ਹੱਥੀਂ ਕਿਰਤ ਕਰਨ ਦਾ ਸੁਨੇਹਾ ਦੇਂਦਾ ਕਿਰਤੀ ਮੇਲਾ ਸੰਪਨ

ਕਿਰਤੀਆਂ, ਵਲੰਟੀਅਰਾਂ ਅਤੇ ਕਲਾ ਆਰਟਿਸਟਾਂ ਨੂੰ ਕੀਤਾ ਗਿਆ ਸਨਮਾਨਿਤ

ਅੰਮ੍ਰਿਤਸਰ, 2 ਅਗਸਤ (ਪੰਜਾਬ ਪੋਸਟ – ਜਗਦੀਪ ਸਿੰਘ ਸੱਗੂ) – ਅਰਬਨ ਹਾਟ ਵਿਖੇ ਕਿਰਤੀ ਅਤੇ ਸੱਭਿਆਚਾਰਕ ਮੇਲੇ ਦੇ ਅਖਰੀਲੇ ਦਿਨ ਚਰਖਾ ਕੱਤਣ, ਸਿਲਾਈ ਕਢਾਈ, ਨਾਲੇ ਬੁਨਣਾ, ਕਰੋਸ਼ੀਆਂ, ਗੋਟਾ ਕਢਾਈ ਅਤੇ ਸਵੈਟਰ ਬੁਨਣ ਦੇ ਵਿਰਾਸਤੀ ਮੁਕਾਬਲਿਆਂ ਦਾ ਆਯੋਜਨ ਕੀਤਾ ਗਿਆ ਅਤੇ ਜੇਤੂਆਂ ਨੂੰ ਇਨਾਮ ਵੀ ਦਿਤੇ ਗਏ।40 ਦੇ ਕਰੀਬ ਪ੍ਰਤੀਯੋਗੀਆਂ ਤੇ ਛੋਟੇ-ਛੋਟੇ ਬੱਚਿਆਂ ਨੇ ਵੀ ਇਹਨਾਂ ਮੁਕਾਬਲਿਆਂ ਵਿੱਚ ਉਤਸ਼ਾਹ ਨਾਲ ਹਿੱਸਾ ਲਿਆ।ਪ੍ਰਤੀਯੋਗਤਾ ਦੌਰਾਨ ਪਿੰਗਲਾਵਾੜਾ ਮੁਖੀ ਡਾ. ਇੰਦਰਜੀਤ ਕੌਰ ਮੌਜੂਦ ਰਹੇ।
ਸ਼ਾਮ ਨੂੰ ਸਮੂੰਹ ਕਿਰਤੀਆਂ, ਵਲੰਟੀਅਰਾਂ ਅਤੇ ਕਲਾਂ ਆਰਟਿਸਟਾ ਦਾ ਸਨਮਾਨ ਸਮਾਰੋਹ ਕੀਤਾ ਗਿਆ।ਇਸ ਸਮਾਰੋਹ ਦੀ ਪ੍ਰਧਾਨਗੀ ਕੰਵਰ ਵਿਜੇ ਪ੍ਰਤਾਪ ਸਿੰਘ ਆਈ.ਜੀ ਸਪੈਸ਼ਲ ਓਪਰੇਸ਼ਨ ਗਰੁੱਪ ਅੰਮ੍ਰਿਤਸਰ ਵੱਲੋਂ ਕੀਤੀ ਗਈ।ਨੋਨਿਹਾਲ ਸਿੰਘ ਆਈ.ਪੀ.ਐਸ., ਆਈ.ਜੀ. ਜਲੰਧਰ ਰੇਂਜ ਵਿਸ਼ੇਸ਼ ਮਹਿਮਾਨ ਵਜੋਂ ਸ਼ਾਮਲ ਹੋਏ।ਸਮੂਹ ਕਿਰਤੀਆਂ, ਆਰਟਿਸਟਾਂ ਨੂੰ ਨਾਲ ਦੁਆਰਾ ਨਿਰਮਿਤ ਵੀਡੀਓ ਗੀਤ ਵੀ ਰਲੀਜ਼ ਕੀਤਾ ਗਿਆ। ਇਸ 3 ਮਿੰਟ ਦੇ ਗੀਤ ਵਿਚ ਭਗਤ ਪੂਰਨ ਸਿੰਘ ਜੀ ਦੇ ਉਪਦੇਸ਼ਾਂ ਅਤੇ ਪਿੰਗਲਵਾੜੇ ਦੇ ਵਿਚ ਹੋ ਰਹੀ ਸੇਵਾ ਨੂੰ ਦਰਸ਼ਿਤ ਕੀਤਾ ਗਿਆ ਹੈ।
ਉਪਰੰਤ ਸਰੂਪ ਸਿੰਘ ਕਡਿਆਣਾ ਦੇ ਢਾਡੀ ਜਥੇ ਵਲੋਂ ਢਾਡੀ ਵਾਰਾਂ ਨਾਲ ਗੁਰੂ ਨਾਨਕ ਸਾਹਿਬ,  ਭਾਈ ਲਾਲੋ ਜੀ ਵਲੋਂ ਕੀਤੀ ਕਿਰਤ ਦੀ ਮਹੱਤਤਾ ਅਤੇ ਭਗਤ ਪੂਰਨ ਸਿੰਘ ਵਲੋਂ ਦਿਤੇ ਉਪਦੇਸ਼ਾਂ ਦਾ ਦਾ ਜਸ ਗਾਇਣ ਕੀਤਾ ਗਿਆ।ਆਖੀਰ `ਚ ਕੰਵਰ ਵਿਜੇ ਪ੍ਰਤਾਪ ਸਿੰਘ ਆਈ.ਪੀ.ਐਸ ਅਤੇ ਨੋਨਿਹਾਲ ਸਿੰਘ ਆਈ.ਪੀ.ਐਸ ਨੇ ਅਰਬਨ ਹਾਟ ਦੇ ਸਾਰੇ ਸਟਾਲਾਂ ਨੂੰ ਦੇਖਣ ਵਾਸਤੇ ਗਏ।ਉਪਰੰਤ ਕਿਰਤੀ ਅਤੇ ਸਭਿਆਚਾਰਕ ਮੇਲੇ ਦਾ ਸਮਾਪਨ ਹੋ ਗਿਆ।