ਇਨਸਾਫ ਦੀ ਮੰਗ ਕਰਦਾ ਪੈਟਰੋਲ ਦੀ ਬੋਤਲ ਲੈ ਕੇ ਟੈਂਕੀ ਤੇ ਚੜਿਆ

ਖਾਲੜਾ, 30 ਮਈ (ਰਣਬੀਰ ਸਿੰਘ ਗੋਲਣ, ਕੁਲਵਿੰਦਰ ਸਿੰਘ ਕੰਬੋਕੇ) ਕਸਬਾ ਖਾਲੜਾ ਅੰਦਰ ਉਸ ਵੇਲੇ ਸਨਸਨੀ ਫੈਲ ਹੋ ਗਈ, ਜਦੋਂ ਇਕ ਵਿਅਕਤੀ ਇਨਸਾਫ ਲੈਣ ਦੀ ਖਾਤਿਰ ਪੈਟਰੋਲ ਦੀ ਬੋਤਲ ਲੈ ਕੇ ਟੈਂਕੀ ਤੇ ਚੜ੍ਹ ਗਿਆ। ਹਰਦੀਪ ਸਿੰਘ ਪੁੱਤਰ ਚਾਨਣ ਸਿੰਘ ਵਾਸੀ ਖਾਲੜਾ ਨੇ ਟੈਂਕੀ ਤੋਂ ਹੱਥ ਲਿਖਤ ਪ੍ਰੈਸ ਨੋਟ ਵਿੱਚ ਦੋਸ਼ ਲਗਾਅਿਾ ਕਿ ਖਾਲੜਾ ਮੰਡੀ ਦਾ ਪੰਚਾਇਤ ਮੈਂਬਰ ਜਿਸ ਕੋਲ ਰਿਵਾਲਵਰ ਹੈ, ਉਸ ਨੂੰ ਧਮਕੀਆਂ ਦੇਂਦਾ ਹੈ ਕਿ ਜਾਂ ਤਾਂ ਖਾਲੜਾ ਛੱਡ ਦੇ ਨਹੀਂ ਤਾਂ ਮੈਂ ਉਸਨੂੰ ਗੋਲੀ ਮਾਰ ਦੇਵਾਂਗਾ। ਹਰਦੀਪ ਸਿੰਘ ਨੇ ਦੱਸਿਆ ਕਿ ਇਸ ਵਿਸ਼ੇ ‘ਤੇ ਪੁਲਿਸ ਦੀ ਹੈਲਪਲਾਈਨ 181 ਤੇ ਇਨਸਾਫ ਦੀ ਗੁਹਾਰ ਲਗਾ ਚੁੱਕਾ ਹੈ ਅਤੇ ਪੁਲਿਸ ਦੇ ਉਚ ਅਧਿਕਾਰੀਆਂ ਤੱਕ ਦਰਖਾਸਤਾਂ ਦੇ ਚੁੱਕਾ ਹੈ, ਪਰ ਕਿਸੇ ਪਾਸਿਓਂ ਕੋਈ ਸੁਣਵਾਈ ਨਹੀਂ ਹੋਈ। ਆਖਿਰ ਉਸ ਨੇ ਇਹ ਕਦਮ ਚੁੱਕਣਾ ਹੀ ਮਨਾਸਬ ਸਮਝਿਆ ਕਿ ਆਖਰ ਜਿਉਣ ਨਾਲੋਂ ਤਾਂ ਮੌਤ ਹੀ ਚੰਗੀ ਹੈ।ਪੁਲਿਸ ਨੇ ਬੜਾ ਸਮਝਾਇਆ ਪਰ ਉਸ ਨੇ ਇਕ ਨਾ ਸੁਣੀ ਫਿਰ ਪੰਚਾਇਤ ਦੇ ਮੈਂਬਰ ਹਰਜਿੰਦਰ ਕੁਮਾਰ ਬਿੱਟੂ ਦੇ ਸਮਝਾਉਣ ਤੇ ਉਕਤ ਵਿਅਕਤੀ ਟੈਂਕੀ ਤੋਂ ਉਤਰ ਆਇਆ ਤੇ ਏ.ਐਸ.ਆਈ ਸਾਹਿਬ ਸਿੰਘ ਨੇ ਭਰੋਸਾ ਦਵਾਇਆ ਕਿ ਧਮਕੀਆਂ ਦੇਣ ਵਾਲੇ ਵਿਅਕਤੀ ਦਾ ਅਸਲਾ ਜਮ੍ਹਾ ਕਰਵਾਇਆ ਜਾਵੇਗਾ ਅਤੇ ਉਸ ਉਪਰ ਬਣਦੀ ਕਾਨੂੰਨੀ ਕਾਰਵਾਈ ਕੀਤੀ ਜਾਵੇਗੀ।