ਕਾਂਗਰਸ ਨੇ ਚਿੱਟੇ ਰਾਵਨ ਦਾ ਪੁੱਤਲਾ ਫੂਕਿਆ- ਕੀਤੀ ਜ਼ੋਰਦਾਰ ਨਾਅਰੇਬਾਜੀ

ਫਾਜ਼ਿਲਕਾ, 17 ਅਕਤੂਬਰ (ਵਿਨੀਤ ਅਰੋੜਾ)- ਪੰਜਾਬ ਕਾਂਗਰਸ ਪ੍ਰਧਾਨ ਕੈਪਟਨ ਅਮਰਿੰਦਰ ਸਿੰਘ ਦੇ ਨਿਰਦੇਸ਼ਾਂ ਤੇ ਅੱਜ ਸਥਾਨਕ ਘੰਟਾਘਰ ਚੌਕ ਤੇ ਚਿੱਟੇ ਰਾਵਨ ਦਾ ਪੁੱਤਲਾ ਫੂਕ ਕੇ ਰੋਸ ਪ੍ਰਦਰਸ਼ਨ ਕੀਤਾ ਗਿਆ। ਜ਼ਿਲ੍ਹਾ ਕਾਂਗਰਸ ਪ੍ਰਧਾਨ ਅਤੇ ਬਲਾਕ ਕਾਂਗਰਸ ਪ੍ਰਧਾਨ ਸੁਰਿੰਦਰ ਕਾਲੜਾ ਦੀ ਅਗਵਾਈ ਵਿਚ ਸਾਬਕਾ ਮੰਤਰੀ ਹੰਸ ਰਾਜ ਜੋਸਨ, ਡਾ. ਯਸ਼ਪਾਲ ਜੱਸੀ, ਪ੍ਰਵੀਣ ਧੰਜੂ, ਐਮ.ਐਸ.ਬੇਦੀ, ਸੁਖਵੰਤ ਬਰਾੜ, ਜਸਪਿੰਦਰ ਜਾਖੜ, ਰੰਜ਼ਮ ਕਾਮਰਾ ਅਤੇ ਹੋਰਨਾਂ ਨੇ ਕਿਹਾ ਕਿ ਮੌਜੂਦਾ ਸਮੇਂ ਵਿਚ ਅਕਾਲੀ ਭਾਜਪਾ ਸਰਕਾਰ ਨੇ ਪੰਜਾਬ ਦੇ ਨੌਜਵਾਨਾਂ ਨੂੰ ਨਸ਼ੇ ਦੀ ਦਲ ਦਲ ਵਿਚ ਧੱਕ ਦਿੱਤਾ ਹੈ। ਬਾਦਲ ਐਂਡ ਕੰਪਨੀ ਨੇ ਪੰਜਾਬ ਵਿਚ ਨਸ਼ੀਲੇ ਪਦਾਰਥਾਂ ਦੇ ਸਰਗਨਿਆਂ ਨੂੰ ਸੁਰੱਖਿਆ ਦਿੱਤੀ ਹੋਈ ਹੈ। ਜੇਕਰ ਇਸਦੀ ਨਿਰਪੱਖ ਜਾਂਚ ਕਰਵਾਈ ਜਾਵੇ ਤਾਂ ਇਯ ਵਿਚ ਕੋਈ ਸ਼ੱਕ ਨਹੀਂ ਕਿ ਇਸਦੇ ਪਿੱਛੇ ਬਾਦਲ ਐਂਡ ਕੰਪਨੀ ਹੀ ਨਜ਼ਰ ਆਵੇਗੀ।
ਜ਼ਿਲ੍ਹਾ ਪ੍ਰਧਾਨ ਵਿਮਲ ਠਠਈ ਨੇ ਕਿਹਾ ਕਿ ਅਕਾਲੀ ਸਰਕਾਰ ਦੇ ਦੌਰਾਨ ਕਿਸਾਨੀ ਦੇ ਨਾਲ ਨਾਲ ਜਵਾਨੀ ਵੀ ਬਰਬਾਦ ਹੋਈ ਹੈ। ਇਸ ਲਈ ਕਾਂਗਰਸ ਦੇ ਸੱਤਾ ਵਿਚ ਆਉਣ ਤੇ ਜਿੱਥੇ ਕਿਸਾਨਾਂ ਦਾ ਕਰਜ਼ਾ ਮੁਆਫ਼ ਕੀਤਾ ਜਾਵੇਗਾ ਉੱਥੇ ਨੌਜਵਾਨਾਂ ਨੂੰ ਨਸ਼ਿਆਂ ਦੀ ਦਲ ਦਲ ਤੋਂ ਕੱਢਕੇ ਉਨ੍ਹਾਂ ਨੂੰ ਰੋਜ਼ਗਾਰ ਮੁਹੱਈਆ ਕਰਵਾਇਆ ਜਾਵੇਗਾ। ਇਸ ਮੌਕੇ ਕਾਂਗਰਸ ਪਾਰਟੀ ਦੇ ਵਰਕਰਾਂ ਨੇ ਜ਼ੋਰਦਾਰ ਨਾਅਰੇਬਾਜੀ ਵੀ ਕੀਤੀ। ਇਸ ਮੌਕੇ ਕਾਂਗਰਸ ਪਾਰਟੀ ਦੇ ਸੁੱਧੀਜੀਵੀ ਸੈਲ ਦੇ ਜ਼ਿਲ੍ਹਾ ਚੇਅਰਮੈਨ ਸਤਪਾਲ ਪੁਜਾਨੀ, ਕਨਵੀਨਰ ਵਿਜੈ ਤੰਵਰ, ਸੰਦੀਪ ਗੁਲਬਧਰ ਅਤੇ ਸਥਾਨਕ ਵਰਕਰਾਂ ਤੋਂ ਇਲਾਵਾ ਜਲਾਲਾਬਾਦ, ਬੱਲੂਆਣਾ, ਅਰਨੀਵਾਲਾ ਦੇ ਵਰਕਰ ਵੀ ਹਾਜ਼ਰ ਸਨ।