ਦਲ ਖਾਲਸਾ ਦੇ ਸੱਦੇ ‘ਤੇ ਅੰਮ੍ਰਿਤਸਰ ਬੰਦ ਰਿਹਾ

ਅੰਮ੍ਰਿਤਸਰ, 6 ਜੂਨ (ਗੁਰਚਰਨ ਸਿੰਘ) – ਘੱਲੂਘਾਰਾ ਦਿਵਸ ‘ਤੇ ਦਲ ਖਾਲਸਾ ਵੱਲੋਂ ਦਿੱਤੇ ਗਏ ਬੰਦ ਦੇ ਸੱਦੇ ਨੂੰ ਅੰਮ੍ਰਿਤਸਰ ਵਿੱਚ ਭਰਵਾਂ ਹੁੰਗਾਰਾ ਮਿਲਿਆ। ਸ਼ਹਿਰ ਦੀਆਂ ਪ੍ਰਮੁੱਖ ਮਾਰਕੀਟਾਂ, ਬਜ਼ਾਰ, ਨਿੱਜੀ ਅਦਾਰੇ ਤੇ ਸਕੂਲ ਬੰਦ ਰਹੇ।ਇਸ ਬੰਦ ਦੌਰਾਨ ਕਿਸੇ ਵੀ ਮੰਦਭਾਗੀ ਘਟਨਾ ਨੂੰ ਰੋਕਣ ਲਈ ਜਿਲ੍ਹਾ ਤੇ ਪੁਲਿਸ ਪ੍ਰਾਸ਼ਸ਼ਨ ਵੱਲੋਂ ਸੁਰੱਖਿਆ ਦੇ ਕਰੜੇ ਇੰਤਜਾਮ ਕੀਤੇ ਗਏ ਸਨ ਅਤੇ ਪ੍ਰਮੁੱਖ ਚੌਂਕਾਂ ਤੇ ਬਜ਼ਾਰਾਂ ਵਿੱਚ ਪੁਲਿਸ ਜਵਾਨ ਤਾਇਨਾਤ ਸਨ।
ਸ਼ਹਿਰ ਵਿੱਚ ਅਮਨ ਤੇ ਕਨੂੰਨ ਦੀ ਸਥਿਤੀ ਨੂਮ ਬਣਾਏ ਰੱਖਣ ਲਈ ਬੰਦ ਦਾ ਸੱਦਾ ਦੇਣ ਵਾਲੀ ਜਥੇਬੰਦੀ ਦਲ ਖਾਲਸਾ ਤੇ ਉਸ ਦੀਆਂ ਸਹਿਯੋਗੀ ਜਥੇਬੰਦੀਆਂ ਦੇ ਆਗੂਆਂ ਨੂੰ ਵੱਖ-ਵੱਖ ਥਾਵਾਂ ਤੇ ਨਜ਼ਰਬੰਦ ਕਰ ਦਿੱਤਾ ਗਿਆ। ਬੰਦ ਦੌਰਾਨ ਧਰਮ ਸਿੰਘ ਮਾਰਕੀਟ, ਕਟੜਾ ਜੈਮਲ ਸਿੰਘ, ਹਾਲ ਬਜ਼ਾਰ ਕਰਮੋ ਡਿਓੜੀ, ਰਾਮ ਬਾਗ, ਮੈਡੀਸਨ ਮਾਰਕੀਟ, ਬਿਜਲੀ ਮਾਰਕੀਟ, ਲਾਰੈਂਸ ਰੋਡ, ਕੁਵੀਨਜ਼ ਰੋਡ, ਸੁਲਤਾਨਵਿੰਡ ਰੋਡ, ਤਰਨ ਤਾਰਨ ਰੋਡ, ਈਸਟ ਮੋਹਨ ਨਗਰ, ਪਿੰਡ ਸੁਲਤਾਨਵਿੰਡ ਪੂਰੀ ਤਰ੍ਹਾਂ ਬੰਦ ਰਹੇ।

ਕਈ ਥਾਈਂ ਬੈਂਕਾਂ ਵਿੱਚ ਅੱਧਾ ਸ਼ਟਰ ਸੁੱਟ ਕੇ ਕੰਮ ਹੋਇਆ, ਲੇਕਿਨ ਆਵਾਜਾਈ ਨਿਰੰਤਰ ਜਾਰੀ ਰਹੀ।ਡੀ.ਸੀ.ਪੀ ਪੁਲਿਸ ਸ੍ਰੀ ਪਰਮਪਾਲ ਸਿੰਘ ਨੇ ਦੱਸਿਆ ਕਿ ਬੰਦ ਦੌਰਾਨ ਮੁਕੰਮਲ ਸ਼ਾਂਤੀ ਰਹੀ ਅਤੇ ਕਿਧਰੋਂ ਵੀ ਕੋਈ ਮਾੜੀ ਘਟਨਾ ਵਾਪਰਨ ਦੀ ਖਬਰ ਨਹੀਂ ਮਿਲੀ।