ਸੜਕ ਹਾਦਸੇ ਦੌਰਾਨ 2 ਨੌਜਵਾਨਾਂ ਦੀ ਮੌਤ ਕਾਰਨ ਕਸਬੇ `ਚ ਸੋਗ

ਲੌਂਗੋਵਾਲ, 25 ਸਤੰਬਰ (ਪੰਜਾਬ ਪੋਸਟ – ਜਗਸੀਰ ਲੌਂਗੋਵਾਲ ) –  ਕਸਬੇ ਦੇ ਗਰੀਬ ਪਰਿਵਾਰ ਨਾਲ ਸਬੰਧਤ ਗਗਨਦੀਪ ਸਿੰਘ ਪੁੱਤਰ ਗਰਜੰਟ ਸਿੰਘ ਪੱਤੀ ਦੁੱਲਟ ਅਤੇ ਲਖਵਿੰਦਰ ਸਿੰਘ ਪੁੱਤਰ ਸ਼ੀਬੁ ਸਿੰਘ ਦੀ ਭਿਆਨਕ ਸੜਕ ਹਾਦਸੇ `ਚ ਮੌਤ ਹੋ ਜਾਣ ਦਾ ਸਮਾਚਾਰ ਪ੍ਰਾਪਤ ਹੋਇਆ ਹੈ।ਇਸ ਸਬੰਧੀ ਥਾਣਾ ਚੀਮਾ ਦੇ ਮੁਖੀ ਇੰਸਪੈਕਟਰ ਪ੍ਰਿਤਪਾਲ ਸਿੰਘ ਨੇ ਦੱਸਿਆ ਮ੍ਰਿਤਕ ਦੇ ਪਿਤਾ ਗੁਰਜੰਟ ਸਿੰਘ ਅਤੇ ਮ੍ਰਿਤਕ ਲਖਵਿੰਦਰ ਸਿੰਘ ਦੇ ਭਰਾ ਸੁਖਜੀਤ ਸਿੰਘ ਸਿੰਘ ਦੇ ਦਿੱਤੇ ਬਿਆਨਾਂ ਮੁਤਾਬਿਕ ਬੀਤੀ ਰਾਤ ਇਹ ਦੋਵੇਂ ਜਣੇ ਮੋਟਰਸਾਇਕਲ `ਤੇ ਲੌਂਗੋਵਾਲ ਤੋਂ ਪਿੰਡ ਝਾੜੋਂ ਵੱਲ ਜਾ ਰਹੇ ਸੀ ਅਤੇ ਲੌਂਗੋਵਾਲ ਅਤੇ ਪਿੰਡ ਝਾੜੋਂ ਵਿਚਕਾਰ ਦੀ ਲੰਘਦੀ ਡਰੇਨ ਦੇ ਪੁੱਲ ਤੋਂ ਪਿੱਛੇ ਇਕ ਸੜਕ ਦੇ ਖਤਰਨਾਕ ਮੋੜ ਤੋਂ ਬੇਕਾਬੂ ਹੋਣ ਕਾਰਨ ਮੋਟਰਸਾਇਕਲ ਬੇਰੀ ਦੇ ਦਰੱਖ਼ਤ ਨਾਲ ਟਕਰਾਉਣ ਕਰਕੇ ਉਨਾਂ ਦੇ ਮੌਤ ਹੋ ਗਈ।
 ਸਹਾਇਕ ਥਾਣੇਦਾਰ ਜਗਤਾਰ ਸਿੰਘ ਨੇ ਦੱਸਿਆ ਕਿ ਦੋਵਾਂ ਮ੍ਰਿਤਕ ਨੌਜਵਾਨਾਂ ਦੇ ਪਰਿਵਾਰ ਵਲੋਂ ਦਿੱਤੇ  ਬਿਆਨਾਂ ਦੇ ਅਧਾਰ `ਤੇ ਧਾਰਾ 174 ਦੀ ਕਾਰਵਾਈ ਕਰਦਿਆਂ ਪੋਸਟ ਮਾਰਟਮ ਉਪਰੰਤ ਦੋਵਾਂ ਮ੍ਰਿਤਕਾਂ ਦੀਆਂ ਲਾਸ਼ਾਂ ਪਰਿਵਾਰ ਦੇ ਸਪੁੱਰਦ ਕਰ ਦਿੱਤੀਆਂ ਗਈਆਂ ਹਨ।