ਭਾਰਤ ਬੰਦ ਨੂੰ ਸਫਲ ਕਰਨ ‘ਤੇ ਭਾਈ ਸਖੀਰਾ ਵਲੋਂ ਸਮੂਹ ਧਰਮਾਂ ਤੇ ਵਰਗਾਂ ਦਾ ਧੰਨਵਾਦ

ਅੰਮ੍ਰਿਤਸਰ, 27 ਮਾਰਚ (ਸੰਧੂ) – ਸਾਂਝੇ ਕਿਸਾਨ ਮੋਰਚੇ ਦੇ ਵੱਲੋਂ ਭਾਰਤ ਬੰਦ ਦੇ ਸੱਦੇ ਦੌਰਾਨ ਆਪਣੇ ਕੰਮ ਕਾਰ ਬੰਦ ਰੱਖਣ ਵਾਲੇ ਸਮੂਹ ਧਰਮਾਂ, ਵਰਗਾਂ, ਸਰਕਾਰੀ ਤੇ ਗੈਰ ਸਰਕਾਰੀ ਕਰਮਚਾਰੀਆਂ ਦਾ ਧੰਨਵਾਦ ਕਰਦਿਆਂ ਸੰਨ 2015 ਦੇ ਸਰਬੱਤ ਖਾਲਸਾ ਸੰਮੇਲਨ ਦੇ ਮੁੱਖ ਆਯੋਜਨ ਕਰਤਾ ਭਾਈ ਜਰਨੈਲ ਸਿੰਘ ਸਖੀਰਾ ਨੇ ਕਿਹਾ ਕਿ ਅੱਜ ਦੇ ਇਸ ਪੂਰਨ ਬੰਦ ਨੇ ਜਿਥੇ ਏਕਤਾ ਅਤੇ ਇਕਜੁੱਟਤਾ ਦਾ ਸਬੂਤ ਦਿੱਤਾ ਹੈ, ਉਥੇ ਦੇਸ਼-ਵਾਸੀਆਂ ਨੇ ਕਿਸਾਨਾਂ ਤੇ ਮਜ਼ਦੂਰਾਂ ਦਾ ਹਿਤੈਸ਼ੀ ਹੋਣ ਦਾ ਸਬੂਤ ਦਿੱਤਾ ਹੈ।
                      ਭਾਈ ਸਖੀਰਾ ਨੇ ਕਿਹਾ ਕਿ ਦੇਸ਼ ਦੇ ਕਿਸਾਨਾਂ ਅਤੇ ਮਜਦੂਰਾਂ ਦਾ ਸ਼ੰਘਰਸ਼ਾਂ, ਘੋਲਾਂ, ਅੰਦੋਲਨਾਂ ਤੇ ਬੰਦ ਦੇ ਸੱਦਿਆਂ ਦੇ ਨਾਲ ਪੁਰਾਣਾ ਰਿਸ਼ਤਾ ਤੇ ਸਾਂਝ ਹੈ।ਸ਼ਹਿਰੀ ਤੇ ਪੇਂਡੂ ਖੇਤਰਾਂ ਦੇ ਵਿੱਚ ਛਾਈ ਬੇ-ਰੌਣਕੀ ਨੇ ਸਰਕਾਰ ਦੀ ਨੀਂਦ ਹਰਾਮ ਕਰਕੇ ਰੱਖ ਦਿੱਤੀ ਹੈ।ਸਰਕਾਰ ਨੂੰ ਜਿੱਥੇ ਆਰਥਿਕ ਮੰਦਹਾਲੀ ਦੀ ਮਾਰ ਝੱਲਣੀ ਪੈ ਰਹੀ ਹੈ, ਉਥੇ ਲੋਕ ਰੋਹ ਦਾ ਵੀ ਸਾਹਮਣਾ ਕਰਨਾ ਪੈ ਰਿਹਾ ਹੈ।ਉਨ੍ਹਾਂ ਕਿਹਾ ਕਿ ਅੱਜ ਦਾ ਮੁਕੰਮਲ ਬੰਦ ਸਰਕਾਰ ਅਤੇ ਉਸ ਦੇ ਚਹੇਤਿਆਂ ਵਾਸਤੇ ਇੱਕ ਸਬਕ ਹੈ।