ਕਾਇਆ ਕਲਪ ਮੁਹਿੰਮ ‘ਚ ਸਿਹਤ ਵਿਭਾਗ ਕਪੂਰਥਲਾ ਦਾ ਵਧੀਆ ਪ੍ਰਦਰਸ਼ਨ

ਐਸ.ਡੀ.ਐਚ ਤੇ ਸੀ.ਐਚ.ਸੀ ਕੈਟੇਗਰੀ ਵਿਚ ਪ੍ਰਾਪਤ ਕੀਤੇ ਅਹਿਮ ਸਥਾਨ
ਕਪੂਰਥਲਾ, 28 ਅਪ੍ਰੈਲ (ਪੰਜਾਬ ਪੋਸਟ ਬਿਊਰੋ) – ਸਰਕਾਰੀ ਸਿਹਤ ਕੇਂਦਰਾਂ ਵਿੱਚ ਮਰੀਜ਼ਾਂ ਨੂੰ ਵਧੀਆ ਸਿਹਤ ਸਹੂਲਤਾਂ ਦੇਣ ਦੇ ਉਦੇਸ਼ ਨਾਲ ਸ਼ੁਰੂ ਕੀਤੀ ਗਈ ਕਾਇਆ ਕਲਪ ਮੁਹਿੰਮ ਵਿੱਚ ਸਿਹਤ ਵਿਭਾਗ ਕਪੂਰਥਲਾ ਨੇ ਇੱਕ ਵਾਰ ਫੇਰ ਵਧੀਆ ਪ੍ਰਦਰਸ਼ਨ ਕੀਤਾ ਹੈ।
                        ਸਿਵਲ ਸਰਜਨ ਡਾ. ਜਸਮੀਤ ਬਾਵਾ ਨੇ ਦੱੱਸਿਆ ਕਿ ਕਮਿਊਨਿਟੀ ਹੈਲਥ ਸੈਂਟਰਾਂ ਦੀ ਕੈਟੇਗਰੀ ਵਿੱਚ ਸੀ.ਐਚ.ਸੀ ਕਾਲਾ ਸੰਘਿਆ ਨੇ ਪੰਜਾਬ ਵਿਚੋਂ ਤੀਸਰਾ, ਬੇਗੋਵਾਲ ਨੇ ਚੌਥਾ ਅਤੇ ਪਾਂਛਟ ਨੇ 9ਵਾਂ ਸਥਾਨ ਅਤੇ ਫੱਤੂਡਿੰਗਾਂ ਨੇ 16 ਵਾਂ ਸਥਾਨ ਹਾਸਲ ਕੀਤਾ ਹੈ। ਇਸੀ ਤਰ੍ਹਾਂ ਸਬ ਡਵੀਜਨਲ ਹਸਪਤਾਲ ਦੀ ਕੈਟੇਗਰੀ ਵਿੱਚ ਐਸ.ਡੀ.ਐਚ.ਫਗਵਾੜਾ 7ਵੇਂ ਸਥਾਨ ਤੇ ਰਿਹਾ। ਸਿਵਲ ਸਰਜਨ ਡਾ. ਜਸਮੀਤ ਬਾਵਾ ਨੇ ਕਿਹਾ ਕਿ ਕਾਇਆ ਕਲਪ ਸਵੱਛ ਭਾਰਤ ਮੁਹਿੰਮ ਦਾ ਇੱਕ ਹਿੱਸਾ ਹੈ ਜਿਸ ਦਾ ਉਦੇਸ਼ ਸਰਕਾਰੀ ਸਿਹਤ ਕੇਂਦਰਾਂ ਦਾ ਮਿਆਰ ਉੱਚਾ ਚੁੱਕਣਾ ਹੈ।ਇਸ ਮੁਹਿੰਮ ਦੇ ਤਹਿਤ ਸਿਹਤ ਕੇਂਦਰਾਂ ਵਿੱਚ ਸਾਫ ਸਫਾਈ ਤੇ ਵਧੀਆ ਰੱਖ ਰਖਾਅ ਨੂੰ ਉਤਸ਼ਾਹਿਤ ਕੀਤਾ ਜਾਂਦਾ ਹੈ।ਡਿਪਟੀ ਮੈਡੀਕਲ ਕਮਿਸ਼ਨਰ ਤੇ ਕਾਇਆ ਕਲਪ ਦੇ ਜਿਲਾ ਨੋਡਲ ਅਫਸਰ ਡਾ. ਸਾਰਿਕਾ ਦੁੱਗਲ ਇਸ ਸਫਲਤਾ ਦਾ ਸਿਹਰਾ ਸਿਵਲ ਸਰਜਨ ਡਾ. ਜਸਮੀਤ ਬਾਵਾ ਦੇ ਕੁਸ਼ਲ ਮਾਰਗਦਰਸ਼ਨ ਨੂੰ ਦਿੱਤਾ।ਜਿੰਨਾਂ ਸਰਕਾਰੀ ਸਿਹਤ ਕੇਂਦਰਾਂ ਨੂੰ ਐਵਾਰਡ ਮਿਲੇ ਹਨ, ਉਹ ਵਧਾਈ ਦੇ ਪਾਤਰ ਹਨ।ਜਿਲਾ ਐਪੀਡੀਮੋਲੋਜਿਸਟ ਡਾ. ਰਾਜੀਵ ਭਗਤ ਅਤੇ ਏ.ਐਚ.ਏ ਡਾ. ਸ਼ੁਭਰਾ ਸਿੰਘ ਨੇ ਵੀ ਇਸ ਪ੍ਰਾਪਤੀ ‘ਤੇ ਖੁਸ਼ੀ ਜ਼ਾਹਿਰ ਕੀਤੀ ਹੈ।