬ੍ਰਹਮਾ ਕੁਮਾਰੀ ਉਸ਼ਾ ਭੈਣ ਨੇ ਪ੍ਰਜਾਪਿਤਾ ਬ੍ਰਹਮਾ ਕੁਮਾਰੀ ਨੇ ਰੱਬੀ ਯੂਨੀਵਰਸਿਟੀ ਅੰਮ੍ਰਿਤਸਰ ਵਲੋਂ ਸਥਾਨਕ ਫੋਰ.ਐਸ ਮਾਰਡਨ ਹਾਈ ਸਕੂਲ ਦੇ ਆਰਡੀਟੋਰੀਅਮ ਵਿਖੇ “ਗੀਤਾ ਸਾਰ-ਜੀਵਨ ਦਾ ਆਧਾਰ ਨਾਮਕ ਸੈਮੀਨਾਰ“ ਦੌਰਾਨ ਇਹ ਸ਼ਬਦ ਕਹੇ।

    ਬ੍ਰਹਮਾ ਕੁਮਾਰੀ ਊਸ਼ਾ ਭੈਣ ਨੇ ਕਿਹਾ ਕਿ ਸ੍ਰੀਮਦ ਭਾਗਵਤ ਗੀਤਾ ਮਨੁੱਖ ਦੀ ਮਾਂ ਹੈ।ਜਿਵੇਂ ਮਾਂ ਆਪਣੇ ਹਰ ਬੱਚੇ ਦੀ ਰੱਖਿਆ ਕਰਦੀ ਹੈ, ਇਸੇ ਤਰਾਂ ਸ੍ਰੀਮਦ ਭਾਗਵਤ ਗੀਤਾ ਦਾ ਗਿਆਨ ਮਨੁੱਖ ਨੂੰ ਆਪਣੇ ਸੰਸਕਾਰਾਂ ਤੇ ਆਪਣੀਆਂ ਪੁਰਾਣੀਆਂ ਆਦਤਾਂ `ਤੇ ਜਿੱਤ ਹਾਸਲ ਕਰਨੀ ਸਿਖਾਉਂਦਾ ਹੈ।ਉਨਾਂ ਕਿਹਾ ਕਿ ਹਰ ਧਰਮ ਦੇ ਸ਼ਾਸਤਰ ਦਾ ਕਿਸੇ ਨਾ ਕਿਸੇ ਰੂਪ `ਚ ਗੀਤਾ ਨਾਲ ਸਬੰਧ ਹੈ।ਭਾਗਵਦ ਗੀਤਾ ਵਿੱਚ 6 ਚੈਪਟਰ ਗਿਆਨ ਯੋਗ, 6 ਚੈਪਟਰ ਕਰਮ ਯੋਗ ਅਤੇ 6 ਚੈਪਟਰ ਭਗਤੀ ਯੋਗ ਦੇ ਹਨ।ਅੱਜ ਸੰਸਾਰ ਵਿੱਚ ਹਰ ਮਨੁੱਖ ਦੀ ਹਾਲਤ ਮਹਾਭਾਰਤ ਵਰਗੇ ਮਨੁੱਖ ਦੀ ਹੋ ਗਈ ਹੈ।ਇਸ ਲਈ ਭਗਵਾਨ ਨੇ ਕੇਵਲ ਇੱਕ ਅਰਜੁਨ ਨੂੰ ਹੀ ਗੀਤਾ ਗਿਆਨ ਨਹੀਂ ਸੁਣਾਇਆ।ਪਰ ਰੱਬ ਨੇ ਦੁਨੀਆਂ ਵਿੱਚ ਹਰ ਅਰਜੁਨ ਅਰਥਾਤ ਹਰ ਮਨੁੱਖ ਨੂੰ, ਜਿਸ ਦਾ ਭਗਵਾਨ ਨਾਲ ਪਿਆਰ ਹੈ, ਨੂੰ ਇਸ ਦੁਨੀਆਂ ਵਿੱਚ ਕਿਵੇਂ ਚੱਲਣਾ ਹੈ, ਆਪਣੇ ਸੰਸਕਾਰਾਂ, ਆਪਣੀਆਂ ਪੁਰਾਣੀਆਂ ਆਦਤਾਂ `ਤੇ ਕਿਵੇਂ ਫਤਹਿ ਪ੍ਰਾਪਤ ਕਰਨੀ ਹੈ ਸਿਖਾਉਂਦਾ ਹੈ।ਦੁਰਯੋਧਨ ਅਰਥਾਤ ਜੋ ਅੰਹਕਾਰੀ ਵਿਅਕਤੀ ਹੈ, ਨੂੰ ਭਗਵਾਨ ਕੁੱਝ ਨਹੀਂ ਦੱਸਦਾ ਹੈ।ਲੇਕਿਨ ਭਗਵਾਨ ਦੀ ਜਿਸ ਨਾਲ ਪ੍ਰੀਤ ਹੈ, ਉਨ੍ਹਾਂ ਨੂੰ ਹੀ ਰੱਬ ਸਿਖਾਉਂਦਾ ਹੈ ਅਰਥਾਤ ਇਸ ਕਰਮ ਖੇਤਰ ਰੂਪੀ ਲੜਾਈ ਵਿੱਚ ਜਿੱਤ ਕਿਵੇਂ ਹਾਸਲ ਕਰਨੀ ਹੈ।ਇਸ ਲਈ ਅਜੋਕੇ ਯੁੱਗ ਵਿੱਚ ਸ੍ਰੀਮਦ ਭਾਗਵਤ ਗੀਤਾ ਦਾ ਮਹੱਤਵ ਬਹੁਤ ਵਧ ਗਿਆ ਹੈ।ਪਰ ਉਸ ਸ੍ਰੀਮਦ ਭਾਗਵਤ ਗੀਤਾ ਨੂੰ ਸਮਝਣ ਦੀ ਲੋੜ ਹੈ।ਉਸ਼ਾ ਭੈਣ ਨੇ ਹੋਰ ਕਿਹਾ ਕਿ ਕਰਮ ਵਿੱਚ ਉਤਮ ਭਾਵ ਨੂੰ ਲਿਆਉਣਾ ਹੀ ਗੀਤਾ ਦਾ ਸਾਰ ਹੈ।
ਸੰਮੇਲਨ ਸ਼ੁਰੂ ਹੋਣ ਵਲੋਂ ਪਹਿਲਾਂ ਮੇਅਰ ਕਰਮਜੀਤ ਸਿੰਘ ਰਿੰਟੂ, ਡਾ. ਜਸਜੀਤ ਸ਼ਾਸ਼ੀ, ਓਹਰੀ ਹਸਪਤਾਲ ਵਲੋਂ ਡਾ. ਰੀਨਾ ਓਹਰੀ, ਡਾ. ਓਂਕਾਰ ਸਿੰਘ, ਕਿਰਨ ਜੇਤਲੀ, ਡਾ. ਸ਼ਾਰਦਾ ਅਦਲੱਖਾ, ਰਾਜਿੰਦਰ ਮੋਹਨ ਸਿੰਘ ਛੀਨਾ, ਸਾਬਕਾ ਮੇਅਰ ਬਖਸ਼ੀ ਰਾਮ ਅਰੋੜਾ ਆਦਿ ਵਿਸ਼ੇਸ਼ ਮਹਿਮਾਨਾਂ ਨੇ ਜਯੋਤੀ ਜਗਾ ਕੇ ਹੋਇਆ ਕਰਕੇ ਪ੍ਰੋਗਰਾਮ ਦਾ ਸ਼ੁਭਆਰੰਭ ਕਰਨ ਉਪਰੰਤ ਵੀ.ਕੇ ਊਸ਼ਾ ਭੈਣ ਨੂੰ ਗੁਲਦਸਤਾ ਭੇਟ ਕਰ ਕੇ ਸਨਮਾਨਿਤ ਕੀਤਾ।