ਐਨ.ਸੀ.ਸੀ ਗਰੁੱਪ ਹੈਡਕੁਆਰਟਰ ਨੇ ਜੋਸ਼ ਨਾਲ ਮਨਾਇਆ ਅੰਤਰਰਾਸ਼ਟਰੀ ਯੋਗ ਦਿਵਸ

ਅੰਮ੍ਰਿਤਸਰ, 25 ਜੂਨ (ਸੁਖਬੀਰ ਸਿੰਘ ਖੁਰਮਣੀਆਂ) – ਐਨ.ਸੀ.ਸੀ ਗਰੁੱਪ ਹੈਡਕੁਆਰਟਰ ਅੰਮ੍ਰਿਤਸਰ ਵੱਲੋਂ 21 ਜੂਨ ਨੂੰ ਅੰਤਰਰਾਸ਼ਟਰੀ ਯੋਗ ਦਿਵਸ ਖਾਲਸਾ ਕਾਲਜ ਅੰਮ੍ਰਿਤਸਰ ਦੇ ਫਰੰਟ ਲਾਨ ਵਿੱਚ ਜੋਸ਼ ਨਾਲ ਮਨਾਇਆ ਗਿਆ।ਸਮਾਗਮ ਵਿੱਚ ਅੰਮ੍ਰਿਤਸਰ ਗਰੁੱਪ ਦੀਆਂ ਵੱਖ-ਵੱਖ ਯੂਨਿਟਾਂ ਤੋਂ 1000 ਤੋਂ ਵੱਧ ਐਨ.ਸੀ.ਸੀ ਕੈਡਟਾਂ ਨੇ ਭਾਗ ਲਿਆ, ਜੋ ਕਿ ਇਸ ਦਿਨ ਨੂੰ ਵਿਸ਼ੇਸ਼ ਬਣਾਉਂਦਾ ਹੈ।
ਸਭ ਤੋਂ ਪਹਿਲਾਂ ਕੈਡਟਾਂ ਨੇ ਵੱਡੀ ਐਲ.ਈ.ਡੀ ਸਕਰੀਨ ਰਾਹੀਂ ਮਾਨਯੋਗ ਪ੍ਰਧਾਨ ਮੰਤਰੀ ਜੀ ਦੇ ਸਿੱਧੇ ਸੰਬੋਧਨ ਨੂੰ ਦੇਖਿਆ।ਇਸ ਤੋਂ ਬਾਅਦ, ਸਮਾਗਮ ਦੌਰਾਨ ਕੈਡਟਾਂ ਨੇ ਯੋਗ ਦੇ ਵੱਖ-ਵੱਖ ਆਸਨਾਂ ਅਤੇ ਤਕਨੀਕਾਂ ਦਾ ਸ਼ਾਨਦਾਰ ਪ੍ਰਦਰਸ਼ਨ ਕੀਤਾ।ਉਨ੍ਹਾਂ ਦੀ ਪੇਸ਼ਕਸ਼ ਨੇ ਫਿਟਨੈਸ ਅਤੇ ਹੋਲਿਸਟਿਕ ਤੰਦਰੁਸਤੀ ਪ੍ਰਤੀ ਉਨ੍ਹਾਂ ਦੀ ਵਚਨਬੱਧਤਾ ਨੂੰ ਦਰਸਾਇਆ, ਜੋ ਕਿ ਯੋਗ ਦੇ ਸਿਧਾਂਤਾਂ-ਸਰੀਰਕ ਸਿਹਤ ਅਤੇ ਮਾਨਸਿਕ ਸ਼ਾਂਤੀ-ਨਾਲ ਸਾਂਝ ਰੱਖਦੀ ਹੈ ਅਤੇ ਇਹ ਐਨ.ਸੀ.ਸੀ ਦੇ ਆਦਰਸ਼ਾਂ ਨਾਲ ਪੂਰੀ ਤਰ੍ਹਾਂ ਮੇਲ ਖਾਂਦੀ ਹੈ।
ਯੋਗ ਸਾਧਨਾ ਕੇਂਦਰ ਅੰਮ੍ਰਿਤਸਰ ਤੋਂ ਆਏ ਯੋਗਾ ਵਿਦਵਾਨਾਂ ਨੇ ਕੈਡਟਾਂ ਨੂੰ ਯੋਗ ਆਸਨਾਂ ਨੂੰ ਠੀਕ ਢੰਗ ਨਾਲ ਕਰਨ ਦੀ ਟਰੇਨਿੰਗ ਦਿੱਤੀ।ਅੰਮ੍ਰਿਤਸਰ ਦੇ ਅਧਿਕਾਰੀ ਗਰੁੱਪ ਕਮਾਂਡਰ ਕਰਨਲ ਹਰਪ੍ਰੀਤ ਸਿੰਘ ਨੇ ਯੋਗ ਦੇ ਅਨੁਸਾਸ਼ਨ, ਇਕਾਗ੍ਰਤਾ ਅਤੇ ਲਚਕੀਲੇਪਨ ਨੂੰ ਵਿਕਸਤ ਕਰਨ ਵਿੱਚ ਭੂਮਿਕਾ ਬਾਰੇ ਜ਼ੋਰ ਦਿੱਤਾ-ਜੋ ਭਵਿੱਖ ਦੇ ਨੇਤਾਵਾਂ ਲਈ ਅਹਮ ਗੁਣ ਹਨ।ਉਨ੍ਹਾਂ ਦੇ ਬਚਨਾਂ ਨੇ ਇਸ ਗੱਲ ਨੂੰ ਮਜ਼ਬੂਤੀ ਨਾਲ ਉਭਾਰਿਆ ਕਿ ਯੋਗ ਸਿਰਫ ਸਰੀਰਕ ਕਸਰਤ ਨਹੀਂ, ਸਗੋਂ ਮਨ ਅਤੇ ਸਰੀਰ ਦੋਹਾਂ ਦੀ ਸੰਭਾਲ ਕਰਨ ਵਾਲੀ ਵਿਹੰਗਮ ਪ੍ਰਕਿਰਿਆ ਹੈ।
ਸਮਾਗਮ ਦਾ ਅੰਤ ਸਾਰੇ ਭਾਗੀਦਾਰਾਂ ਵਲੋਂ ਆਪਣੀ ਰੋਜ਼ਾਨਾ ਦੀ ਜਿੰਦਗੀ ਵਿੱਚ ਯੋਗ ਨੂੰ ਸ਼ਾਮਲ ਕਰਨ ਦੀ ਸਹੁੰ ਨਾਲ ਹੋਇਆ, ਜੋ ਕਿ ਇੱਕ ਸਿਹਤਮੰਦ ਜੀਵਨ ਸ਼ੈਲੀ ਵੱਲ ਪਗ ਚੁੱਕਣ ਦੀ ਨਿਸ਼ਾਨੀ ਹੈ।