ਬੀ.ਬੀ.ਕੇ ਡੀ.ਏ.ਵੀ ਕਾਲਜ ਫਾਰ ਵੁਮੈਨ ਵਲੋਂ ਸਾਈਬਰ ਜਾਗਰੂਕਤਾ ਪ੍ਰੋਗਰਾਮ

ਅੰਮ੍ਰਿਤਸਰ, 17 ਮਾਰਚ (ਜਗਦੀਪ ਸਿੰਘ) – ਬੀ.ਬੀ.ਕੇ ਡੀ.ਏ.ਵੀ ਕਾਲਜ ਫਾਰ ਵੁਮੈਨ ਵਲੋਂ ਵਿਦਿਆਰਥੀਆਂ ਨੂੰ ਸਾਈਬਰ ਅਪਰਾਧ ਦੀਆਂ ਵਧਦੀਆਂ ਚੁਣੌਤੀਆਂ ਬਾਰੇ ਸੰਵੇਦਨਸ਼ੀਲ ਬਣਾਉਣ ਲਈ ਇੱਕ ਸਾਈਬਰ ਜਾਗਰੂਕਤਾ ਪ੍ਰੋਗਰਾਮ ਦਾ ਆਯੋਜਨ ਕੀਤਾ ਗਿਆ।ਸੈਸ਼ਨ ਦਾ ਸੰਚਾਲਨ ਸ਼੍ਰੀਮਤੀ ਮਨਜਿੰਦਰ ਕੌਰ, ਹੈਡ ਕਾਂਸਟੇਬਲ ਦੁਆਰਾ ਕੀਤਾ ਗਿਆ, ਜਿਸ ਦੇ ਨਾਲ਼ ਹੋਰ ਦੋ ਕਾਂਸਟੇਬਲ ਵੀ ਸ਼ਾਮਲ ਸਨ, ਜਿਨ੍ਹਾਂ ਨੇ ਇੱਕ ਪਾਵਰਪੁਆਇੰਟ ਲੈਕਚਰ ਪੇਸ਼ ਕੀਤਾ, ਜਿਸ ਵਿੱਚ ਸਾਈਬਰ ਅਪਰਾਧ ਨੂੰ ਕੰਪਿਊਟਰ ਜਾਂ ਨੈਟਵਰਕਾਂ ਨਾਲ਼ ਜੁੜੀ ਕਿਸੇ ਵੀ ਗੈਰ-ਕਾਨੂੰਨੀ ਗਤੀਵਿਧੀ ਬਾਬਤ ਜਾਣਾਕਰੀ ਦੇ ਨਾਲ਼ ਅਣਅਧਿਕਾਰਤ ਪਹੁੰਚ, ਡੈਟਾ ਚੋਰੀ ਅਤੇ ਡਿਜ਼ੀਟਲ ਧੋਖਾਧੜੀ ਸ਼ਾਮਲ ਸਨ ।
ਸਰੋਤ ਵਕਤਾ ਨੇ ਮੁੱਢਲੀ ਹੈਕਿੰਗ ਤੋਂ ਲੈ ਕੇ ਆਧੁਨਿਕ ਫਿਸ਼ਿੰਗ, ਰੈਨਸਮਵੇਅਰ ਅਤੇ ਏ.ਆਈ-ਸੰਚਾਲਿਤ ਹਮਲਿਆਂ ਤੱਕ ਸਾਈਬਰ ਖਤਰਿਆਂ ਦੇ ਵਿਕਾਸ `ਤੇ ਚਾਨਣਾ ਪਾਇਆ, ਜਦੋਂ ਕਿ ਵਿਦਿਆਰਥੀਆਂ ਨੂੰ ਡੀਪ ਫੇਕ ਅਤੇ ਆਈ.ਓ.ਟੀ ਉਲੰਘਣਾ ਵਰਗੇ ਉੱਭਰ ਰਹੇ ਜੋਖਮਾਂ ਬਾਰੇ ਸਾਵਧਾਨ ਕੀਤਾ।ਉਹਨਾਂ ਨੇ ਚੋਰੀ, ਵਿੱਤੀ ਧੋਖਾਧੜੀ ਅਤੇ ਸੋਸ਼ਲ ਮੀਡੀਆ ਨਾਲ਼ ਸਬੰਧਤ ਅਪਰਾਧਾਂ ਸਮੇਤ ਸਾਈਬਰ ਅਪਰਾਧ ਦੇ ਵੱਖ-ਵੱਖ ਰੂਪਾਂ ਬਾਰੇ ਦੱਸਦਿਆਂ ਵਿਦਿਆਰਥੀਆਂ ਨੂੰ ਧੋਖਾਧੜੀ ਦੀ ਤੁਰੰਤ ਰਿਪੋਰਟਿੰਗ ਲਈ ਰਾਸ਼ਟਰੀ ਸਾਈਬਰ ਅਪਰਾਧ ਰਿਪੋਰਟਿੰਗ ਪੋਰਟਲ ਅਤੇ 24/7 ਹੈਲਪਲਾਈਨ 1930 ਬਾਰੇ ਜਾਣਕਾਰੀ ਦਿੱਤੀ।ਮੁੱਖ ਸਾਈਬਰ ਸੁਰੱਖਿਆ ਅਭਿਆਸਾਂ ਅਤੇ ਗੁੰਮ ਹੋਏ ਜਾਂ ਚੋਰੀ ਹੋਏ ਮੋਬਾਈਲ ਫੋਨਾਂ ਨੂੰ ਬਲਾਕ ਕਰਨ ਲਈ ਸੀ.ਈ.ਆਈ.ਆਰ ਪੋਰਟਲ `ਤੇ ਵੀ ਚਰਚਾ ਕੀਤੀ ਗਈ।
ਪ੍ਰਿੰਸੀਪਲ ਡਾ. ਪੁਸ਼ਪਿੰਦਰ ਵਾਲੀਆ ਨੇ ਪੀ.ਜੀ ਵਿਭਾਗ ਆਫ਼ ਕੰਪਿਊਟਰ ਸਾਇੰਸ ਅਤੇ ਐਪਲੀਕੇਸ਼ਨ ਦੇ ਉਪਰਾਲੇ ਦੀ ਸ਼ਲਾਘਾ ਕੀਤੀ ਅਤੇ ਕਿਹਾ ਕਿ ਮੌਜ਼ੂਦਾ ਡਿਜ਼ੀਟਲ ਯੁੱਗ ਵਿੱਚ ਸਾਈਬਰ ਜਾਗਰੂਕਤਾ ਜਰੂਰੀ ਹੋ ਗਈ ਹੈ। ਉਨ੍ਹਾਂ ਕਿਹਾ ਕਿ ਵਿਦਿਅਕ ਸੰਸਥਾਵਾਂ ਦੀ ਜਿੰਮੇਵਾਰੀ ਹੈ ਕਿ ਉਹ ਵਿਦਿਆਰਥੀਆਂ ਨੂੰ ਆਨਲਾਈਨ ਆਪਣੇ ਆਪ ਨੂੰ ਸੁਰੱਖਿਅਤ ਰੱਖਣ ਲਈ ਲੋੜੀਂਦੇ ਗਿਆਨ ਅਤੇ ਵਿਸ਼ਵਾਸ਼ ਨਾਲ਼ ਲੈਸ ਕਰਨ।
ਇਸ ਮੌਕੇ ਡਾ. ਅਨੀਤਾ ਨਰਿੰਦਰ, ਡਾ. ਸੁਸ਼ੀਲ ਕੁਮਾਰ ਅਤੇ ਡਾ. ਪਲਵਿੰਦਰ ਸਿੰਘ ਅਤੇ ਵਿਦਿਆਰਥੀ ਸ਼ਾਮਲ ਰਹੇ ।