ਬੰਦੇ ਦਾ ਤੁਰਨ

ਉਸ ਨੂੰ ਤੁਰਨਾ ਚੰਗਾ ਲੱਗਦਾ ਹੈ
ਚੂੰਕਿ ਤੁਰਦਿਆਂ ਤੁਰਦਿਆਂ
ਉਸਨੂੰ ਜੀਵਨ ਦਾ ਅਭਿਆਸ ਹੋਇਆ ਹੈ
ਉਸ ਲਈ ਤੁਰਨਾ
ਮਹਿਜ਼ ਸ਼ਕਤੀ ਦਾ ਪ੍ਰਦਰਸ਼ਨ ਨਹੀ
ਜਿ਼ੰਦਗੀ ਜੀਊਣ ਦੀ ਮਹਾਰਤ ਹੈ
ਤੇ ਇਸ ਕਲਾਤਮਕ ਸਫਰ ਨੂੰ
ਉਹ ਬਾਖੂਬੀ ਅੰਜ਼ਾਮ ਦਿੰਦਾ ਹੈ
ਤੁਰਨਾ ਉਸਨੂੰ ਸ਼ਾਇਦ
ਇਸ ਲਈ ਵੀ ਚੰਗਾ ਲੱਗਦਾ ਹੈ
ਕਿਉਕਿ ਤੁਰਦਿਆਂ ਤੁਰਦਿਆਂ
ਉਹ ਵਿੱਚ ਵਿਚਾਲੇ ਰੁਕ ਵੀ ਜਾਂਦਾ ਹੈ
ਤੇ ਫੇਰ ਉਹੀ ਸਿਲਸਿਲਾ

ਮੰਜਿ਼ਲ ਚਾਹੇ ਹੋਵੇ ਕੋਸਾਂ ਦੂਰ
ਪ੍ਰੰਤੂ ਤੁਰਣਾ ਨਾ ਹੋਵੇ ਮੁਹਾਲ
ਪੈਰਾਂ ਵਿਚ ਭਾਵੇ ਪੈ ਜਾਣ ਬੇੜੀਆਂ
ਲੇਕਿਨ ਇਸਦੇ ਬਾਵਜੂਦ
ਤੁਰਨਾ ਰਹੇ ਜਾਰੀ—।

ਸੁਖਮਿੰਦਰ ਸੇਖੋ
5/8-ਏ ਘੁੰਮਣ ਨਗਰ,
ਸਰਹਿੰਦ ਰੋਡ ਪਟਿਆਲਾ
ਮੋ – 98145-07693