ਪੰਜਾਬ ਸਰਕਾਰ ਦੇ ਆਦੇਸ਼ਾਂ ਅਨੁਸਾਰ 31 ਮਾਰਚ ਤੱਕ ਜਾਰੀ ਰਹੇਗਾ ਜਨਤਾ ਕਰਫਿਊ -ਡੀ.ਸੀ

ਕਰਿਆਨਾ, ਦਵਾਈਆਂ, ਫਲ ਅਤੇ ਸਬਜ਼ੀਆਂ ਦੀਆਂ ਦੁਕਾਨਾਂ ਖੋਲਣ ਦੀ ਕੀਤੀ ਜਾਵੇਗੀ ਵਿਵਸਥਾ

ਅੰਮ੍ਰਿਤਸਰ, 22 ਮਾਰਚ (ਪੰਜਾਬ ਪੋਸਟ – ਸੁਖਬੀਰ ਸਿੰਘ) – ਨੋਵਲ ਕੋਰੋਨਾ ਵਾਇਰਸ (ਕੋਵਿਡ-19) ਦੇ ਵਿਸਥਾਰ ਨੂੰ ਰੋਕਣ ਲਈ ਅਤੇ ਅੱਜ ਪ੍ਰਧਾਨ ਮੰਤਰੀ ਵੱਲੋਂ ਅੇਲਾਨੇ ਜਨਤਾ ਕਰਫਿੳੂ ਨੂੰ ਦਿੱਤੇ ਗਏ ਸਹਿਯੋਗ ਲਈ ਧੰਨਵਾਦ ਕਰਦੇ ਡਿਪਟੀ ਕਮਿਸ਼ਨਰ ਸ਼ਿਵਦੁਲਾਰ ਸਿੰਘ ਢਿਲੋਂ ਨੇ ਦੱਸਿਆ ਕਿ ਮੁੱਖ ਮੰਤਰੀ ਪੰਜਾਬ ਕੈਪਟਨ ਅਮਰਿੰਦਰ ਸਿੰਘ ਵੱਲੋਂ ਵਾਇਰਸ ਦੇ ਫੈਲਾਅ ਨੂੰ ਰੋਕਣ ਅਤੇ ਇਸ ਦੇ ਮਾਰੂ ਪ੍ਰਭਾਵ ਨੂੰ ਘੱਟ ਕਰਨ ਲਈ ਇਹ ਕਰਫਿਊ 31 ਮਾਰਚ ਤੱਕ ਵਧਾ ਦਿੱਤਾ ਗਿਆ ਹੈ।ਉਨਾਂ ਦੱਸਿਆ ਕਿ ਇਸ ਦੌਰਾਨ ਕੇਵਲ ਜਨਤਾ ਲਈ ਪ੍ਰਤੀਦਿਨ ਦੀਆਂ ਲੋੜੀਦੀਆਂ ਵਸਤੂਆਂ ਜਿਸ ਵਿਚ ਕਰਿਆਨਾ, ਸਬਜ਼ੀਆਂ, ਫਲ, ਡੀਜ਼ਲ, ਐਲ.ਪੀ.ਜੀ, ਸੀ.ਐਨ.ਜੀ, ਦਵਾਈਆਂ ਦੀਆਂ ਦੁਕਾਨਾਂ ਆਦਿ ਸ਼ਾਮਿਲ ਹਨ ਉਹ ਹੀ ਖੁੱਲਣਗੀਆਂ।
               ਉਨ੍ਹਾਂ ਕਿਹਾ ਕਿ ਮੈਡੀਕਲ ਸਟੋਰ ਜਨਤਾ ਦੀ ਸੇਵਾ ਲਈ ਖੁੱਲੇ ਰਹਿਣਗੇ ਤਾਂ ਜੋ ਲੋਕਾਂ ਨੇ ਜਰੂਰੀ ਦਵਾਈਆਂ ਲੋੜ ਅਨੁਸਾਰ ਖਰੀਦਣੀਆਂ ਹੋਣ ਤਾਂ ਉਨ੍ਹਾਂ ਨੂੰ ਕਿਸੇ ਤਰ੍ਹਾਂ ਦੀ ਸਮੱਸਿਆ ਦਾ ਸਾਹਮਣਾ ਨਾ ਆਵੇ। ਉਨ੍ਹਾਂ ਕਿਹਾ ਕਿ ਇਸੇ ਹੀ ਤਰ੍ਹਾਂ ਕਰਿਆਨਾ ਅਤੇ ਫਲ-ਸਬਜੀਆਂ ਦੀਆਂ ਦੁਕਾਨਾਂ ਵੀ ਖੋਲੀਆਂ ਜਾਣਗੀਆਂ।ਸਥਿਤੀ ਦੇ ਅਨੁਸਾਰ ਦੁਕਾਨਾਂ ਦੇ ਖੋਲਣ ਅਤੇ ਬੰਦ ਕਰਨ ਵਿੱਚ ਫੇਰ ਬਦਲ ਕੀਤਾ ਜਾ ਸਕਦਾ ਹੈ।
                   ਉਨਾਂ ਕਿਹਾ ਕਿ ਸਾਡਾ ਸਾਰਿਆਂ ਦਾ ਫਰਜ ਬਣਦਾ ਹੈ ਕਿ ਅਜਿਹੀ ਸਥਿਤੀ ਵਿੱਚ ਅਸੀਂ ਆਪਣੇ ਅਤੇ ਆਪਣੇ ਪਿਆਰਿਆਂ ਦੇ ਬਚਾਅ ਲਈ ਸਰਕਾਰ ਵੱਲੋਂ ਦਿੱਤੇ ਜਨਤਾ ਕਰਫਿੳੂ ਦੇ ਸੱਦੇ ਵਿਚ ਸਹਿਯੋਗ ਦੇਈਏ ਤਾਂ ਜੋ ਇਸ ਬੀਮਾਰੀ ਤੋਂ ਬਾਕੀਆਂ ਨੂੰ ਸੁਰੱਖਿਅਤ ਕੀਤਾ ਜਾ ਸਕੇ। ਉਨ੍ਹਾਂ ਕਿਹਾ ਕਿ ਸਰਕਾਰ ਨੇ ਜਰੂਰੀ ਵਸਤਾਂ ਦੀ ਚੀਜਾਂ ਵਾਲੀਆਂ ਦੁਕਾਨਾਂ ਖੁੱਲੀਆਂ ਰੱਖਣ ਦੀ ਛੋਟ ਦਿੱਤੀ ਹੈ, ਪਰ ਸਾਡਾ ਫਰਜ਼ ਬਣਦਾ ਹੈ ਕਿ ਬਜ਼ਾਰ ਅੰਦਰ ਸਮਾਨ ਖਰੀਦਣ ਦੇ ਲਈ ਘਰ ਦਾ ਇੱਕ ਹੀ ਮੈਂਬਰ ਆਵੇ। ਉਹ ਕਿਸੇ ਨਾਲ ਵੀ ਫਾਸਲਾ ਇਕ ਤੋਂ ਵੱਧ ਮੀਟਰ ਦੀ ਦੂਰੀ ਦਾ ਰੱਖੇ ਅਤੇ ਘਰ ਪਹੁੰਚਣ ਸਾਰ ਹੀ ਆਪਣੇ ਹੱਥ ਚੰਗੀ ਤਰਾਂ ਧੋ ਕੇ ਅੰਦਰ ਦਾਖਲ ਹੋਵੇ। ਇਸ ਤੋਂ ਇਲਾਵਾ ਬਾਜ਼ਾਰ ਵਿਚ ਵੀ ਸੈਨੇਟਾਇਜ਼ਰ ਦੀ ਵਰਤੋਂ ਕਰਕੇ ਆਪਣਾ ਹੱਥ ਸਾਫ ਕਰਕੇ ਸਕੂਟਰ, ਕਾਰ ਤੇ ਮੋਬਾਈਲ ਫੋਨ ਦੀ ਵਰਤੋਂ ਕਰੇ, ਤਾਂ ਜੋ ਵਾਇਰਸ ਦੇ ਪ੍ਰਭਾਵ ਤੋਂ ਬਚਿਆ ਰਹਿ ਸਕੇ।