ਢਿਲ਼ਵਾਂ ਤੋਂ ਵਿਧੀਪੁਰ ਤੱਕ 6 ਮਾਰਗੀ ਸੜਕ ਸਤੰਬਰ 2017 ਤੱਕ ਹੋਵੇਗੀ ਮੁਕੰਮਲ – ਸ਼ਵੇਤ ਮਲਿਕ

ਅੰਮ੍ਰਿਤਸਰ, 4 ਨਵੰਬਰ (ਜਗਦੀਪ ਸਿੰਘ ਸੱਗੂ)- ਢਿਲ਼ਵਾਂ ਤੋਂ ਵਿਧੀਪੁਰ ਤੱਕ ਤਕਰੀਬਨ 20 ਕਿਲੋਮੀਟਰ ਲੰਮੀ 6 ਮਾਰਗੀ ਸੜਕ ਸਤੰਬਰ 2017 ਤੱਕ ਮੁਕੰਮਲ ਹੋਣ ਨਾਲ ਇਸ ਮਾਰਗ ‘ਤੇ ਜਾਣ ਵਾਲੇ ਰਾਹਗੀਰਾਂ ਦੀ ਵੱਡੀ ਮੁਸ਼ਕਲ ਹੱਲ ਹੋ ਜਾਵੇਗੀ।ਇਹਨਾਂ ਸ਼ਬਦਾਂ ਦਾ ਪ੍ਰਗਟਾਵਾ ਕਰਦਿਆਂ ਮੈਬਰ ਰਾਜ ਸਭਾ ਸ਼ਵੇਤ ਮੁਲਿਕ ਨੇ ਦੱਸਿਆ ਕਿ 344 ਕਰੋੜ ਦੀ ਲਾਗਤ ਨਾਲ ਬਨਣ ਵਾਲੀ ਇਸ ਸੜਕ ਦਾ 55 ਫੀਸਦ ਕੰਮ ਹੋ ਚੁੱਕਾ ਹੈ।
ਸ਼ਵੇਤ ਮਲਿਕ ਨੇ ਦੱਸਿਆ ਕਿ ਬੀਤੇ ਦਿਨੀ ਇਸ 6 ਮਾਰਗੀ ਸੜਕੀ ਪ੍ਰੋਜੈਕਟ ਦੇ ਮੁਆਇਨੇ ਸਮੇਂ ਨੈਸ਼ਨਲ ਹਾਈਵੇੳ ਅਥਾਰਟੀ ਆਫ ਇੰਡੀਆ ਦੇ ਪ੍ਰੋਜੈਕਟ ਡਾਇਰੈਕਟਰ ਨੀਰਜ਼ ਜੈਨ, ਟੀਮ ਲੀਡਰ ਵੀ. ਕ ਸਿੰਘ, ਠੇਕੇਦਾਰ ਜਤਿੰਦਰ ਸਿੰਘ ਆਦਿ ਨਾਲ ਉਨਾਂ ਦੀ ਗੱਲਬਾਤ ਹੋਈ ਹੈ, ਜਿੰਨਾਂ ਨੇ ਦੱਸਿਆ ਹੈ ਕਿ ਇਸ ਮਾਰਗ ‘ਤੇ 30 ਛੋਟੇ ਵੱਡੇ ਪੁਲਾਂ ਦਾ ਨਿਰਮਾਣ ਵੀ ਕੀਤਾ ਜਾਵੇਗਾ।ਉਨਾਂ ਕਿਹਾ ਸੜਕ ਦੇ ਨਿਰਮਾਣ ਸਮੇਂ ਰਾਹਗੀਰਾਂ ਨੂੰ ਜੋ ਮੁਸ਼ਕਲਾਂ ਪੇਸ਼ ਆ ਰਹੀਆਂ ਹਨ, ਉਨਾਂ ਦੇ ਹੱਲ ਲਈ ਬਦਲਵੇਂ ਪ੍ਰਬੰਧ ਕਰਨ ਦੀਆਂ ਠੇਕੇਦਾਰ ਨੂੰ ਹਦਾਇਤਾਂ ਦਿਤੀਆਂ ਗਈਆਂ ਹਨ।
ਸ਼੍ਰੀ ਮਲਿਕ ਨੇ ਦੱਸਿਆ ਕਿ ਸੜਕ ਆਵਾਜਾਈ ਮੰਤਰੀ ਨਿਤਿਨ ਗਡਕਰੀ ਵਲੋਂ ਅੰਮ੍ਰਿਤਸਰ-ਦਿੱਲੀ ਐਕਸਪ੍ਰੈਸ ਹਾਈਵੇਅ ਪਰੋਜੈਕਟ ਨੂੰ ਵੀ ਹਰੀ ਝੰਡੀ ਦਿੱਤੀ ਗਈ ਹੈ, ਜਿਸ ਨਾਲ  ਅੰਮ੍ਰਿਤਸਰ ਤੋਂ ਦਿੱਲੀ ਤੱਕ ਦਾ ਸਫਰ ਅਰਾਮਦਾਇਕ ਤੇ ਅਸਾਨ ਹੋ ਜਾਵੇਗਾ।ਉਨਾਂ ਕਿਹਾ ਕਿ ਇਸ ਤੋਂ ਪਹਿਲਾਂ ਅੰਮ੍ਰਿਤਸਰ-ਪਠਾਨਕੋਟ ਅਤੇ ਅੰਮ੍ਰਿਤਸਰ-ਬਠਿੰਡਾ ਫੋਰ ਲੇਨ ਮਾਰਗ ਦਾ ਨਿਰਮਾਣ ਕੀਤਾ ਗਿਆ ਹੈ ਅਤੇ ਅੰਮ੍ਰਿਤਸਰ-ਹੁਸ਼ਿਆਰਪੁਰ ਵਾਇਆ ਦਸੂਆ ਦਾ ਪ੍ਰੋਜੈਕਟ ਵੀ ਵਿਚਾਰਅਧੀਨ ਹੈ।ਇਕ ਸਵਾਲ ਦੇ ਜਵਾਬ ਵਿੱਚ ਸ਼ਵੇਤ ਮਲਿਕ ਨੇ ਕਿਹਾ ਕਿ ਸ਼ਹਿਰ ਵਿੱਚ ਜੋ ਫਰੇਲਵੇ ਕਰਾਸਿੰਗ ਹਨ, ਉਨਾਂ ਦੇ ਜਿਆਦਤਰ ਬੰਦ ਰਹਿਣ ਨਾਲ ਲੋਕਾਂ ਨੂੰ ਪੇਸ਼ ਆ ਰਹੀਆਂ ਮੁਸ਼ਕਲਾਂ ਦੇ ਮੱਦੇਨਜਰ ਅੰਡਰ ਵੇਅ ਬਣਾ ਕੇ ਲੋਕਾਂ ਨੂੰ ਇਸ ਮੁਸੀਬਤ ਤੋਂ ਛੁਟਕਾਰਾ ਦਿਵਾਇਆ ਜਾਵੇਗਾ।