ਡੇਰਾ ਮੁੱਖੀ ਨੂੰ ਸਜਾ ਲਈ 28 ਨੂੰ ਰੋਹਤਕ `ਚ ਬਣੇਗੀ ਆਰਜ਼ੀ ਸੀ.ਬੀ.ਆਈ ਅਦਾਲਤ

ਅੰਮ੍ਰਿਤਸਰ, 26 ਅਗਸਤ (ਪੰਜਾਬ ਪੋਸਟ ਬਿਊਰੋ) – ਪੰਚਕੁਲਾ ਦੀ ਸੀ.ਬੀ.ਅਦਾਲਤ ਵੱਲੋਂ ਸਾਧਵੀ ਸਰੀਰਕ ਸ਼ੋਸ਼ਣ ਮਾਮਲੇ `ਚ ਦੋਸ਼ੀ ਕਰਾਰ ਦਿੱਤੇ ਗਏ ਡੇਰਾ ਸਿਰਸਾ ਦੇ ਮੁੱਖੀ ਰਾਮ ਰਹੀਮ ਨੂੰ ਸਜਾ ਦੇਣ ਲਈ ਰੋਹਤਕ ਦੀ ਸੁਨਾਰੀਆ ਜੇਲ੍ਹ ਵਿੱਚ ਆਰਜੀ ਸੀ.ਬੀ.ਆਈ ਅਦਾਲਤ ਬਣਾਈ ਜਾਵੇਗੀ। ਪੰਜਾਬ ਹਰਿਆਣਾ ਹਾਈ ਕੋਰਟ ਵੱਲੋਂ ਇਹ ਆਦੇਸ਼ 25 ਅਗਸਤ ਨੂੰ ਪੰਚਕੁਲਾ ਵਿੱਚ ਹੋਈ ਹਿੰਸਾ ਨੂੰ ਦੇਖਦਿਆਂ ਜਾਰੀ ਕੀਤਾ ਗਿਆ ਹੈ। ਸੂਚਨਾ ਅਨੁਸਾਰ ਸੀ.ਬੀ.ਆਈ ਕੋਰਟ ਦੇ ਜੱਜ ਜਗਦੀਪ ਸਿੰਘ ਇਸ ਆਰਜੀ ਅਦਾਲਤ ਵਿੱਚ ਸਜਾਯਾਫਤਾ ਡੇਰਾ ਮੁੱਖੀ ਦੀ ਸਜਾ ਦਾ ਐਲਾਨ ਕਰਨਗੇ। ਜਿਕਰਯੋਗ ਹੈ ਕਿ ਇਸ ਤੋਂ ਪਹਿਲਾਂ ਇਹ ਖਬਰਾਂ ਆ ਰਹੀਆਂ ਸਨ ਕਿ ਡੇਰਾ ਮੁੱਖੀ ਦੀ ਸਜਾ ਲਈ ਵੀਡੀਓ ਕਾਂਨਫਰੰਸ ਕਰਵਾਈ ਜਾਵੇਗੀ ਪਰ ਪੰਜਾਬ ਹਰਿਆਣਾ ਹਾਈ ਕੋਰਟ ਦੇ ਹੁਕਮਾਂ `ਤੇ ਹੁਣ ਰੋਹਤਕ ਦੀ ਅਤੀ ਸੁਰੱਖਿਅਤ ਜੇਲ੍ਹ ਵਿੱਚ ਹੀ ਆਰਜੀ ਅਦਾਲਤ ਬਣਾ ਕੇ ਸਜਾ ਦੀ ਕਾਰਵਾਈ ਨੂੰ ਅੰਜ਼ਾਮ ਦਿੱਤਾ ਜਾਵੇਗਾ।