ਗੁਰੂ ਹਰਿਕ੍ਰਿਸ਼ਨ ਸਾਹਿਬ ਜੀ ਦੇ ਪ੍ਰਕਾਸ਼ ਪੁਰਬ ਮੌਕੇ ਦਿੱਲੀ ਦੇ ਗੁਰੂਧਾਮਾਂ ’ਚ ਸੰਗਤਾਂ ਦਾ ਹੜ੍ਹ

ਸਿਕਲੀਘਰ ਸਿੱਖਾਂ ਦੇ ਕਾਜਲਪੁਰਾ ਪਿੰਡ ਨੂੰ ਗੋਦ ਲੈਣ ਦਾ ਜੀ.ਕੇ ਨੇ ਕੀਤਾ ਐਲਾਨ

ਨਵੀਂ ਦਿੱਲੀ, 18 ਜੁਲਾਈ (ਪੰਜਾਬ ਪੋਸਟ ਬਿਊਰੋ) – ਦਿੱਲੀ ਸਿੱਖ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਨੇ ਮੱਧ ਪ੍ਰਦੇਸ਼ ਦੇ ਖੰਡਵਾ ਨੇੜੇ ਸਿਕਲੀਘਰ ਸਿੱਖਾਂ ਦੇ ਕਾਜਲਪੁਰਾ ਪਿੰਡ ਨੂੰ ਗੋਦ ਲੈਣ ਦਾ ਐਲਾਨ ਕੀਤਾ ਹੈ।ਗੁਰੂ ਹਰਿਕ੍ਰਿਸ਼ਨ ਸਾਹਿਬ ਜੀ ਦੇ ਪ੍ਰਕਾਸ਼ ਪੁਰਬ ਮੌਕੇ ਗੁਰਦੁਆਰਾ ਰਕਾਬਗੰਜ ਸਾਹਿਬ ਦੇੇ ਭਾਈ ਲੱਖੀ ਸ਼ਾਹ ਵਣਜਾਰਾ ਹਾਲ ਵਿਖੇ ਹੋਏ ਮੁਖ ਸਮਾਗਮ ਦੌਰਾਨ ਬੋਲਦੇ ਹੋਏ ਕਮੇਟੀ ਪ੍ਰਧਾਨ ਮਨਜੀਤ ਸਿੰਘ ਜੀ.ਕੇ ਨੇ 2019 ’ਚ ਆ ਰਹੇ ਗੁਰੂ ਨਾਨਕ ਦੇਵ ਜੀ ਦੇ ਪ੍ਰਕਾਸ਼ ਪੁਰਬ ਨੂੰ ਵੱਡੇ ਪੱਧਰ ’ਤੇ ਮਨਾਉਣ ਦੀ ਸੰਗਤਾਂ ਨੂੰ ਜਾਣਕਾਰੀ ਦਿੱਤੀ।
   ਇਸਤੋਂ ਪਹਿਲਾ ਗੁਰਦੁਆਰਾ ਬੰਗਲਾ ਸਾਹਿਬ ਦੇ ਸਰੋਵਰ ਕੰਡੇ ਰਾਤ ਨੂੰ ਹੋਏ ਸਮਾਗਮ ਦੌਰਾਨ ਕਮੇਟੀ ਵੱਲੋਂ ਨੀਟ ਪ੍ਰੀਖਿਆ 2017 ’ਚ 11.50 ਲੱਖ ਵਿਦਿਆਰਥੀਆਂ ਵਿਚੋਂ ਪਹਿਲਾ ਸਥਾਨ ਹਾਸ਼ਿਲ ਕਰਨ ਵਾਲੇ ਨਵਦੀਪ ਸਿੰਘ ਨੂੰ ਸ਼ਾਲ ਅਤੇ 51 ਹਜਾਰ ਰੁਪਏ ਦਾ ਚੈਕ ਦੇ ਕੇ ਸਨਮਾਨਿਤ ਕੀਤਾ ਗਿਆ।ਰੰਗ-ਬਿਰੰਗੀ ਰੋਸ਼ਨੀਆਂ ਨਾਲ ਸੱਜੇ ਗੁਰਦੁਆਰਾ ਬੰਗਲਾ ਸਾਹਿਬ ਦੇ ਸਮਾਗਮ ’ਚ ਬਦਹਾਲ ਕਿਸਾਨਾਂ ਦੇ ਬੱਚਿਆਂ ਨੇ ਵੀ ਗੁਰੂ ਸਾਹਿਬ ਅੱਗੇ ਆਪਣਾ ਅਕੀਦਾ ਭੇਟ ਕਰ ਆਪਣੇ ਪਰਿਵਾਰਾਂ ਦੀ ਖੁਸ਼ਹਾਲੀ ਦੀ ਅਰਦਾਸ਼ ਕੀਤੀ। ਜੰਤਰ-ਮੰਤਰ ਵਿਖੇ ਪ੍ਰਦਰਸ਼ਨ ਲਈ ਆਏ ਹੋਏ ਕਿਸਾਨ ਜਥੇਬੰਦੀ ਦੇ ਉਕਤ ਬੱਚਿਆਂ ਨੇ ਆਪਣੀ ਮੰਗਾਂ ਨੂੰ ਪ੍ਰਦਰਸ਼ਿਤ ਕਰਦੀਆਂ ਚਿੱਟੀਆਂ ਟੋਪੀਆਂ ਪਾਈਆਂ ਹੋਈਆਂ ਸਨ।
ਗੁਰਦੁਆਰਾ ਰਕਾਬਗੰਜ ਸਾਹਿਬ ਵਿਖੇ ਪੰਥਕ ਵਿਚਾਰਾਂ ਦੌਰਾਨ ਤਕਰੀਰ ਕਰਦੇ ਹੋਏ ਮਨਜੀਤ ਸਿੰਘ ਜੀ.ਕੇ, ਜਨਰਲ ਸਕੱਤਰ ਮਨਜਿੰਦਰ ਸਿੰਘ ਸਿਰਸਾ ਅਤੇ ਜੁਆਇੰਟ ਸਕੱਤਰ ਅਮਰਜੀਤ ਸਿੰਘ ਫਤਹਿ ਨਗਰ ਨੇ ਗੁਰੂ ਸਾਹਿਬ ਦੇ ਇਤਿਹਾਸ ’ਤੇ ਰੋਸ਼ਨੀ ਪਾਉਂਦੇ ਹੋਏ ਚਲ ਰਹੇ ਕੌਮੀ ਕਾਰਜਾਂ ਦਾ ਵੇਰਵਾ ਦਿੱਤਾ। ਜੀ.ਕੇ ਨੇ ਕਿਹਾ ਕਿ ਸਿੱਖਿਆ ਅੱਜ ਦੇ ਸਮੇਂ ਵਿਚ ਸਭਤੋਂ ਵੱਡੀ ਲੋੜ ਹੈ ਜੇਕਰ ਅਸੀਂ ਸਿੱਖ ਆਈ.ਏ.ਐਸ ਅਤੇ ਆਈ.ਪੀ.ਐਸ ਪੈਦਾ ਕਰਨ ਵਿਚ ਨਾਕਾਮ ਰਹੇ ਤਾਂ ਕੌਮ ਦਾ ਭਵਿੱਖ ਖੱਤਰੇ ਵਿਚ ਹੈ ਕਿਉਂਕਿ ਘੱਟਗਿਣਤੀ ਕੌਮ ਬਿਨਾਂ ਉਚ ਤੇ ਮਿਆਰੀ ਸਿੱਖਿਆ ਦੇ ਬਿਨਾ ਆਪਣੀ ਹੋਂਦ ਨੂੰ ਨਹੀਂ ਬਚਾ ਸਕਦੀ ਹੈ।ਇਸ ਸਬੰਧੀ ਘੱਟਗਿਣਤੀ ਵਿੱਦਿਅਕ ਅਦਾਰਿਆਂ ਦੇ ਦਰਜ਼ਾ ਮਿਲਣ ਉਪਰੰਤ ਖਾਲਸਾ ਕਾਲਜਾਂ ਵਿਚ ਸਿੱਖ ਬੱਚਿਆਂ ਨੂੰ ਮਿਲ ਰਹੇ ਬਿਹਤਰ ਮੌਕਿਆਂ ਦਾ ਵੀ ਜੀ.ਕੇ ਨੇ ਹਵਾਲਾ ਦਿੱਤਾ।
ਜੀ.ਕੇ. ਨੇ ਕਿਹਾ ਕਿ ਕਮੇਟੀ ਦੇ ਅਦਾਰੇ ਜੀ.ਟੀ.ਬੀ.ਆਈ.ਟੀ ’ਚ ਇਸ ਵਰੇ੍ਹ 600 ਸੀਟਾਂ ’ਤੇ ਹੋਏ ਦਾਖਲੇ ’ਚ ਜਿਥੇ ਜਨਰਲ ਸੀਟ 4 ਹਜਾਰ ਰੈਂਕ ਤਕ ਆਈ.ਪੀ ਯੂਨੀਵਰਸਿਟੀ ਵੱਲੋਂ ਕਾਉਂਸਿਲਿੰਗ ਰਾਹੀਂ ਭਰੀ ਗਈ ਹੈ ਉਥੇ ਸਿੱਖ ਸੀਟਾਂ 40 ਹਜਾਰ ਰੈਂਕ ਵਾਲੇ ਬੱਚੇ ਵੀ ਪ੍ਰਾਪਤ ਕਰਨ ਵਿਚ ਕਾਮਯਾਬ ਰਹੇ ਹਨ।ਇਸੇ ਤਰ੍ਹਾਂ ਹੀ ਦਿੱਲੀ ਯੂਨੀਵਰਸਿਟੀ ਦੇ ਚਾਰੋ ਖਾਲਸਾ ਕਾਲਜਾਂ ਵਿਚ ਸਿੱਖ ਬੱਚਿਆਂ ਨੂੰ ਜਨਰਲ ਕੈਟਿਗਰੀ ਦੇ ਮੁਕਾਬਲੇ ਕੱਟਆੱਫ ਵਿਚ ਵੱਖ-ਵੱਖ ਕੋਰਸਾ ’ਚ 10 ਤੋਂ 40 ਫੀਸਦੀ ਦੇ ਫਰਕ ਨਾਲ ਦਾਖਲ ਹੋਣ ਦਾ ਸੁੱਚਜਾ ਮੌਕਾ ਮਿਲਿਆ ਹੈ।ਪਿੱਛਲੇ 50 ਸਾਲ ਵਿਚ ਅਜਿਹਾ ਪਹਿਲੀ ਵਾਰ ਹੋਇਆ ਹੈ।
ਜੀ.ਕੇ ਨੇ ਕਿਹਾ ਕਿ ਅਸੀਂ ਸਰਕਾਰ ਦੇ ਦਰਬਾਰ ਆਪਣੇ ਲਈ ਕੁਝ ਲੈਣ ਨਹੀਂ ਜਾਂਦੇ ਸਗੋਂ ਕੌਮ ਦੇ ਭਵਿੱਖ ਨੂੰ ਉਸਾਰਨ ਦਾ ਟੀਚਾ ਲੈ ਕੇ ਨਿਰੰਤਰ ਲੱਗੇ ਹੋਏ ਹਾਂ। ਜਿਸ ਕਰਕੇ ਅੱਜ ਉਚ ਸਿੱਖਿਆ ਨੂੰ ਸਿੱਖੀ ਸੰਭਾਲ ਦੇ ਨਾਲ ਜੋੜ ਕੇ ਜੋ ਇਤਿਹਾਸਕ ਕਾਰਜ ਕਮੇਟੀ ਨੇ ਕੀਤਾ ਹੈ ਉਸ ਕਰਕੇ 2-3 ਸਾਲ ’ਚ ਬਦਲਾਵ ਦੀ ਲਹਿਰ ਚਲੇਗੀ। ਜੀ.ਕੇ ਨੇ ਜੱਸਾ ਸਿੰਘ ਆਹਲੂਵਾਲੀਆ ਦੀ ਤੀਜ਼ੀ ਜਨਮ ਸ਼ਤਾਬਦੀ ਅਤੇ ਗੁਰੂ ਨਾਨਕ ਦੇਵ ਜੀ ਦੇ 550ਵੇਂ ਪ੍ਰਕਾਸ਼ ਪੁਰਬ ਦੇ ਸਮਾਗਮਾਂ ਰਾਹੀਂ ਹਰ ਧਰਮ ਅਤੇ ਹਰ ਮੁਲਕ ਨੂੰ ਜੋੜਨ ਦੀ ਗੱਲ ਕਹੀ।
ਗੁਰੂ ਨਾਨਕ ਸਾਹਿਬ ਦੇ ਸਿਧਾਂਤ ਮਨੁੱਖਤਾ, ਬਰਾਬਰਤਾ ਅਤੇ ਧਰਮ ਨਿਰਪੇਖਤਾ ਨੂੰ ਘਰ-ਘਰ ਤਕ ਪਹੁੰਚਾਉਣ ਦਾ ਜੀ.ਕੇ. ਨੇ ਅਹਿਦ ਲਿਆ। ਕਾਜਲਪੁਰਾ ਵਿਖੇ ਸਿਕਲੀਘਰ ਸਿੱਖਾ ਦੇ ਘਰ ਅਤੇ ਗੁਰਦੁਆਰੇ ਨੂੰ ਪੱਕਾ ਬਣਾਉਣ ਦਾ ਐਲਾਨ ਕਰਦੇ ਹੋਏ ਜੀ.ਕੇ ਨੇ ਇਸ ਕਾਰਜ ’ਚ ਸਹਿਯੋਗ ਦੇ ਰਹੇ ਅਮਰੀਕਾ ਨਿਵਾਸੀ ਮਨਦੀਪ ਸਿੰਘ ਸੋਬਤੀ ਦਾ ਸਨਮਾਨ ਵੀ ਕੀਤਾ। ਜੀ.ਕੇ ਨੇ ਜੈਕਾਰਿਆਂ ਦੀ ਗੂੰਜ ’ਚ ਸੰਗਤਾਂ ਤੋਂ ਜੀ.ਐਸ.ਟੀ. ਨਾ ਲਗਾਉਣ ਸਬੰਧੀ ਮਤੇ ’ਤੇ ਵੀ ਪ੍ਰਵਾਨਗੀ ਲਈ।
ਸਿਰਸਾ ਨੇ ਸੰਗਤਾਂ ਨੂੰ ਤੋੜਨ ਦੀ ਥਾਂ ਜੋੜਨ ਵੱਲ ਤੁਰਨ ਦੀ ਪ੍ਰੇਰਣਾ ਕਰਦੇ ਹੋਏ ਗੁਰੂ ਤੇਗ ਬਹਾਦਰ ਸਾਹਿਬ ਵੱਲੋਂ ਦਿੱਤੀ ਗਈ ਸ਼ਹਾਦਤ ਨੂੰ ਧਰਮ ਦੀ ਸ਼ਹਾਦਤ ਦੀ ਥਾਂ ਮਨੁੱਖਤਾ ਲਈ ਸ਼ਹਾਦਤ ਦੱਸਿਆ।ਬੀਤੇ ਦਿਨੀਂ ਅੰਬਾਲਾ ਵਿਖੇ ਇੱਕ ਸਿੱਖ ਨਾਲ ਹੋਈ ਕੁੱਟਮਾਰ ਦੇ ਮਾਮਲੇ ’ਚ ਕਮੇਟੀ ਵੱਲੋਂ ਕੀਤੀ ਗਈ ਕਾਰਵਾਈ ਦੀ ਜਾਣਕਾਰੀ ਦਿੰਦੇ ਹੋਏ ਸਿਰਸਾ ਨੇ ਇਸ ਮਸਲੇ ਨੂੰ ਸੋਸ਼ਲ ਮੀਡੀਆ ’ਤੇ ਫਿਰਕੂ ਅਤੇ ਵੱਖਵਾਦੀ ਰੰਗ ਦੇਣ ਵਾਲੇ ਲੋਕਾਂ ਦੀ ਸੋਚ ਦੀ ਨਿਖੇਧੀ ਕੀਤੀ। ਸਿਰਸਾ ਨੇ ਕਿਹਾ ਕਿ ਗੁਰੂ ਗ੍ਰੰਥ ਸਾਹਿਬ ਸਾਰੀ ਮਨੁੱਖਤਾ ਲਈ ਹੈ, ਪਰ ਅਫਸੋਸ ਅਸੀਂ ਇਸ ਦੀ ਸਿੱਖਿਆਵਾਂ ’ਤੇ ਸਿਰਫ ਸਿੱਖਾਂ ਦਾ ਹੱਕ ਸਮਝ ਲਿਆ ਹੈ।ਇਸ ਸਬੰਧੀ ਸਿਰਸਾ ਨੇ ਅੰਬਾਲਾ ਦੇ ਐਸ.ਐਸ.ਪੀ ਨਾਲ ਹੋਈ ਘਟਨਾਕ੍ਰੰਮ ਸਬੰਧੀ ਜਾਣਕਾਰੀ ਦਿੰਦੇ ਹੋਏ ਸਿੱਖਾਂ ਨੂੰ ਆਪਣੀ ਸੋਚ ਦਾ ਦਾਇਰਾ ਵੱਡਾ ਕਰਨ ਦੀ ਅਪੀਲ ਕੀਤੀ। ਸਿਰਸਾ ਨੇ ਕੌਮੀ ਅਤੇ ਪੰਥਕ ਕਾਰਜਾਂ ਦੀ ਸੇਵਾ ਲਈ ਸੰਗਤਾਂ ਤੋਂ ਸਹਿਯੋਗ ਵੀ ਮੰਗਿਆ।
ਇਸ ਮੋਕੇ ਉਘੀ ਇਤਿਹਾਸਕਾਰ ਬੀਬੀ ਹਰਬੰਸ ਕੌਰ ਸਾਗੂ ਵੱਲੋਂ ਲਿਖਿਆ ਗਈਆਂ 2 ਕਿਤਾਬਾਂ ਦੀ ਘੁੰਡ ਚੁਕਾਈ ਕਮੇਟੀ ਪ੍ਰਬੰਧਕਾਂ ਵੱਲੋਂ ਕੀਤੀ ਗਈ। ਸਟੇਜ ਸਕੱਤਰ ਦੀ ਸੇਵਾ ਧਰਮ ਪ੍ਰਚਾਰ ਕਮੇਟੀ ਦੇ ਚੇਅਰਮੈਨ ਕੁਲਮੋਹਨ ਸਿੰਘ ਨੇ ਬਖੂਬੀ ਨਿਭਾਈ।ਗੁਰੂ ਹਰਿਕ੍ਰਿਸ਼ਨ ਪਬਲਿਕ ਸਕੂਲਾਂ ਵਿਖੇ 12ਵੀਂ ਜਮਾਤ ਦੇ ਟੌਪਰ ਵਿਦਿਆਰਥੀਆਂ ਦਾ ਇਸ ਮੌਕੇ ਗੋਲਡ ਮੈਡਲ ਦੇ ਕੇ ਸਨਮਾਨ ਕੀਤਾ ਗਿਆ। ਜਿਸ ਵਿਚ ਲੋਨੀ ਰੋਡ ਬ੍ਰਾਂਚ ਦੇ ਅਯੂਸ਼ (ਵਿਗਿਆਨ) ’ਚ 95.6 ਫੀਸਦੀ, ਬਸੰਤ ਵਿਹਾਰ ਬ੍ਰਾਂਚ ਦੇ ਜਪਤੇਗ ਸਿੰਘ (ਕਾੱਮਰਸ) ’ਚ 95 ਫੀਸਦੀ ਅਤੇ ਇੰਡੀਆ ਗੇਟ ਬ੍ਰਾਂਚ ਦੀ ਕੁਦਰਤ ਕੌਰ (ਆਰਟ) ’ਚ 92 ਫੀਸਦੀ ਸ਼ਾਮਿਲ ਹਨ।ਇਸ ਮੌਕੇ ਕਮੇਟੀ ਦੇ ਸਮੂਹ ਮੈਂਬਰਾਨ ਮੋਜੂਦ ਸਨ।