ਫਿਲਮ ‘ਨਾਨਕ ਸ਼ਾਹ ਫਕੀਰ’ ਦਾ ਮਿਊਜ਼ਿਕ ਹੋਇਆ ਜਾਰੀ

ਗੁਰੂ ਸਾਹਿਬ ਦਾ ਕਿਰਦਾਰ ਕੰਪਿਊਟਰ ਗ੍ਰਾਫਿਕ ਅਤੇ ਅਵਾਜ਼ ਕੰਪਿਊਟਰ ਰਾਹੀਂ ਦੇਣ ਦਾ ਕੀਤਾ ਦਾਅਵਾ

ਨਵੀਂ ਦਿੱਲੀ, 7 ਅਪ੍ਰੈਲ (ਅੰਮ੍ਰਿਤ ਲਾਲ ਮੰਨਣ) –  ਵਿਵਾਦਾਂ ਵਿੱਚ ਘਿਰੀ ਫਿਲਮ ‘ਨਾਨਕ ਸ਼ਾਹ ਫਕੀਰ’ ਦਾ ਅੱਜ ਮਿਊਜਿਕ ਲਾਂਚ ਕੀਤਾ ਗਿਆ।ਇਥੋ ਦੇ ਲੀ ਮੇਰੀਡਿਅਨ ਹੋਟਲ ਵਿਖੇ ਹੋਏ ਪ੍ਰਭਾਵਸ਼ਾਲੀ ਸਮਾਗਮ ਦੌਰਾਨ 2 ਵਾਰ ਦੇ ਆਸਕਰ ਅਵਾਰਡ ਜੇਤੂ ਏ.ਆਰ. ਰਹਿਮਾਨ, ਪੰਡਿਤ ਜਸਰਾਜ, ਬਾਲੀਵੁਡ ਦੇ ਉੱਘੇ ਗਾਇਕ ਕੈਲਾਸ਼ ਖੇਰ ਤੇ ਹਰਸ਼ਦੀਪ ਕੋਰ, ਸ੍ਰੀ ਦਰਬਾਰ ਸਾਹਿਬ ਦੇ ਸਾਬਕਾ ਹਜ਼ੂਰੀ ਰਾਗੀ ਭਾਈ ਨਿਰਮਲ ਸਿੰਘ ਖਾਲਸਾ, ਉੱਘੇ ਸੰਗੀਤਕਾਰ ਉੱੱਤਮ ਸਿੰਘ ਅਤੇ ਆਸਕਰ ਜੇਤੂ ਸੰਗੀਤਕਾਰ ਰਸੂਲ ਪੂਕਤੀ ਨੇ ਫਿਲਮ ਨਿਰਮਾਤਾ ਹਰਿੰਦਰ ਸਿੰਘ ਸਿੱਕਾ ਦੀ ਮੌਜੂਦਗੀ ‘ਚ ਫਿਲਮ ਦੇ ਮਿਯੂਜ਼ਿਕ ਦੀ ਸੀ.ਡੀ. ਜਾਰੀ ਕੀਤੀ।
ਇਸ ਫਿਲਮ ਦੇ ਨਿਰਮਾਣ ਦੌਰਾਨ ਇਨ੍ਹਾਂ ਮਸ਼ਹੂਰ ਹਸਤੀਆਂ ਦੇ ਸ਼ਾਮਿਲ ਹੋਣ ਦੀ ਗੱਲ ਕਰਦੇ ਹੋਏ ਸਿੱਕਾ ਨੇ ਦਾਅਵਾ ਕੀਤਾ ਕਿ ਉਨ੍ਹਾਂ ਦੀ ਫਿਲਮ ਕੌਮਾਂਤਰੀ ਮਿਆਰਾਂ ਨੂੰ ਧਿਆਨ ‘ਚ ਰੱਖ ਕੇ ਬਣਾਈ ਗਈ ਹੈ, ਜਿਸ ਵਿਚ ਦਿਖਾਈ ਗਈ ਡਾਇਰੈਕਸ਼ਨ, ਸਿਨਮੈਟੋਗ੍ਰਾਫੀ ਅਤੇ ਮਿਊਜਿਕ ਹਾਲੀਵੂਡ ਦੀਆਂ ਫਿਲਮਾਂ ਨੂੰ ਵੀ ਮਾਤ ਦਿੰਦਾ ਹੈ।ਸ੍ਰੀ ਗੁਰੂ ਨਾਨਕ ਦੇਵ ਜੀ ਦੀਆਂ ਸਿੱਖਿਆਵਾਂ ਨੂੰ ਦਰਸ਼ਕਾਂ ਤੱਕ ਪਹੁੰਚਾਉਣ ਵਾਸਤੇ ਸਿੱਕਾ ਵੱਲੋਂ ਭਰਪੁਰ ਖੋਜ ਫਿਲਮ ਦੀ ਟੀਮ ਵੱਲੋਂ ਕਰਨ ਦਾ ਵੀ ਦਾਅਵਾ ਕੀਤਾ ਗਿਆ। ਸਿੱਕਾ ਨੇ ਇਸ ਫਿਲਮ ‘ਚ ਸ੍ਰੀ ਗੁਰੂ ਨਾਨਕ ਸਾਹਿਬ ਜੀ ਦੇ ਕਿਰਦਾਰ ਨੂੰ ਕਿਸੇ ਦੁਨਿਆਵੀ ਬੰਦੇ ਵੱਲੋਂ ਨਿਭਾਉਣ ਦੀਆਂ ਲਗਾਈਆਂ ਜਾ ਰਹੀਆਂ ਕਿਆਸ ਅਰਾਈਆਂ ਨੂੰ ਵੀ ਖਾਰਿਜ਼ ਕਰਦੇ ਹੋਏ ਗੁਰੂ ਸਾਹਿਬ ਦਾ ਕਿਰਦਾਰ ਕੰਪਿਊਟਰ ਗ੍ਰਾਫਿਕ ਰਾਹੀਂ ਦਿਖਾਉਣ ਅਤੇ ਅਵਾਜ਼ ਵੀ ਕੰਪਿਊਟਰ ਰਾਹੀਂ ਦੇਣ ਦਾ ਦਾਅਵਾ ਕੀਤਾ।ਇਸ ਜਾਰੀ ਕੀਤੀ ਗਈ ਐਲਬਮ ‘ਚ ਕੁਲ 10 ਸ਼ਬਦ ਸ਼ਾਮਿਲ ਹਨ ਜਿਨ੍ਹਾਂ ਨੂੰ ਅਵਾਜ਼ ਭਾਈ ਨਿਰਮਲ ਸਿੰਘ, ਸੋਨੂੰ ਨਿਗਮ, ਕੈਲਾਸ਼ ਖੇਰ, ਮਾਸਟਰ ਸਲੀਮ, ਹਰਭਜਨ ਮਾਨ, ਸਪਨਾ ਮੁਖਰਜੀ ਸਣੇ ਕਈ ਮੰਨੇ ਪ੍ਰਮੰਨੇ ਗਾਇਕਾਂ ਨੇ ਦਿੱਤੀ ਹੈ।
ਏ.ਆਰ ਰਹਿਮਾਨ ਨੇ ਇਸ ਫਿਲਮ ਨੂੰ ਆਪਣੇ ਦਿਲ ਦੇ ਨਜ਼ਦੀਕ ਦੱਸਦੇ ਹੋਏ ਭਵਿਖ ‘ਚ ਵੀ ਇਸ ਤਰ੍ਹਾਂ ਦੀਆਂ ਫਿਲਮਾਂ ‘ਚ ਕੰਮ ਕਰਨ ਵਾਸਤੇ ਆਪਣੀ ਹਾਮੀ ਭਰੀ।ਉਤਮ ਸਿੰਘ ਨੇ ਕਿਹਾ ਕਿ ਫਿਲਮ ਦੇ ਸੰਗੀਤ ਰਾਹੀਂ ਗੁਰੂ ਨਾਨਕ ਸਾਹਿਬ ਨੂੰ ਮਨਣ ਵਾਲਿਆਂ ਤੋਂ ਇਲਾਵਾ ਦੁੂਸਰੇ ਲੋਕਾਂ ਵੱਲੋਂ ਵੀ ਪ੍ਰਭੂ ਉਸਤੱਤ ਦੇ ਇਨ੍ਹਾਂ ਸ਼ਬਦਾ ਦੀ ਸ਼ਲਾਘਾ ਕੀਤੀ ਜਾਵੇਗੀ। ਪੰਡਿਤ ਜਸਰਾਜ ਨੇ ਭਾਰਤੀ ਸੰਗੀਤ ‘ਚ ਗੁਰਬਾਣੀ ਸੰਗੀਤ ਦੀ ਵਿਸ਼ੇਸ਼ ਥਾਂ ਹੋਣ ਦੀ ਗੱਲ ਕਰਦੇ ਹੋਏ ਕਿਹਾ ਕਿ ਦੇਸ਼ ਦਾ ਕੋਈ ਵੀ ਸੰਗੀਤ ਭਾਂਵੇ ਉਹ ਬੰਗਲਾ, ਨੋਰਥ ਇੰਡੀਅਨ ਜਾਂ ਕਰਨਾਟਕਾ ਸੰਗੀਤ ਹੋਵੇ ਪਰ ਗੁਰਬਾਣੀ ਗਾਇਨ ਦੇ 32 ਰਾਗਾਂ ਦੇ ਸੰਗੀਤ ਦਾ ਉਹ ਮੁਕਾਬਲਾ ਨਹੀਂ ਕਰ ਸਕਦੇ।

         ਜਿਕਰਯੋਗ ਹੈ ਕਿ ਇਸ ਫਿਲਮ ਦੇ ਕੁੱਝ ਦ੍ਰਿਸ਼ਾਂ ‘ਤੇ ਇਤਰਾਜ਼ ਜਤਾਉਂਦਿਆਂ ਇਸ ਦੀ ਰਲੀਜ਼ ‘ਤੇ ਰੋਕ ਲਾਉਣ ਲਈ ਵੱਖ-ਵੱਖ ਸਿੱਖ ਜਥੇਬੰੰਦੀਆਂ ਵਲੋਂ ਮੰਗ ਕੀਤੀ ਜਾ ਰਹੀ ਹੈ ਅਤੇ ਇਸ ਮਾਮਲਾ ਸ੍ਰੀ ਅਕਾਲ ਤਖਤ ਸਾਹਿਬ ਦੇ ਜਥੇਦਾਰ ਗਿਆਨੀ ਗੁਰਬਚਨ ਸਿੰਘ ਪਾਸ ਵੀ ਉਠਾਇਆ ਗਿਆ ਹੈ, ਜਿੰਨਾਂ ਨੇ ਇਹ ਮਾਮਲਾ ਸ਼੍ਰੋਮਣੀ ਕਮੇਟੀ ਅਧਿਕਾਰ ਖੇਤਰ ਦਾ ਦੱਸ ਕੇ ਉਸ ਨੂੰ ਕਾਰਵਾਈ ਕਰਨ ਲਈ ਕਿਹਾ ਹੈ।