Punjab Post Daily Online Newspaper & Print Media
ਸੜਕਾਂ ਤੋਂ ਭਰੂਣ ਮਿਲਣ ਨਾ ਕਦੇ ਵੀ ਨੰਨੀਆਂ ਜਾਨਾਂ ਦੇ,
ਸਰਹੱਦਾਂ ਉਤੇ ਸਿਰ ਨਾ ਲੱਥਣ ਸਾਡੇ ਹੋਰ ਜੁਆਨਾਂ ਦੇ।
ਕਿਸਾਨੀ ਦੇ ਸਿਰੋਂ ਲਹਿ ਜੇ ਕਰਜਾ ਸਾਰਾ ਸ਼ਹੂਕਾਰਾਂ ਦਾ,
ਸਭ ਲਈ ਖੁਸ਼ੀਆਂ ਖੇੜੇ ਲੈ ਕੇ ਆਵੇ ਵਰਾ ਅਠਾਰਾਂ ਦਾ।
ਮੰਜ਼ਲ ਨੂੰ ਪਾ ਲੈਣ ਦਾ ਦਾਤਾ ਹਰ ਇਕ ਨੂੰ ਜਨੂੰਨ ਦੇਈਂ,
ਦੁਖੀਆ ਜੇ ਕੋਈ ਰੋਂਦਾ ਹੋਵੇ ਉਸ ਦਿਲ ਨੂੰ ਸਕੂਨ ਦੇਈਂ।
ਗਲਵੱਕੜੀਆਂ ਫ਼ਿਰ ਪੈ ਜਾਵਣ, ਭੁੱਲ ਕੇ ਦੌਰ ਹਥਿਆਰਾਂ ਦਾ
ਸਭ ਲਈ ਖੁਸ਼ੀਆਂ ਖੇੜੇ ਲੈ ਕੇ ਆਵੇ ਵਰ੍ਹਾ ਅਠਾਰਾਂ ਦਾ।
ਹਰ ਗੱਭਰੂ ਮੁਟਿਆਰ ਦੀ ਜਿੰਦਗੀ ਗੁਜ਼ਰੇ ਚਾਈਂ ਚਾਈਂ,
ਕਦੇ ਨਾ ਅੱਗਾਂ ਲੱਗਣ ਬਾਬੇ ਸੂਹੇ ਸਾਲੂ ਤਾਈਂ।
ਬੱਚਿਆਂ ਦੇ ਸਿਰ ਬਾਪ ਦਾ ਸਾਇਆ, ਬਣਿਆ ਰਹੇ ਬਹਾਰ ਦਾ
ਸਭ ਲਈ ਖੁਸ਼ੀਆਂ ਖੇੜੇ ਲੈ ਕੇ ਆਵੇ ਵਰ੍ਹਾ ਅਠਾਰਾਂ ਦਾ।
ਲੀਡਰ ਪਹਿਰਾ ਦੇਣ ਅਸਾਡੇ ਹੱਕ ਸੱਚ ਦੇ ਉੱਤੇ,
ਇਕ ਮੇਰੇ ਪੰਜਾਬ ਦੇ ਦਾਤਾ ਭਾਗ ਜਗਾ ਦੇ ਸੁੱਤੇ।
ਪੰਜਾਬੀ ਵੱਲੀਂ ਰੁਖ ਮੋੜ ਦੇਈਂ ਭੁੱਲ ਗਈਆਂ ਸਰਕਾਰਾਂ ਦਾ
ਸਭ ਲਈ ਖੁਸ਼ੀਆਂ ਖੇੜੇ ਲੈ ਕੇ ਆਵੇ ਵਰ੍ਹਾ ਅਠਾਰਾਂ ਦਾ।
ਵਿੱਚ ਜੁਆਨੀ ਕਦੇ ਨਾ ਵਿਛੜਣ ਇਕ ਦੂਜੇ ਤੋਂ ਸੰਗੀ,
‘ਦੋਦੇ ਵਾਲੇ ਬਲਵਿੰਦਰ ਨੇ ਇਹ ਮੰਗ ਹੈ ਤੈਥੋਂ ਮੰਗੀ।
ਫੇਰ ਦੁਬਾਰਾ ਰਲ ਕੇ ਬੈਠਣ, ਲੱਗ ਜਾਏ ਝੁੰਡ ਯਾਰਾਂ ਦਾ
ਸਭ ਲਈ ਖੁਸ਼ੀਆਂ ਖੇੜੇ ਲੈ ਕੇ ਆਵੇ ਵਰ੍ਹਾ ਅਠਾਰਾਂ ਦਾ।
ਬਲਵਿੰਦਰ ਰਾਏ ਦੋਦਾ
