ਪ੍ਰਭੂ ਦੱਸੋ ਆਖਿਰ ਕਦੋਂ ਚਾਲੂ ਹੋਵੇਗੀ ਬੰਦ ਕੀਤੀ ਅੰਮ੍ਰਿਤਸਰ-ਜੰਮੂ ਟ੍ਰੇਨ ?- ਚਾਵਲਾ

ਅੰਮ੍ਰਿਤਸਰ, 10 ਮਈ (ਪੰਜਾਬ ਪੋਸਟ ਬਿਊਰੋ) –  ਅੰਮ੍ਰਿਤਸਰ ਜੰਮੂ ਕਟਰਾ ਰੇਲ ਗੱਡੀ ਬੰਦ ਹੋਣ ਨਾਲ ਪੰਜਾਬ ਦੀ ਜਨਤਾ ਖਾਸ ਤੌਰ `ਤੇ ਅੰਮ੍ਰਿਤਸਰ ਵਾਸੀਆਂ ਨੂੰ ਵੱਡੀ ਮੁਸ਼ਕਲ ਪੇਸ਼ ਆ ਰਹੀ ਹੈ।ਇੱਕ ਤਾਂ ਇਸ ਗੱਡੀ ਦਾ ਸਮਾਂ ਠੀਕ ਨਹੀਂ ਅਤੇ ਦੂਜਾ ਇਸ ਨੂੰ ਪੂਰੀ ਤਰ੍ਹਾਂ ਬੰਦ ਕਰ ਦਿੱਤਾ ਹੈ, ਜਿਸ ਕਰ ਕੇ ਯਾਤਰੂ, ਵਪਾਰੀ ਅਤੇ ਰੋਜਾਨਾ ਯਾਤਰਾ ਕਰਨ ਵਾਲੇ ਨੌਕਰੀ ਪੇਸ਼ਾ ਲੋਕ ਪ੍ਰੇੁਸ਼ਾਨ ਹਨ।ਇਹਨਾਂ ਸ਼ਬਦਾਂ ਦਾ ਪ੍ਰਗਟਾਵਾ ਕਰਦਿਆਂ ਸੀਨੀਅਰ ਭਾਜਪਾ ਆਗੂ ਤੇ ਸਾਬਕਾ ਸਿਹਤ ਮੰਤਰੀ ਪੰਜਾਬ ਨੇ ਕਿਹਾ ਕਿ ਹੈਰਾਨੀ ਦੀ ਗੱਲ ਇਹ ਹੈ ਕਿ ਰੇਲ ਮੰਤਰੀ ਨੇ ਨਾ ਤਾਂ ਗੱਡੀ ਬੰਦ ਕਰਨ ਤੋਂ ਪਹਿਲਾਂ ਦੱਸਿਆ ਕਿ ਆਖਿਰ ਅੰਮ੍ਰਿਤਸਰ-ਜੰਮੂ ਟ੍ਰੇਨ ਬੰਦ ਕਿਉਂ ਕੀਤੀ ਜਾ ਰਹੀ ਹੈ ਅਤੇ ਹੁਣ ਤੱਕ ਇਹ ਵੀ ਜਾਣਕਾਰੀ ਨਹੀਂ ਦਿੱਤੀ ਕਿ ਇਸ ਨੂੰ ਫੇਰ ਚਾਲੂ ਕਦੋਂ ਤੱਕ ਇਸ ਕੀਤਾ ਜਾਵੇਗਾ।ਸ੍ਰੀਮਤੀ ਚਾਵਲਾ ਨੇ ਕਿਹਾ ਕਿ ਗਰਮੀਆਂ ਦੇ ਮਹੀਨਿਆਂ ਵਿੱਚ ਖਾਸ ਤੌਰ `ਤੇ ਪੂਰੇ ਦੇਸ਼ ਤੋਂ ਸ਼ਰਧਾਲੂ ਮਾਤਾ ਵੈਸ਼ਣੋ ਦੇਵੀ ਮੰਦਰ ਦੀ ਯਾਤਰਾ ਲਈ ਆਉਂਦੇ ਹਨ ਅਤੇ ਇਸ ਗੱਡੀ ਦਾ ਪ੍ਰਯੋਗ ਕਰਦੇ ਹਨ।ਉਨਾਂ ਰੇਲ ਮੰਤਰੀ ਨੂੰ ਅਪੀਲ ਕੀਤੀ ਕਿ ਉਹ ਜਲਦੀ ਹੀ ਇਹ ਗੱਡੀ ਫੇਰ ਸ਼ੁਰੂ ਕਰਵਾਉਣ ਅਤੇ ਇਸ ਦਾ ਸਮਾਂ ਵੀ ਉਂਜ ਹੀ ਰੱਖਣ ਜਿਵੇਂ ਚੰਡੀਗੜ-ਅੰਮ੍ਰਿਤਸਰ ਗੱਡੀ ਦਾ ਹੈ, ਤਾਂ ਜੋ ਲੋਕਾਂ ਨੂੰ ਸਹੂਲਤ ਦੇ ਨਾਲ ਨਾਲ ਸਰਕਾਰ ਦੀ ਆਮਦਨੀ ਵਿੱਚ ਵੀ ਵਾਧਾ ਹੋਵੇ।