ਪੱਲਿਓਂ ਖਰਚੇ ਕਰ ਕੇ ਕਿਤਾਬਾਂ ਦੀ ਢੋਆ-ਢੁਆਈ ਕਰ ਰਹੇ ਅਧਿਆਪਕ ਪ੍ਰੇਸ਼ਾਨ- ਕੀਤੀ ਨਾਅਰੇਬਾਜ਼ੀ

ਭੀਖੀ/ਮਾਨਸਾ, 3 ਅਪ੍ਰੈਲ (ਪੰਜਾਬ ਪੋਸਟ – ਕਮਲ ਜ਼ਿੰਦਲ) – ਵਿਦਿਅਕ ਸ਼ੈਸ਼ਨ ਦੇ ਪਹਿਲੇ ਦਿਨ ਹੀ ਸਿੱਖਿਆ ਵਿਭਾਗ ਨੇ ਮਾਨਸਾ ਜਿਲ੍ਹੇ ਦੇ ਸਰਕਾਰੀ ਸਕੂਲਾਂ ਦਾ ਜਲੂਸ ਕੱਢ ਕੇ ਰੱਖ ਦਿੱਤਾ।ਵਿਦਿਆਰਥੀਆਂ ਲਈ ਨਾ ਵਰਦੀਆਂ ਆਈਆਂ, ਨਾ ਪੂਰੀਆ ਕਿਤਾਬਾਂ ਨਾ ਜਮਾਤਾਂ ਦੇ ਰਜਿਸਟਰ, ਨਾ ਚਾਕ, ਤੱਪੜ, ਨਾ ਹੀ ਹੋਰ ਲੋੜੀਦੀ ਸਟੇਸ਼ਨਰੀ, ਬਲਾਕ ਦਫਤਰਾਂ ਨੇ ਕਿਤਾਬਾਂ ਸਕੂਲਾਂ ਤੱਕ ਪਹੁੰਚਾਉਣ ਤੋਂ ਕੀਤੇ ਹੱਥ ਖੜ੍ਹੇ ਕਰਨ ਤੋਂ ਬਾਅਦ ਅਧਿਆਪਕ ਕਈ ਦਿਨਾਂ ਤੋਂ ਸਕੂਲ ਛੱਡ ਕੇ ਅਪਣੇ ਪੱਲਿਓ ਖਰਚਿਆਂ ਨਾਲ ਕਿਤਾਬਾਂ ਦੀ ਢੋਆ-ਢੁਆਈ ਕਰ ਰਹੇ ਹਨ।ਇਨ੍ਹਾਂ ਮਸਲਿਆਂ ਦੇ ਰੋਸ ਵਜੋਂ  ਜਿਲ੍ਹਾ ਅਧਿਆਪਕ ਸੰਘਰਸ਼ ਕਮੇਟੀ ਮਾਨਸਾ ਦੀ ਹੋਈ ਮੀਟਿੰਗ ਦੌਰਾਨ ਫੈਸਲਾ ਕੀਤਾ ਗਿਆ ਹੈ ਕਿ ਜੇਕਰ ਜਲਦੀ ਇਹਨਾਂ ਮਸਲਿਆਂ ਦਾ ਹੱਲ ਨਾ ਕੀਤਾ ਗਿਆ ਤਾਂ ਡੀ.ਈ.ਓ ਦਫਤਰ ਦਾ ਘਿਰਾਓ ਕੀਤਾ ਜਾਵੇਗਾ।
ਮਿਲੀ ਜਾਣਕਾਰੀ ਅਨੁਸਾਰ ਨਵਾਂ ਫਰਨੀਚਰ ਵੀ ਗਿਣਤੀ ਦੇ ਸਕੂਲਾਂ ਨੂੰ ਨਸੀਬ ਹੋਇਆ ਹੈ,ਦੂਜੇ ਬੰਨੇ ਰਿਪੇਅਰ ਗਰਾਂਟ, ਸਕੂਲ ਗਰਾਂਟ, ਟੀ.ਐਲ.ਐਮ ਬੰਦ ਹੋਣ ਕਾਰਨ ਸਾਰੇ ਖਰਚੇ ਅਪਣੀਆਂ ਜੇਬਾਂ ਚੋ ਕਰਨ ਲਈ ਮਜਬੂਰ ਹਨ। ਬਿਜਲੀ ਦੇ ਬਿਲਾਂ ਦੀ ਪੇਮੈਂਟ ਵੀ ਸਮੇਂ ਅਨੁਸਾਰ, ਨਹੀ ਦਿਤੀ ਜਾਂਦੀ ਜਿਸ ਕਾਰਨ ਅਧਿਆਪਕਾਂ ਨੂੰ ਇਹ ਬਿਲ ਪਹਿਲਾ ਅਧਿਆਪਕਾਂ ਨੂੰ ਤਾਰਨੇ ਪੈਂਦੇ ਹਨ, ਕਈ ਥਾਵਾਂ `ਤੇ ਪੰਚਾਇਤਾਂ ਵੀ ਬਿੱਲ ਭਰ ਰਹੀਆਂ ਹਨ, ਸਕੂਲਾਂ ਚ ਪੱਕੇ ਸਫਾਈ ਸੇਵਕ ਨਾ ਹੋਣ ਕਾਰਨ ਅਤੇ ਸਿੱਖਿਆ ਵਿਭਾਗ ਵਲਂੋ ਕੋਈ ਗਰਾਂਟ ਨਾ ਮਿਲਣ ਕਰਕੇ ਆਧਿਆਪਕ ਇਹ ਖਰਚੇ ਵੀ ਅਪਣੀਆਂ ਜੇਬਾਂ ਵਿੱਚੋ ਕਰ ਰਹੇ ਹਨ।ਆਗੂਆਂ ਤੋ ਮਿਲੀ ਜਾਣਕਾਰੀ ਅਨੁਸਾਰ ਪਹਿਲੀ ਜਮਾਤ `ਚ ਸਿਰਫ ਪੰਜਾਬੀ ਦੀ ਕਿਤਾਬ ਆਈ ਹੈ, ਅੰਗਰੇਜ਼ੀ, ਹਿਸਾਬ ਨਹੀ ਆਇਆ, ਤੀਜੀ ਦੀ ਅੰਗਰੇਜ਼ੀ ਅਤੇ ਚੋਥੀ ਜਮਾਤ ਦੀ ਅੰਗਰੇਜ਼ੀ, ਵਾਤਾਵਰਣ ਸਿੱਖਿਆ ਨਹੀ ਆਈ, ਇਨ੍ਹਾਂ ਕਿਤਾਬਾਂ ਲਈ ਸਕੂਲ ਛੱਡ ਅਧਿਆਪਕਾਂ ਨੂੰ ਦੁਬਾਰਾ ਦੁਬਾਰਾ ਫਿਰ ਗੇੜੇ ਲਾਉਣੇ ਪੈਣਗੇ
     ਸੰਘਰਸ਼ ਕਮੇਟੀ ਦੇ ਆਗੂਆਂ ਕਰਮਜੀਤ ਤਾਮਕੋਟ, ਗਰਪਿਆਰ ਕੋਟਲੀ, ਨਿਤਿੰਨ ਸੋਢੀ, ਗੁਰਜੀਤ ਲਾਲਿਆਂਵਾਲੀ, ਸੁਖਵੀਰ ਗਿੱਲ, ਰਜਿੰਦਰ ਸਿੰਘ, ਧਰਮਿੰਦਰ ਸਿੰਘ, ਦਰਸ਼ਨ ਅਲੀਸ਼ੇਰ, ਅਜੈਬ ਆਲੀਸ਼ੇਰ, ਗੁਰਜੀਤ ਸਿੰਘ ਤਾਮਕੋਟ, ਤਰਪਿੰਦਰ ਸਿੰਘ ਸਮਾਓ, ਦਮਨਜੀਤ ਸਿੰਘ, ਬੂਟਾ ਸਿੰਘ ਭੁਪਾਲ, ਸੰਦੀਪ ਢੰਡ, ਸੁਰਜੀਤ ਰਾਏਪੁਰ ਨੇ ਮੀਟਿੰਗ ਨੂੰ ਸੰਬੋਧਨ ਕਰਦਿਆਂ ਕਿਹਾ ਕਿ ਇੱਕ ਪਾਸੇ ਸਿੱਖਿਆ ਵਿਭਾਗ ਆਪਣੇ ਲੋਗੋ ਰਾਹੀਂ ਸੋਹਣੀਆਂ ਵਰਦੀਆਂ ਦੇ ਨਮੂਨੇ ਦਿਖਾ ਰਿਹਾ ਹੈ।ਪਰ ਪਿਛਲੇ ਲੰਮੇ ਸਮੇਂ ਤੋਂ ਅਜੇ ਤੱਕ ਵਰਦੀਆਂ ਨਹੀਂ ਆਈਆ।ਜਿਸ ਕਾਰਨ ਜਿਲ੍ਹੇ ਭਰ ਵਿੱਚ ਵੱਡੀ ਪੱਧਰ `ਤੇ ਸਰਕਾਰੀ ਸਕੂਲਾਂ ਦੇ ਦਾਖਲੇ ਪ੍ਰਭਾਵਿਤ ਹੋ ਰਹੇ ਹਨ।
ਉਧਰ ਇੱਕ ਵੱਖਰੇ ਪ੍ਰੈਸ ਨੋਟ ਵਿੱਚ ਨਰਿੰਦਰ ਮਾਖਾ, ਗੁਰਦਾਸ ਬਾਜੇਵਾਲਾ, ਵਿਜੇ ਬੁਢਲਾਡਾ ਗੁਰਮੇਲ ਬੋੜਾਵਾਲ, ਗਰਮੇਲ ਬਰ੍ਹੇ, ਰਾਜੇਸ਼ ਬੁਢਲਾਡਾ, ਖੁਸ਼ਵਿੰਦਰ ਬਰਾੜ, ਹਰਪਾਲ ਕੌਰ, ਇੰਦਰਜੀਤ ਡੇਲੂਆਣਾ, ਅਮੋਲਕ ਡੇਲੂਆਣਾ, ਰਾਜਦੀਪ ਬਰੇਟਾ, ਜਗਤਾਰ ਝੱਬਰ, ਜੋਗਿਦਰ ਵਰੇ, ਅੰਮ੍ਰਿਤਪਾਲ ਮਾਨਸਾ ਨੇ ਪੰਜਾਬ ਸਰਕਾਰ ਅਤੇ ਸਿੱਖਿਆ ਵਿਭਾਗ ਤੋ ਮੰਗ ਕੀਤੀ ਹੈ ਕਿ ਸਕੂਲਾਂ ਦੇ ਸਾਰੇ ਮਸਲੇ ਹੱਲ ਕੀਤੇ ਜਾਣ, ਰਹਿੰਦੀਆ ਕਿਤਾਬਾਂ ਭੇਜੀਆ ਜਾਣ ਅਤੇ ਪਿਛਲੇ ਸਮੇਂ ਤੋ ਬੰਦ ਪਈਆਂ ਗਰਾਂਟਾ ਨੂੰ ਜਾਰੀ ਕੀਤਾ ਜਾਵੇ।ਆਗੂਆਂ ਨੇ ਕਿਹਾ ਕਿ ਇਕ ਪਾਸੇ ਅਧਿਆਪਕ ਅਪਣੇ ਪੱਲਿਓ ਜਾਂ ਫਿਰ ਦਾਨੀ ਸੱਜਣਾਂ ਨੂੰ ਅਪੀਲਾਂ ਕਰਕੇ ਲਏ ਫੰਡ ਕਾਰਨ ਸਕੂਲਾਂ ਨੂੰ ਚਮਕਾ ਰਿਹਾ ਹੈ।ਪਰ ਵਿਭਾਗ ਮੁਢਲੀਆ ਸਹੂਲਤਾਂ ਤੋਂ ਵੀ ਹੱਥ ਪਿਛੇ ਖਿੱਚ ਰਿਹਾ ਹੈ, ਵਰਦੀਆਂ ਅਤੇ ਹੋਰ  ਮਸਲਿਆਂ ਤੇ ਵੀ ਗੰਭੀਰ ਨਹੀਂ।