ਤਰੱਕੀ (ਹਾਸ ਵਿਅੰਗ)

         ਨਿਮਾਣਾ ਸਿਹੁੰ ਦਾ ਇੱਕ ਸਾਥੀ ਪ੍ਰਾਇਮਰੀ ਸਕੂਲ ਵਿੱਚ ਪੜ੍ਹਾਉੰਂਦਾ ਸੀ।ਸਮੇਂ ਨਾਲ ਉਸ ਦੀ ਤਰੱਕੀ ਹੋ ਗਈ। ਉਹ ਮਿਡਲ ਅਤੇ ਹਾਈ ਜਮਾਤਾਂ ਦੇ ਬੱਚਿਆਂ ਨੂੰ ਪੜ੍ਹਾਉਣ ਲੱਗ ਪਿਆ।ਤਰੱਕੀ ਹੋਣ `ਤੇ ਨਿਮਾਣਾ ਉਸ ਦੇ ਘਰ ਮੁਬਾਰਕ ਦੇਣ ਗਿਆ।ਉਸ ਦੇ ਰਿਸ਼ਤੇਦਾਰਾਂ ਵਿੱਚੋਂ ਇੱਕ ਅਧਿਆਪਕਾ ਵੀ ਉਸ ਨੂੰ ਮੁਬਾਰਕ ਦੇਣ ਆਈ।”ਬਹੁਤ ਚੰਗਾ ਹੋਇਆ ਭਾਅ-ਜੀ, ਤੁਸੀਂ ਉਪਰ ਚਲੇ ਗਏ।ਨਾਲ ਆਏ ਆਪਣੇ ਪਤੀ ਵੱਲ ਇਸ਼ਾਰਾ ਕਰਕੇ, ਇਹ ਕਹਿੰਦੇ ਉਪਰ ਜਾ ਕੇ ਬੰਦੇ ਦੀ ਜਾਨ ਸੌਖੀ ਹੋ ਜਾਂਦੀ, ਨਿੱਕੇ-ਨਿੱਕੇ ਬੱਚੇ ਤਾਂ ਸਿਰ ਹੀ ਖਾਅ ਜਾਂਦੇ, ਸਾਰਾ ਦਿਨ ਇਹਨਾਂ ਨਾਲ ਸਿਰ ਖਪਾਈ ਉਮਰ ਤੋਂ ਪਹਿਲਾਂ ਹੀ ਬੁੱਢਿਆਂ ਕਰ ਦਿੰਦੀ।ਤੁਸੀਂ ਬਹੁਤ ਚੰਗੇ ਰਹੇ ਭਾਅ ਜੀ ਉਪਰ ਜਾ ਕੇ, ਯਕੀਨ ਜਾਣਿਓਂ! ਉਪਰ ਜਾ ਕੇ ਬੰਦੇ ਦੀ ਉਮਰ ਵਧ ਜਾਂਦੀ ਜੇ।”
                ਤਰੱਕੀ ਦੀ ਖੁਸ਼ੀ ਵਿੱਚ ਘਰ ਦੇ ਮੈਂਬਰ ਆਏ ਮਹਿਮਾਨਾਂ ਦਾ ਜਿਥੇ ਮੂੰਹ ਮਿੱਠਾ ਕਰਵਾ ਰਹੇ ਸਨ, ਉਥੇ ਨਿਮਾਣਾ ਅਧਿਆਪਕਾ ਦੇ ਕਹੇ ਬੋਲਾਂ ਵਿਚੋਂ ਨਿਕਲਦੇ ਦੋਹਰੇ ਅਰਥਾਂ ਨੂੰ ਸਮਝ ਕੇ ਮੁਸਕਰਾਉਂਦਾ ਸੋਚਦਾ, ਇਹ ਕੇਹੀ ਮੁਬਾਰਕਬਾਦ ਆ—?

ਸੁਖਬੀਰ ਸਿੰਘ ਖੁਰਮਣੀਆਂ
ਅੰਮ੍ਰਿਤਸਰ।
ਮੋ – 98555 12677