ਟਰਾਂਸਪੋਰਟ ਕਾਰੋਬਾਰੀਆਂ ਦੇ ਹੋਏ ਵਿੱਤੀ ਨੁਕਸਾਨ ਲਈ ਅਮਨ ਅਰੋੜਾ ਨੇ ਪੰਜਾਬ ਸਰਕਾਰ ਨੂੰ ਲਿਖਿਆ ਪੱਤਰ

ਲੌਂਗੋਵਾਲ, 23 ਮਈ (ਪੰਜਾਬ ਪੋਸਟ – ਜਗਸੀਰ ਲੌਂਗੋਵਾਲ) – ਆਮ ਆਦਮੀ ਪਾਰਟੀ ਦੇ ਹਲਕਾ ਵਿਧਾਇਕ ਅਮਨ ਅਰੋੜਾ ਨੇ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਦੇ ਨਾਮ ਇਕ ਚਿੱਠੀ ਲਿਖ ਕੇ ਕੋਰੋਨਾ ਮਹਾਂਮਾਰੀ ਦੇ ਕਾਰਨ ਰਾਜ ਦੇ ਟਰਾਂਸਪੋਰਟ ਕਾਰੋਬਾਰੀਆਂ, ਟੈਕਸੀ ਮਾਲਕਾਂ, ਬੱਸ ਤੇ ਟਰੱਕ ਆਪਰੇਟਰਾਂ, ਟੈਕਸੀ ਅਤੇ ਆਟੋ ਚਾਲਕਾਂ ਦੇ ਹੋ ਰਹੇ ਵਿੱਤੀ ਨੁਕਸਾਨ ਵੱਲ ਤੁਰੰਤ ਧਿਆਨ ਦੇਣ ਦੀ ਮੰਗ ਕੀਤੀ ਹੈ।ਵਿਧਾਇਕ ਅਮਨ ਅਰੋੜਾ ਨੇ ਚਿੱਠੀ ਵਿੱਚ ਕੁੱਝ ਸੁਝਾਅ ਦਿੰਦੇ ਹੋਏ ਕਿਹਾ ਕਿ ਵਪਾਰਕ ਵਾਹਨਾਂ, ਟੈਕਸੀ ਗੱਡੀਆਂ ਦਾ ਕਾਰੋਬਾਰ ਲਗਭਗ ਦੋ ਮਹੀਨਿਆਂ ਤੋਂ ਬੰਦ ਪਿਆ ਹੈ ਅਤੇ ਅੱਗੇ ਵੀ ਕੁੱਝ ਸਮਾਂ ਚੱਲਣ ਦੀ ਕੋਈ ਸੰਭਾਵਨਾ ਨਜ਼ਰ ਨਹੀ ਆ ਰਹੀ।ਇਹਨਾਂ ਦੀਆਂ ਗੱਡੀਆਂ ਦੇ ਦੋ ਤਿਮਾਹੀ (6 ਮਹੀਨੇ ) ਦੇ ਲਈ ਰੋਡ ਟੈਕਸ ਮਾਫ ਕੀਤਾ ਜਾਵੇ।ਤਾਂਕਿ ਟਰਾਂਸਪੋਰਟ ਕਾਰੋਬਾਰੀਆਂ ਦੇ ਕੁਝ ਨੁਕਸਾਨ ਦੀ ਭਰਪਾਈ ਕੀਤੀ ਜਾ ਸਕੇ।ਉਹਨਾਂ ਨੇ ਕਿਹਾ ਕਿ ਇਸੇ ਤਰ੍ਹਾਂ ਟਰਾਂਪੋਰਟ ਕਾਰੋਬਾਰੀਆਂ, ਬੱਸ ਤੇ ਟਰੱਕ ਆਪਰੇਟਰਾਂ, ਟੈਕਸੀ ਅਤੇ ਆਟੋ ਚਾਲਕਾਂ ਦੇ ਵਾਹਨਾਂ ਦੇ ਪਾਸਿੰਗ ਅਤੇ ਪਰਮਿਟ ਵਿੱਚ 6 ਮਹੀਨੇ ਦਾ ਵਾਧਾ ਕਰਕੇ ਇਹਨਾਂ ਨੂੰ ਵੀ ਕੁੱਝ ਰਿਆਇਤ ਦਿੱਤੀ ਜਾਣੀ ਚਾਹਿਦੀ ਹੈ।ਸੰਕਟ ਬੀਮਾਰੀ ਦੌਰਾਨ ਗੱਡੀਆਂ ਦੇ ਬੀਮੇ ਵਿੱਚ ਵਾਧੇ ਦਾ ਮਾਮਲਾ ਕੇਂਦਰ ਸਰਕਾਰ ਕੋਲ ਚੁੱਕ ਕੇ ਬੀਮੇ ਵਿੱਚ 6 ਮਹੀਨਿਆਂ ਦਾ ਵਾਧਾ ਕੀਤਾ ਜਾਵੇ ਅਤੇ ਕੇਂਦਰ ਸਰਕਾਰ ਦੂਜੇ ਰਾਜਾਂ ਦੀ ਤਰ੍ਹਾਂ ਕੋਈ ਵਿੱਤੀ ਪੈਕੇਜ ਦਾ ਐਲਾਨ ਕਰੇ।