ਹੁਣ ਕਾਹਦੀ ਐ ਦੀਵਾਲੀ

ਹੁਣ ਕਾਹਦੀ ਐ ਦੀਵਾਲੀ
ਨਾ ਹਾਲੀ ਤੇ ਨਾ ਪਾਲੀ
ਕਿਸਾਨ ਕਰਜ਼ੇ `ਚ ਡੁੱਬਾ
ਹੋਇਆ ਸ਼ਾਹ ਵੀ ਖਾਲੀ ।

ਹੱਲ ਕੋਈ ‘ਰੰਮੀ’ ਦੱਸੋ
ਰਲ ਖੁਸ਼ੀਆਂ ਮਨਾਉਣ ਦੇ
ਮਿੱਟੀ ਦੇ ਦੀਵਿਆਂ ਨੂੰ
ਤੇਲ ਪਾ ਜਗਾਉਣ ਦੇ ।

ਜਾਂਚ ਹੁਣ ਭੁੱਲ ਬੈਠੇ
ਕੋਠੇ ਲਿੱਪਣ ਲਿਪਾਉਣ ਦੀ
ਤਾਂਘ ਵਿੱਚ ਬੈਠੇ ਰਹਿੰਦੇ
ਲੱਛਮੀ ਦੇ ਆਉਣ ਦੀ।

ਦੀਪਮਾਲਾ ਕਰੋ ਸਾਰੇ
ਦਿਲੀਂ ਪਿਆਰ ਰੁਸ਼ਨਾਉਣ ਦੇ
ਮਿੱਟੀ ਦੇ ਦੀਵਿਆਂ ਨੂੰ
ਤੇਲ ਪਾ ਜਗਾਉਣ ਦੇ ।

ਪ੍ਰਣ ਸਾਰੇ ਕਰੋ ਅੱਜ
ਲਗਾਈਏ ਰਲ ਰੁੱਖਾਂ ਨੂੰ
ਜ਼ਹਿਰੀ ਨੇ ਹਵਾਵਾਂ ਏਥੇ
ਸਤਿਕਾਰ ਦਿਓ ਕੁੱਖਾਂ ਨੂੰ
ਨਵੀਂ ਪੀੜੀ ਚੱਜ ਦੱਸੋ
ਰੁੱਸੇ ਪਿੱਤਰ ਮਨਾਉਣ ਦੇ।
ਮਿੱਟੀ ਦੇ ਦੀਵਿਆਂ ਨੂੰ
ਤੇਲ ਪਾ ਜਗਾਉਣ ਦੇ।

 
ਰਮਿੰਦਰ ਫਰੀਦਕੋਟੀ
3, ਫਰੈਂਡਜ਼ ਐਵੀਨਿੳੂ,
ਨਿੳੂ ਹਰਿੰਦਰਾ ਨਗਰ, ਫ਼ਰੀਦਕੋਟ।
ਮੋ : 98159-53929