ਕੂਹਣੀ ਮੋੜ ‘ਤੇ ਨਾ ਸੰਭਲਿਆ ਤੇਜ਼ ਰਫ਼ਤਾਰ ਟਿੱਪਰ ਡਿੱਗਿਆ ਰਜਵਾਹੇ ‘ਚ

ਅਹਿਮਦਗੜ੍ਹ/ਸੰਦੌੜ 27 ਜੂਨ (ਹਰਮਿੰਦਰ ਸਿੰਘ) – ਮਲੇਰਕੋਟਲਾ ਤੋ ਰਾਏਕੋਟ ਸੜਕ ਤੇ ਕਲਿਆਣ ਪੁਲ ਵਿਖੇ ਬਠਿੰਡਾ ਬਰਾਂਚ ਦੀ ਨਹਿਰ ਦੇ ਨੇੜੇ ਰਜਵਾਹੇ ਵਿਚ ਬੀਤੀ ਰਾਤ ਰੇਤੇ ਵਾਲਾ ਖ਼ਾਲੀ ਟਿੱਪਰ ਡਿਹ ਪਿਆ। ਇਸ ਬਾਬਤ ਪ੍ਰਾਪਤ ਜਾਣਕਾਰੀ ਅਨੁਸਾਰ ਟਿਪਰ ਨੰਬਰ ਪੀ ਬੀ 10 ਡੀ ਡੀ 9282 ਜੋ ਕਿ ਰਾਤ ਦੇ ਹਨੇਰੇ ਵਿਚ ਚਾਲਕ ਵੱਲੋਂ ਤੇਜ਼ ਰਫ਼ਤਾਰ ਹੋਣ ਕਾਰਨ ਇੱਕ ਦਮ ਕੂਹਣੀ ਮੋੜ ‘ਤੇ ਨਾ ਸੰਭਲੇ ਜਾਣ ਕਰਕੇ ਪਾਣੀ ਨਾਲ ਭਰੇ ਸੂਏ ਵਿਚ ਜਾ ਫਸਿਆ, ਜਿਸ ਨਾਲ ਡਰਾਈਵਰ ਦੇ ਮਾਮੂਲੀ ਚੋਟਾਂ ਆਈਆਂ ਅਤੇ ਜਾਨੀ ਨੁਕਸਾਨ ਤੋ ਬਚਾਅ ਹੋਇਆ।
ਜ਼ਿਕਰਯੋਗ ਹੈ ਕਿ ਇਹਨਾਂ ਕੂਹਣੀ ਮੋੜਾਂ ਤੇ ਆਏ ਦਿਨ ਜਾਨ ਲੇਵਾ ਘਟਨਾਵਾਂ ਹੁੰਦੀਆਂ ਹੀ ਰਹਿੰਦੀਆਂ ਹਨ ਰਾਹਗੀਰਾਂ ਅਤੇ ਇਲਾਕੇ ਨਿਵਾਸੀਆਂ ਨੇ ਇਹਨਾਂ ਮੋੜਾਂ ਤੇ ਰਿਫ਼ਲੈਕਟਰ ਜਾਂ ਸੜਕੀ ਕਿਨਾਰੀ ਤੇ ਲੋਹੇ ਦੇ ਜੰਗਲੇ (ਰੇਲਿੰਗ) ਲਗਵਾਉਣ ਦੀ ਸਰਕਾਰ ਦੇ ਸਬੰਧਿਤ ਮਹਿਕਮੇ ਪਾਸੋਂ ਮੰਗ ਕੀਤੀ ਸੀ ਤਾਂ ਕਿ ਇਹਨਾਂ ਘਟਨਾਵਾਂ ਤੋ ਬੱਚਿਆ ਜਾ ਸਕੇ ਪਰ ਅਜੇ ਤੱਕ ਕੋਈ ਹੱਲ ਨਹੀਂ ਕੀਤਾ ਗਿਆ।