ਪਿੰਡ ਆਪਣੇ ਫੇਰਾ ਪਾ ਆਵਾਂ

ਪੀਜ਼ੇ ਖਾ ਮਨ ਅੱਕਿਆ ਏ, ਸਾਗ ਤੌੜੀ ਦਾ ਖਾ ਆਵਾਂ।
ਜੱਭ ਛੱਡਾਂ ਇੰਨਾਂ ਦੌੜਾਂ ਦਾ, ਪਿਪਲੀ ਪੀਂਘ ਝੁਆ ਆਵਾਂ।
ਸੱਥ `ਚ ਬੈਠੇ ਬਾਬਿਆਂ ਨਾਲ, ਬਾਜ਼ੀ ਤਾਸ਼ ਦੀ ਲਾ ਆਵਾਂ।
ਸ਼ਹਿਰੀ ਬੈਠੇ ਜੀਅ ਕਰਦਾ, ਪਿੰਡ ਆਪਣੇ ਫੇਰਾ ਪਾ ਆਵਾਂ।

ਤੁਰਾਂ ਫੜ ਕੇ ਉਂਗਲੀ ਬਾਪੂ ਦੀ, ਮੈਂ ਡਿੱਗਾਂ ਤੇ ਮੈਨੂੰ ਚੱਕੇ ਉਹ।
ਫਿਰ ਗਦੇੜੀ ਚੜ ਜਾਵਾਂ, ਨਾ ਰੰਮੀ ਉੱਤੇ ਅੱਕੇ ਉਹ।
ਜਾ ਬੈਠ ਵਿੱਚ ਸ਼ਰੀਕੇ ਦੇ, ਉਨਾਂ ਦਾ ਮਾਣ  ਵਧਾ ਆਵਾਂ।
ਸ਼ਹਿਰੀ ਬੈਠੇ ਜੀਅ ਕਰਦਾ, ਪਿੰਡ ਆਪਣੇ ਫੇਰਾ ਪਾ ਆਵਾਂ।

ਦਿਸੇ ਜੋੜੀ ਨਗੌਰੀ ਬਲਦਾਂ ਦੀ, ਹਰਿਆਲੀ ਮਨ ਨੂੰ ਭਾ ਜਾਵੇ।
ਕੋਇਲ ਦੀ ਮਿੱਠੀ ਕੂਕ ਸੁਣੇ, ਸੁਖ ਦਾ ਫਿਰ ਮੈਨੂੰ ਸਾਹ ਆਵੇ।
ਮੰਜੇ ਜੋੜ ਕੇ ਲਾ ਸਪੀਕਰ, ਗੀਤ ਰਸੀਲਾ ਲਾ ਆਵਾਂ।
ਸ਼ਹਿਰੀ ਬੈਠੇ ਜੀ ਕਰਦਾ, ਪਿੰਡ ਆਪਣੇ ਫੇਰਾ ਪਾ ਆਵਾਂ।

 
ਰਮਿੰਦਰ ਫਰੀਦਕੋਟੀ
3, ਫਰੈਂਡਜ਼ ਐਵੀਨਿਊ,
ਨਿਊ ਹਰਿੰਦਰਾ ਨਗਰ, ਫ਼ਰੀਦਕੋਟ।
ਮੋਬਾ : 98159-53929