Punjab Post Daily Online Newspaper & Print Media
ਬਾਣੀ ਪੜ੍ਹ ਕੇ ਅਮਲ ਕਮਾਈਏ,
ਗੁਰੂ ਰਵੀਦਾਸ ਦੇ ਬਚਨ ਪੁਗਾਈਏ,
ਸਾਰੇ ਬਣਦੇ ਫਰਜ਼ ਨਿਭਾਈਏ,
ਦੇਸ਼ ਨੂੰ ਬੇਗ਼ਮਪੁਰਾ ਬਣਾਈਏ।
ਹੁੰਦੀ ਕਿਰਤ ਦੀ ਲੁੱਟ ਬਚਾਈਏ,
ਚੰਮ ਨੂੰ ਕੰਮ ਨਾਲੋਂ ਵਡਿਆਈਏ,
ਹੱਕ ਪਰਾਇਆ ਕਦੇ ਨਾ ਖਾਈਏ,
ਦੇਸ਼ ਨੂੰ ਬੇਗ਼ਮਪੁਰਾ ਬਣਾਈਏ।
ਲੱਗੀ ਫਿਰਕੂ ਅੱਗ ਬੁਝਾਈਏ,
ਜਾਤ-ਪਾਤ ਦਾ ਕੋਹੜ ਮੁਕਾਈਏ,
ਗਲ਼ ਲਾ ਸਭ ਨੂੰ ਠੰਢ ਵਰਤਾਈਏ,
ਦੇਸ਼ ਨੂੰ ਬੇਗ਼ਮਪੁਰਾ ਬਣਾਈਏ।
ਝੂਠ ਨੂੰ ਭੁੱਲ ਕੇ ਨਾ ਅਪਣਾਈਏ,
ਸ਼ੱਚ ਦੇ ਸੂਰਜ ਨੂੰ ਚਮਕਾਈਏ,
ਲੋੜ ਪਏ ਤਾਂ ਖੁਦ ਬਲ਼ ਜਾਈਏ,
ਦੇਸ਼ ਨੂੰ ਬੇਗ਼ਮਪੁਰਾ ਬਣਾਈਏ।
`ਰੰਗੀਲਪੁਰੇ` `ਚ ਗੱਲ ਸਮਝਾਈਏ,
ਕਿਸੇ ਦੀ ਗਲ਼ਤੀ ਨਾ ਦੁਹਰਾਈਏ,
ਆਪਣੇ ਆਪ ਨੂੰ ਰਾਹੇ ਪਾਈਏ,
ਦੇਸ਼ ਨੂੰ ਬੇਗ਼ਮਪੁਰਾ ਬਣਾਈਏ।
ਬਾਣੀ ਪੜ੍ਹ ਕੇ ਅਮਲ ਕਮਾਈਏ,
ਗੁਰੂ ਰਵੀਦਾਸ ਦੇ ਬਚਨ ਪੁਗਾਈਏ।
ਗੁਰਪ੍ਰੀਤ ਸਿੰਘ ਰੰਗੀਲਪੁਰ
ਮੋ – 9855207071
