ਫਿਲਮ ਐਂਡ ਟੈਲੀਵਿਜ਼ਨ ਇੰਸਟੀਚਿਊਟ ਵੱਲੋਂ ਯੂਨੀਵਰਸਿਟੀ ਵਿਖੇ ਫਿਲਮ ਨਿਰਮਾਣ ਕੋਰਸ ਦਾ ਆਯੋਜਨ

ਅੰਮ੍ਰਿਤਸਰ, 20 ਫਰਵਰੀ (ਸੁਖਬੀਰ ਸਿੰਘ ਖੁਰਮਣੀਆਂ) – ਗੁਰੂ ਨਾਨਕ ਦੇਵ ਯੂਨੀਵਰਸਿਟੀ ਦੇ ਵਾਇਸ ਚਾਂਸਲਰ ਡਾ. ਕਰਮਜੀਤ ਸਿੰਘ ਦੀ ਅਗਵਾਈ ਹੇਠ ਫਿਲਮ ਅਤੇ ਟੈਲੀਵਿਜ਼ਨ ਵਿਸ਼ੇਸ਼ਤਾਵਾਂ `ਤੇ ਤਿੰਨ ਦਿਨਾਂ ਇੰਟੈਂਸਿਵ ਕੋਰਸ ਦਾ ਆਯੋਜਨ ਗੁਰੂ ਨਾਨਕ ਦੇਵ ਯੂਨੀਵਰਸਿਟੀ ਦੇ ਗੁਰੂ ਨਾਨਕ ਭਵਨ ਵਿਖੇ ਕਰਵਾਇਆ ਗਿਆ।ਇਸ ਵਿਸ਼ੇਸ਼ ਕੋਰਸ ਵਿੱਚ ਫਿਲਮ ਅਤੇ ਟੈਲੀਵਿਜ਼ਨ ਇੰਸਟੀਚਿਊਟ ਆਫ਼ ਇੰਡੀਆ ਤੋਂ ਵਿਦਵਾਨ ਫੈਕਲਟੀ ਮੈਂਬਰ ਡਾ. ਮਿਲਿੰਦ ਦਾਮਲੇ (ਈ.ਟੀ.ਵੀ ਪ੍ਰੋਡਕਸ਼ਨ) ਵੱਲੋਂ ਆਪਣੀ ਵਿਸ਼ੇਸ਼ ਸਿਖਲਾਈ ਅਤੇ ਭਾਸ਼ਣਾਂ ਰਾਹੀਂ ਵਿਦਿਆਰਰਥੀਆਂ ਨੂੰ ਫਿਲਮ ਅਤੇ ਟੈਲੀਵਿਜ਼ਨ ਨਿਰਮਾਣ ਦੀ ਕਲਾ ਅਤੇ ਸ਼ਿਲਪਕਾਰੀ ਦੇ ਡੂੰਘਾਈ ਨਾਲ ਗੁਰ ਸਮਝਾਏ।ਇਸ ਕੋਰਸ ਵਿੱਚ ਯੂਨੀਵਰਸਿਟੀ ਦੇ ਜਨ ਸੰਚਾਰ ਵਿਭਾਗ ਦੇ ਵਿਦਿਆਰਥੀਆਂ ਅਤੇ ਖੋਜਾਰਥੀਆਂ ਨੇ ਫਿਲਮ ਨਿਰਮਾਣ ਵਿੱਚ ਵਿਹਾਰਕ ਤਜ਼ਰਬਾ ਅਤੇ ਇਸ ਨਾਲ ਸਬੰਧਤ ਹੋਰ ਖੇਤਰਾਂ ਬਾਰੇ ਵੀ ਜਾਣਕਾਰੀ ਦਾ ਲਾਭ ਲਿਆ।
ਡਾ. ਦਾਮਲੇ ਨੇ ਇਸ ਕੋਰਸ ਵਿੱਚ ਫਿਲਮਾਂਕਣ ਤਕਨੀਕਾਂ, ਕੈਮਰਾ ਸੰਚਾਲਨ, ਲਾਈਟਿੰਗ ਸੈਟਅੱਪ, ਸਾਊਂਡ ਡਿਜ਼ਾਈਨ, ਸਕ੍ਰਿਪਟ ਰਾਈਟਿੰਗ, ਸਕ੍ਰੀਨਪਲੇ ਅਤੇ ਕਹਾਣੀ ਸੁਣਾਉਣ ਸਮੇਤ ਕਈ ਵਿਸ਼ਿਆਂ ਨੂੰ ਸ਼ਾਮਲ ਕੀਤਾ ਗਿਆ।ਡਾ. ਮਿਲਿੰਦ ਨੇ ਵਿਸਤ੍ਰਿਤ ਪ੍ਰਦਰਸ਼ਨਾਂ ਅਤੇ ਵਿਹਾਰਕ ਸੈਸ਼ਨਾਂ ਰਾਹੀਂ ਆਪਣੀ ਉਦਯੋਗਿਕ ਮੁਹਾਰਤ ਸਾਂਝੀ ਕੀਤੀ, ਜਿਸ ਨਾਲ ਵਿਦਿਆਰਥੀਆਂ ਨੂੰ ਫਿਲਮ ਨਿਰਮਾਣ ਦੀਆਂ ਬਾਰੀਕੀਆਂ ਨੂੰ ਸਮਝਣ ਵਿੱਚ ਮਦਦ ਮਿਲੀ।
ਵਿਭਾਗ ਦੇ ਮੁਖੀ ਡਾ. ਵਸੁਧਾ ਸੰਬਿਆਲ ਨੇ ਦੱਸਿਆ ਕਿ ਤਿੰਨ ਦਿਨਾਂ ਦੌਰਾਨ, ਵਿਦਿਆਰਥੀ ਕਹਾਣੀ ਲਿਖਣ, ਸਕ੍ਰਿਪਟ ਵਿਕਾਸ ਅਤੇ ਸਕ੍ਰੀਨਪਲੇ ਢਾਂਚਾ ਬਣਾਉਣ ਵਰਗੇ ਇੰਟਰਐਕਟਿਵ ਕੰਮਾਂ ਅਤੇ ਅਭਿਆਸਾਂ ਵਿੱਚ ਸਰਗਰਮੀ ਨਾਲ ਸ਼ਾਮਲ ਹੋਏ।ਇਸ ਵਿਹਾਰਕ ਪਹੁੰਚ ਨੇ ਨਾ ਸਿਰਫ਼ ਉਨ੍ਹਾਂ ਦੇ ਰਚਨਾਤਮਕ ਹੁਨਰ ਨੂੰ ਵਧਾਇਆ ਬਲਕਿ ਉਨ੍ਹਾਂ ਨੂੰ ਫਿਲਮ ਨਿਰਮਾਣ ਦੀਆਂ ਪੇਚੀਦਗੀਆਂ ਨੂੰ ਸਮਝਣ ਲਈ ਤਥਾਂ ਨਾਲ ਜੁੜੀ ਸਮਝ ਵੀ ਪ੍ਰਦਾਨ ਕੀਤੀ।
ਇੰਟਰਐਕਟਿਵ ਸੈਸ਼ਨ ਵਿਚ ਵਿਦਿਆਰਥੀਆਂ ਨੇ ਡਾ. ਮਿਲਿੰਦ ਦਾਮਲੇ ਨਾਲ ਆਪਣੇ ਸੁਆਲਾਂ ਦੀ ਸਾਂਝ ਕੀਤੀ, ਜਿਸ `ਤੇ ਉਨ੍ਹਾਂ ਵੱਲੋਂ ਫਿਲਮ ਨਿਰਮਾਣ ਦੇ ਗੁੰਝਲਦਾਰ ਪਹਿਲੂਆਂ `ਤੇ ਸਪੱਸ਼ਟਤਾ ਪ੍ਰਦਾਨ ਕੀਤੀ ਗਈ।ਇਸ ਨਾਲ ਵਿਦਿਆਰਥੀਆਂ ਨੂੰ ਨਵੇਂ ਦ੍ਰਿਸ਼ਟੀਕੋਣਾਂ ਦੀ ਪੜਚੋਲ ਕਰਨ ਅਤੇ ਉਨ੍ਹਾਂ ਦੇ ਰਚਨਾਤਮਕ ਦ੍ਰਿਸ਼ਟੀਕੋਣ ਨੂੰ ਵਿਸ਼ਾਲ ਕਰਨ ਵਿਚ ਸਹਾਇਤਾ ਮਿਲੀ।ਮਾਸ ਕਮਿਊਨੀਕੇਸ਼ਨ ਦੇ ਵਿਦਿਆਰਥੀਆਂ ਨੇ ਆਪਣਾ ਅਨੁਭਵ ਸਾਂਝਾ ਕਰਰਦਿਆਂ ਕਿਹਾ ਕਿ ਕੋਰਸ ਵਿੱਚ ਸ਼ਾਮਲ ਵਿਹਾਰਕ ਅਭਿਆਸ ਸਾਡੇ ਵਿਚਾਰਾਂ ਦੀ ਵਿਵਹਾਰਕਤਾ ਬਣਾਉਣ ਵਿੱਚ ਪ੍ਰੇਰਨਾਦਾਇਕ ਦਿਸ਼ਾ ਪ੍ਰਦਾਨ ਕਰਨਗੇ।ਭਾਗ ਲੈਣ ਵਾਲਿਆਂ ਨੂੰ ਸਰਕੀਫਿਕੇਟ ਪ੍ਰਦਾਨ ਵੀ ਕੀਤੇ ਗਏ।ਸੈਸ਼ਨਾਂ ਵਿੱਚ ਵਿਭਾਗ ਦੇ ਅਧਿਆਪਕਾਂ ਡਾ. ਪਲਵਿੰਦਰ ਸਿੰਘ ਭਾਟੀਆ, ਡਾ. ਦੀਪਿਕਾ, ਡਾ. ਸਨਾ, ਡਾ. ਅਮਨ ਜੋਤੀ, ਮਿਸ. ਗੁਰਿੰਦਰ ਕੌਰ ਤੋਂ ਇਲਾਵਾ ਵੱਡੀ ਗਿਣਤੀ ‘ਚ ਵਿਦਿਆਰਥੀ ਖੋਜਾਰਥੀ ਹਾਜ਼ਰ ਸਨ।