ਸੱਜਣ ਰੱਬ

ਵੇ ਘੁਮਿਆਰਾ ਬਣਾ ਕੋਈ ਭਾਂਡਾ ਐਸਾ
ਜਿਹੜਾ ਮੇਰੇ ਸੱਜਣ ਰੱਬ ਦੀ ਛੋਹ ਬਣ ਜਾਵੇ।
ਵੇ ਕਿਸਾਨਾਂ ਪਾ ਮਿੱਟੀ ਵਿੱਚ ਕੋਈ ਬੀਜ਼ ਐਸਾ
ਜਿਹੜਾ ਸੱਜਣ ਰੱਬ ਦੇ ਨਾਂ ਦਾ ਫ਼ਲ ਉਗਾਵੇ।
ਵੇ ਮਦਾਰੀਆ ਦਿਖਾ ਕੋਈ ਤਮਾਸ਼ਾ ਐਸਾ
ਜਿਹੜਾ ਸੱਜਣ ਰੱਬ ਦੀ ਝਲਕ ਦਿਖਾਵੇ।
ਵੇ ਲਲਾਰੀਆ ਰੰਗ ਦੇ ਕੋਈ ਦੁਪੱਟਾ ਐਸਾ
ਤਨ ਤੇ ਓੜਿਆਂ ਸੱਜਣ ਰੱਬ ਦੀ ਮਹਿਕ ਆਵੇ।
ਵੇ ਤਰਖਾਣਾਂ ਬਣਾ ਕੋਈ ਬੂਹਾ ਬਾਰੀ ਐਸਾ
ਜਿੱਥੋਂ ਸੱਜਣ ਰੱਬ ਨੂੰ ਤੱਕਣ ਦਾ ਸਬੱਬ ਬਣ ਜਾਵੇ।
ਵੇ ਮੋਚੀਆ ਗੰਢ ਮੇਰਾ ਖਾਹਿਸ਼ਾਂ ਦਾ ਜੋੜ੍ਹਾ ਐਸਾ
ਜਿਹੜਾ ਸੱਜਣ ਰੱਬ ਦੀ ਦਰਗਾਹ ਤੱਕ ਤੋੜ ਨਿਭਾਵੇ।
ਵੇ ਸੁਨਿਆਰਿਆ ਬਣਾ ਕੋਈ ਕੈਂਠਾ ਐਸਾ
ਜਿਹੜਾ ਗਲ ਪਾਇਆਂ ਧੁਰ ਅੰਦਰੋਂ ਸਾਈਂ ਦਾ ਨਾਮ ਜਪਾਵੇ।

ਰਜਿੰਦਰ ਪਾਲ ਕੌਰ ਸੰਧੂ
ਐਮ.ਐਸ.ਸੀ ਕੈਮਿਸਟਰੀ (ਬੀ.ਐਡ)
ਈ.ਟੀ.ਟੀ, ਅਧਿ.ਸ.ਪ੍ਰਾ.ਸ ਸ਼ੁਕਰਪੁਰਾ
ਬਟਾਲਾ (ਗੁਰਦਾਸਪੁਰ)