ਚੋਰੀ ਦੇ 10 ਮੋਟਰ ਮੋਟਰਸਾਈਕਲਾਂ ਸਮੇਤ ਤਿੰਨ ਕਾਬੂ

ਜਾਅਲੀ ਆਰ.ਸੀ ਤੇ ਡੀ.ਟੀ.ਓ ਦੀਆਂ ਜਾਅਲ਼ੀ ਮੋਹਰਾਂ ਬਰਾਮਦ
ਅੰਮ੍ਰਿਤਸਰ, 7 ਫਰਵਰੀ (ਪੰਜਾਬ ਪੋਸਟ- ਸੁਖਬੀਰ ਸਿੰਘ) – ਵਾਹਣ ਚੋਰੀ ਕਰਨ ਉਪਰੰਤ ਉਨਾਂ ਦੀਆਂ ਨੰਬਰ ਪਲੇਟਾਂ ਬਦਲ ਕੇ ਜਾਅਲੀ ਆਰ.ਸੀ ਤਿਆਰ ਕਰ ਕੇ ਵਾਹਣ ਅੱਗੇ ਭੋਲੇ ਭਾਲੇ ਲੋਕਾਂ ਨੂੰ ਵੇਚਣ ਵਾਲੇ ਗ੍ਰੋਹ ਦੇ ਤਿੰਨ ਮੈਂਬਰਾਂ ਨੂੰ ਗ੍ਰਿਫਤਾਰ ਕੀਤੇ ਜਾਣ ਦੀ ਸੂਚਨਾ ਹੈ।ਪ੍ਰੈਸ ਨੂੰ ਜਾਰੀ ਬਿਆਨ ਵਿੱਚ ਜਾਣਕਾਰੀ ਦਿੰਦਿਆਂ ਥਾਣਾ ਸਦਰ ਮੁਖੀ ਇੰਸਪੈਕਟਰ ਸੁਖਬੀਰ ਸਿੰਘ ਨੇ ਦੱਸਿਆ ਕਿ ਪੁਲਿਸ ਚੌਕੀ ਇੰਚਾਰਜ ਏ.ਐਸ.ਆਈ ਗੁਰਜੀਤ ਸਿੰਘ ਨੇ ਮਿਲੀ ਇਤਲਾਹ ਦੇ ਅਧਾਰ `ਤੇ ਉਕਤ ਗ੍ਰੋਹ ਦੇ ਤਿੰਨ ਮੈਂਬਰਾਂ ਤੇਜਿੰਦਰ ਸਿੰਘ ਉਰਫ ਸੋਨੂ ਪੁੱਤਰ ਰਘਬੀਰ ਸਿੰਘ ਅਤੇ ਕੰਵਲਜੀਤ ਕੌਰ ਪਤਨੀ ਤੇਜਿੰਦਰ ਸਿੰਘ ਵਾਸੀਆਨ ਪਿੰਡ ਬੋਪਾਰਾਏ ਬਾਜ ਸਿੰਘ ਥਾਣਾ ਲੋਪੋਕੇ ਹਾਲ ਕਿਰਾਏਦਾਰ ਲੱਕੀ ਵਾਸੀ ਬਾਬਾ ਬੁੱਢਾ ਐਵਨਿਊ ਨਿਊ ਅੰਮ੍ਰਿਤਸਰ, ਜਤਿੰਦਰ ਸਿੰਘ ਪੁੱਤਰ ਮੰਗਲ ਸਿੰਘ ਵਾਸੀ ਮੁਹੱਲਾ ਮੀਰ ਸ਼ਾਹ ਮਜੀਠਾ ਰੋਡ ਅੰਮ੍ਰਿਤਸਰ ਨੂੰ ਗ੍ਰਿਫਤਾਰ ਕਰ ਕੇ ਉਨਾਂ ਪਾਸੋਂ ਚੋਰੀ ਦੇ 10 ਮੋਟਰਸਾਈਕਲ 7 ਜਾਅਲੀ ਤਿਆਰ ਕੀਤੀਆਂ ਆਰ.ਸੀ ਅਤੇ ਡੀ.ਟੀ.ਓ ਦਫਤਰ ਅੰਮ੍ਰਿਤਸਰ ਨਾਲ ਸਬੰਧਤ ਜਾਅਲੀ ਤਿਆਰ ਕੀਤੀਆਂ 21 ਮੋਹਰਾਂ ਬਰਾਮਦ ਕੀਤੀਆਂ ਗਈਆਂ ਹਨ।ਉਨਾਂ ਕਿਹਾ ਕਿ ਕਥਿਤ ਦੋਸ਼ੀ ਤੇਜਿੰਦਰ ਸਿੰਘ ਉਰਫ ਸੋਨੂ ਖਿਲਾਫ ਪਹਿਲਾਂ ਵੀ ਅਜਿਹੀਆਂ ਵਾਰਦਾਤਾਂ ਕਰਨ ਸਬੰਧੀ ਵੱਖ-ਵੱਖ ਥਾਣਿਆਂ ਵਿੱਚ ਮੁਕੱਦਮੇ ਦਰਜ ਹਨ ਅਤੇ ਉਹ ਕਈ ਕੇਸਾਂ ਵਿੱਚ ਭਗੌੜਾ ਚਲ਼ਿਆ ਆ ਰਿਹਾ ਹੈ।ਉਨਾਂ ਆਖਿਆ ਕਿ ਕਥਿਤ ਦੋਸ਼ੀਆਂ ਖਿਲਾਫ ਪੁਲਿਸ ਵਲੋਂ ਥਾਣਾ ਸਦਰ ਵਿਖੇ ਆਈ.ਪੀ.ਸੀ ਦੀ ਧਾਰਾ 379, 411, 414, 467, 468, 471, 473, 120-ਬੀ ਤਹਿਤ ਕੇਸ ਨੰਬਰ 29 ਦਰਜ ਕਰਕੇ ਉਨਾਂ ਦੇ ਹੋਰ ਸਾਥੀਆਂ ਦੀ ਭਾਲ ਜਾਰੀ ਹੈ।