ਸਾਦੇ ਢੰਗ ਨਾਲ ਵਿਆਹ ਕਰਵਾ ਕੇ ਕਾਇਮ ਕੀਤੀ ਮਿਸਾਲ

ਸੰਦੌੜ, 8 ਨਵੰਬਰ (ਪੰਜਾਬ ਪੋਸਟ- ਹਰਮਿੰਦਰ ਸਿੰਘ ਭੱਟ) – ਨਜਦੀਕੀ ਪਿੰਡ ਫੌਜੇਵਾਲ ਦੀ ਨਾਮਵਰ ਸਖਸੀਅਤ ਸਵ. ਦਵਿੰਦਰ ਸਿੰਘ ਗੋਰਖਾ ਦੇ ਸਪੁੱਤਰ ਮਨਵੀਰ ਸਿੰਘ ਅਤੇ ਕਪੂਰਥਲਾ ਦੀ ਰਹਿਣ ਵਾਲੀ ਅੰਮ੍ਰਿਤਧਾਰੀ ਲੜਕੀ ਕੁਲਬੀਰ ਕੌਰ ਨੇ ਬਿਲਕੁੱਲ ਹੀ ਸਾਦੇ ਢੰਗ ਨਾਲ ਬਿਨ੍ਹਾਂ ਕਿਸੇ ਰੀਤੀ ਰਿਵਾਜਾਂ ਤੋਂ ਵਿਆਹ ਕਰਵਾ ਕੇ ਹੋਰਨਾਂ ਲਈ ਇਕ ਮਿਸਾਲ ਪੈਦਾ ਕੀਤੀ ਹੈ।ਤੈਅ ਸਮੇਂ ਮੁਤਾਬਿਕ ਬਰਾਤ ਦੀ ਹੋਈ ਰਵਾਨਗੀ ਕੀਤੀ ਗਈ ਅਤੇ ਗੁਰ ਮਰਿਯਾਦਾ ਅਨੁਸਾਰ ਹੋਏ ਆਨੰਦ ਕਾਰਜ ਤੋਂ ਬਾਅਦ ਕਿਸੇ ਕਿਸਮ ਦਾ ਗੀਤ ਸੰਗੀਤ ਦਾ ਪ੍ਰੋਗਰਾਮ ਨਹੀਂ ਸੀ, ਜਦਕਿ ਦੁਪਹਿਰ ਵੇਲੇ ਇਕ ਘੰਟਾ ਕੌਮ ਦੇ ਨਾਮੀਂ ਕਥਾਵਾਚਕ ਭਾਈ ਹਰਜਿੰਦਰ ਸਿੰਘ ਮਾਝੀ ਨੇ ਕਥਾ ਕੀਤੀ।ਭਾਈ ਮਾਝੀ ਨੇ ਕਿਹਾ ਕਿ ਅੱਜ ਦੇ ਸਮੇਂ ਵਿਚ ਅਜਿਹੇ ਵਿਆਹਾਂ ਤੋਂ ਸਾਨੂੰ ਸਬਕ ਸਿੱਖਣ ਦੀ ਲੋੜ ਹੈ।ਉਨ੍ਹਾਂ ਕਿਹਾ ਕਿ ਜਿਸ ਤਰਾਂ ਅੱਜ ਪੰਜਾਬ ਅੰਦਰ ਲੋਕਾਂ ਵੱਲੋਂ ਵਿਆਹਾਂ ਤੇ ਲੱਖਾਂ ਰੁਪਏ ਅੰਨੇਵਾਹ ਖਰਚੇ ਜਾ ਰਹੇ ਹਨ।ਉਸ ਨਾਲ ਜਿਥੇ ਖੁਦ ਉਹ ਲੋਕ ਆਰਥਿਕ ਤੌਰ `ਤੇ ਕਮਜੋਰ ਹੁੰਦੇ ਹਨ ਉਥੇ ਹੀ ਉਨ੍ਹਾਂ ਨੂੰ ਦੇਖ ਕੇ ਹੋਰ ਵੀ ਲੋਕ ਗਲਤ ਰਾਹ ਪੈ ਕੇ ਪੱਟੇ ਜਾ ਰਹੇ ਹਨ।ਉਨ੍ਹਾਂ ਦੋਵਾਂ ਹੀ ਪਰਿਵਾਰਾਂ ਵੱਲੋਂ ਕੀਤੇ ਗਏ ਇਸ ਉਪਰਾਲੇ ਦੀ ਸ਼ਲਾਘਾ ਕਰਦੇ ਹੋਏ ਦੋਵੇਂ ਬੱਚਿਆਂ ਨੂੰ ਅਸ਼ਰੀਵਾਦ ਦਿੱਤਾ।ਲੜਕੀ ਪਰਿਵਾਰ ਵਾਲਿਆਂ ਨੇ ਲੜਕੇ ਨੂੰ ਇਕ ਸਿਰੀ ਸਾਹਿਬ ਅਤੇ ਗੁਟਕਾ ਸਾਹਿਬ ਦਿੱਤਾ ਗਿਆ।ਮਿਲਣੀ ਵਕਤ ਵੀ ਸਿਰਫ ਇਕ ਹੀ ਮਿਲਣੀ ਕਰਵਾਈ ਗਈ ਜੋ ਕਿ ਸਿਰਫ ਹਾਰ ਦੇ ਨਾਲ ਕਰਵਾਈ ਗਈ।