‘ਫਿਟ ਹੈਲਥ ਵਰਕਰ ਕੈਂਪੈਨ’ ਤਹਿਤ ਹੋਏਗੀ ਸਿਹਤ ਵਰਕਰਾਂ ਦੀ ਸਕਰੀਨਿੰਗ

ਕਪੂਰਥਲਾ, 4 ਅਕਤੂਬਰ (ਪੰਜਾਬ ਪੋਸਟ ਬਿਊਰੋ) – ਸਿਹਤ ਵਰਕਰਾਂ ਦੇ ਕਰੋਨਾ ਤੋਂ ਬਚਾਅ ਲਈ ਸਿਹਤ ਵਿਭਾਗ ਵਲੋਂ ਨਿਵੇਕਲੀ ਪਹਿਲ ਕਰਦਿਆਂ ਜਿਲੇ ਵਿਚ “ਫਿਟ ਹੈਲਥ ਵਰਕਰ ਕੈਂਪੈਨ” ਸ਼ੁਰੂ ਕੀਤੀ ਗਈ ਹੈ, ਜਿਸ ਤਹਿਤ ਜਿਲੇ ਦੇ ਸਾਰੇ ਸਰਕਾਰੀ ਸਿਹਤ ਕੇਂਦਰਾਂ ਵਿੱਚ ਹੈਲਥ ਵਰਕਰਾਂ ਦੀ ਸਿਹਤ ਜਾਂਚ ਮੁਫਤ ਕੀਤੀ ਜਾਏਗੀ।
                   ਸਿਵਲ ਸਰਜਨ ਡਾ. ਸੁਰਿੰਦਰ ਕੁਮਾਰ ਨੇ ਦੱਸਿਆ ਕਿ ਗਾਂਧੀ ਜਯੰਤੀ ਤੋਂ ਸ਼ੁਰੂ ਇਹ ਮੁਹਿੰਮ 21 ਦਿਨ ਤੱਕ ਚੱਲੇਗੀ।ਜਿਸ ਤਹਿਤ ਸਾਰੇ ਹੈਲਥ ਵਰਕਰਾਂ ਦੀ ਸਕਰੀਨਿੰਗ ਹੋਵੇਗੀ।ਉਨ੍ਹਾਂ ਕਿਹਾ ਕਿ ਕੋਵਿਡ ਮਹਾਂਮਾਰੀ ਨਾਲ ਅੱਜ ਪੂਰੀ ਦੁਨੀਆਂ ਜੂਝ ਰਹੀ ਹੈ ਤੇ ਸਿਹਤ ਵਿਭਾਗ ਵਿੱਚ ਤਾਇਨਾਤ ਸਾਰਾ ਮੈਡੀਕਲ, ਪੈਰਾਮੈਡੀਕਲ ਸਟਾਫ ਆਪਣੀ ਜਾਨ ਦੀ ਪ੍ਰਵਾਹ ਕੀਤੇ ਬਿਨ੍ਹਾਂ ਸਮੁੱਚੀ ਮਾਨਵਤਾ ਨੂੰ ਬਚਾਉਣ ਲਈ ਫਰੰਟਲਾਈਨ ਵਰਕਰ ਦੇ ਤੌਰ ‘ਤੇ ਡਟਿਆ ਹੋਇਆ ਹੈ ਅਜਿਹੇ ਵਿਚ ਫਿਟ ਹੈਲਥ ਵਰਕਰ ਮੁਹਿੰਮ ਦੀ ਮਹੱਹਤਾ ਹੋਰ ਵੀ ਵਧ ਜਾਂਦੀ ਹੈ। ਉਨ੍ਹਾਂ ਦੱਸਿਆ ਕਿ ਇਸ ਮੁਹਿੰਮ ਤਹਿਤ ਗੈਰ ਸੰਚਾਰੀ ਰੋਗਾਂ ਜਿਵੇਂ ਕਿ ਹਾਈਪਰਟੈਨਸ਼ਨ, ਡਾਇਬਟੀਜ਼ ਅਤੇ ਓਰਲ, ਬ੍ਰੈਸਟ ਤੇ ਸਰਵਿਕਸ ਕੈਂਸਰ ਦੀ ਜਾਂਚ ਕੀਤੀ ਜਾਏਗੀ।
                ਜਿਲਾ ਪਰਿਵਾਰ ਭਲਾਈ ਅਫਸਰ ਡਾ. ਰਾਜ ਕਰਨੀ ਨੇ ਕਿਹਾ ਕਿ ਇਸ ਮੁਹਿੰਮ ਦੌਰਾਨ ਸਾਰੇ ਸਰਕਾਰੀ ਸਿਹਤ ਕੇਂਦਰਾਂ ਵਿਚ, ਫੀਲਡ ਵਿਚ ਤੈਨਾਤ ਡਾਕਟਰਾਂ, ਸਟਾਫ ਨਰਸ, ਏ.ਐਨ.ਐਮ ਲੈਬ ਟੈਕਨੀਸ਼ੀਅਨ, ਆਸ਼ਾ ਵਰਕਰਾਂ ਦੀ ਸਿਹਤ ਜਾਂਚ ਕੀਤੀ ਜਾਏਗੀ।