ਅਕਾਲੀ ਵਰਕਰਾਂ ਨੂੰ ਲਾਮਬੰਦ ਕਰਨ ਲਈ ਬ੍ਰਹਮਪੁਰਾ ਵਲੋਂ ਨੌਰੰਗਾਬਾਦ ਵਿਖੇ ਮੀਟਿੰਗ 5 ਦਸੰਬਰ ਨੂੰ

ਤਰਨ ਤਾਰਨ, 1 ਦਸੰਬਰ (ਪੰਜਾਬ ਪੋਸਟ ਬਿਊਰੋ) – ਸ਼੍ਰੋਮਣੀ ਅਕਾਲੀ ਦਲ ਦੇ ਸੀਨੀਅਰ ਲੀਡਰ ਅਤੇ ਸੰਸਦ ਮੈਂਬਰ ਜਥੇਦਾਰ ਰਣਜੀਤ ਸਿੰਘ ਬ੍ਰਹਮਪੁਰਾ 5 ਦਸੰਬਰ ਨੂੰ ਗੁਰਦੁਆਰਾ ਬਾਬਾ ਬੀਰ ਸਿੰਘ ਜੀ ਨੌਰੰਗਾਬਾਦ ਖਡੂਰ ਸਾਹਿਬ ਵਿਖੇ ਅਕਾਲੀ ਵਰਕਰਾਂ ਨੂੰ ਲਾਮਬੰਦ ਕਰਨ ਲਈ ਮੀਟਿੰਗ ਨੂੰ ਸੰਬੋਧਨ ਕਰਨਗੇ।
ਜਾਰੀ ਬਿਆਨ `ਚ ਸਾਬਕਾ ਵਿਧਾਇਕ ਰਵਿੰਦਰ ਸਿੰਘ ਬ੍ਰਹਮਪੁਰਾ ਨੇ ਕਿਹਾ ਕਿ ਇਹ ਮੀਟਿੰਗ “ਮਾਝੇ ਦੇ ਜਰਨੈਲ ਜਥੇਦਾਰ ਰਣਜੀਤ ਸਿੰਘ ਬ੍ਰਹਮਪੁਰਾ” ਵਲੋਂ ਪਿਛਲੇ ਦਿਨਾਂ `ਚ ਉਠਾਏ ਗਏ ਗੰਭੀਰ ਮੁੱਦਿਆਂ ਕੋਟਕਪੁਰਾ, ਬਿਹਬਲ ਕਲਾਂ ਅਤੇ ਬਰਗਾੜੀ ਕਾਂਡ, ਜੀਜੇ ਸਾਲੇ ਦੇ ਇਸ਼ਾਰੇ `ਤੇ ਪਖੰਡੀ ਸਾਧ ਨੂੰ ਮੁਆਫ਼ ਕਰਨ ਆਦਿ ਸਬੰਧੀ ਹੈ।
ਇਸ ਮੀਟਿੰਗ ਦੌਰਾਨ ਜਥੇਦਾਰ ਬ੍ਰਹਮਪੁਰਾ ਸ਼੍ਰੋਮਣੀ ਅਕਾਲੀ ਦਲ ਨੂੰ ਮਜ਼ਬੂਤ ਕਰਨ ਲਈ ਹਲਕਾ ਖਡੂਰ ਸਾਹਿਬ ਦੇ 11 ਪਿੰਡਾਂ ਜਿਨ੍ਹਾਂ ਵਿਚ ਨੌਰੰਗਾਬਾਦ, ਮੱਲਮੋਹਰੀ, ਰੈਸੀਆਣਾ, ਸ਼ੇਖਚੱਕ, ਲਾਲਪੁਰਾ, ਜਵੰਦਾ ਖੁੁਰਦ, ਅਲਾਵਲਪੁਰ, ਸੰਘੇ, ਝੰਡੇਰ, ਬੱਚੜੇ ਅਤੇ ਦੁਗਲਵਾਲਾ ਦੇ ਅਕਾਲੀ ਵਰਕਰਾਂ ਨਾਲ ਆਪਣੇ ਦਿਲ ਦੀਆਂ ਭਾਵਨਾਵਾਂ ਸਾਂਝੀਆਂ ਕਰਨਗੇ।