ਪੱਟੀ ਵਿਖੇ 10 ਏਕੜ 1 ਕਨਾਲ ਵਿਚ ਬਣੇਗਾ ਯੋਗਾ ਕੇਂਦਰ ਅਤੇ ਪਾਰਕ

ਬੱਚਿਆਂ ਲਈ ਝੁਲੇ, ਪਾਰਕਾਂ ਵਿਚ ਸੁੰਦਰ ਫੁੱਲ ਤੇ ਦਰਖੱਤ ਲੱਗਣਗੇ – ਜੌਲੀ

ਪੱਟੀ, 7 ਫਰਵਰੀ (ਪੰਜਾਬ ਪੋਸਟ- ਅਵਤਾਰ ਸਿੰਘ ਢਿੱਲੋਂ)- ਪੰਜਾਬ ਦੇ ਪਹਿਲੇ ਯੋਗਾ ਕੇਂਦਰ ਅਤੇ ਬੇਹਤਰੀਨ ਪਾਰਕਾਂ ਦੇ ਨਿਰਮਾਣ ਲਈ ਆਦੇਸ਼ ਪ੍ਰਤਾਪ ਸਿੰਘ ਕੈਰੋਂ ਦੇ ਉਦਮ ਸਦਕਾ ਅਤੇ ਖੁਸ਼ਵਿੰਦਰ ਸਿੰਘ ਭਾਟੀਆ ਮੈਂਬਰ ਸ਼੍ਰੋਮਣੀ ਕਮੇਟੀ ਦੀ ਅਗਵਾਈ ਹੇਠ ਰੇਲਵੇ ਫਾਟਕ ਕਚਹਰੀ ਰੋਡ ਦੇ ਦੋਵੇ ਪਾਸੇ ਕਰੀਬ 10 ਏਕੜ 1 ਕਨਾਲ ਜ਼ਮੀਨ ਨੂੰ ਪੱਧਰਾ ਕਰਨ ਦੇ ਕੰਮ ਦੀ ਸ਼ੁਰੂਆਤ ਪਰਵਿੰਦਰ ਸਿੰਘ ਜੌਲੀ ਦੀ ਦੇਖ ਰੇਖ ਸ਼ੁਰੂ ਹੋਈ।

ਜੌਲੀ ਨੇ ਕਿਹਾ ਕਿ ਸ਼ਹਿਰ ਵਾਸੀਆਂ ਦੀ ਸਿਹਤ ਦੇ ਮੱਦੇਨਜ਼ਰ ਆਦੇਸ਼ ਪ੍ਰਤਾਪ ਸਿੰਘ ਕੈਰੋਂ ਦਾ ਜੋ ਸੁਪਨਾ ਸੀ ਕਿ ਇਥੇ ਸੁੰਦਰ ਪਾਰਕਾਂ ਦਾ ਨਿਰਮਾਣ ਕਰਵਾਇਆ ਜਾਵੇਗਾ, ਉਸ ਨੂੰ ਪੂਰਾ ਕਰਦਿਆਂ ਇਸ ਕੰਮ ਦੀ ਅੱਜ ਤਂੋ ਠੇਕੇਦਾਰ ਨੌਨਿਹਾਲ ਸਿੰਘ ਵੱਲੋਂ ਸ਼ੁਰੂਆਤ ਕੀਤੀ ਗਈ। ਇਸ ਪਾਰਕ ਵਿਚ ਜਿਥੇ ਸੁੰਦਰ ਫੁੱਲਾਂ ਦੇ ਪੌਦੇ ਲਗਾਏ ਜਾ ਰਹੇ ਹਨ, ਉਥੇ ਬਹੁਤ ਹੀ ਨਵੀਆਂ ਨਵੀਆਂ ਕਿਸਮਾਂ ਦੇ ਦਰਖੱਤ ਲਗਾਏ ਜਾ ਰਹੇ ਹਨ। ਉਨਾਂ ਦੱਸਿਆ ਕਿ ਬੱਚਿਆਂ ਲਈ ਝੁਲੇ ਤੇ ਖੇਡਾਂ ਦਾ ਸਮਾਨ ਤੋ ਇਲਾਵਾ ਰੋਜ਼ਾਨਾ ਯੋਗਾ ਕਰਨ ਅਤੇ ਸਿਹਤ ਨਾਲ ਸਬੰਧਤ ਹਰ ਪ੍ਰਕਾਰ ਦੀ ਸਹੂਲਤ ਨਾਲ ਲੈਸ ਇਹ ਪਾਰਕ ਹੋਵੇਗਾ। ਉਨਾਂ ਦੱਸਿਆ ਕਿ ਉਕਤ ਪਾਰਕਾਂ ਦੇ ਨਿਰਮਾਣ ਲਈ ਅਗਲੇ ਹਫਤੇ ਆਰਕਿਟੈਕਟ ਦੇ ਮਾਹਿਰਾਂ ਦੀ ਟੀਮ ਪੱਟੀ ਆ ਰਹੀ ਹੈ, ਜੋ ਇਸ ਜ਼ਮੀਨ ਦਾ ਨਿਰੀਖਣ ਕਰੇਗੀ। ਇਸ ਮੌਕੇ ਰਣਜੀਤ ਸਿੰਘ ਯੋਗਾ ਗੁਰੁ, ਬਲਦੇਵ ਮਹਿਤਾ, ਹਰੀ ਚੰਦ, ਲਖਬੀਰ ਸਿੰਘ ਸ਼ਹੀਦ, ਤਰੁਣ ਕੁਮਾਰ, ਸੌਰਭ ਕੁਮਾਰ, ਕੁਲਵਿੰਦਰ ਸਿੰਘ, ਸੁਖਚੈਨ ਸਿੰਘ, ਸਤਨਾਮ ਸਿੰਘ ਚੀਮਾ, ਅਵਤਾਰ ਸਿੰਘ, ਬਿੱਟੂ ਠੇਕੇਦਾਰ, ਬੱਬੂ ਸਿੰਘ ਆਦਿ ਹੋਰ ਹਾਜ਼ਰ ਸਨ।