’ਆਪ੍ਰੇਸ਼ਨ ਸਮਾਈਲ-2′ ਤਹਿਤ ਮਾਪਿਆਂ ਨਾਲ ਮਿਲਾਏ ਜਾਣਗੇ ਜ਼ਿਲ੍ਹੇ ਵਲੋਂ ਚਾਰ ਬੱਚੇ

ਅੰਮ੍ਰਿਤਸਰ, 4 ਅਗਸਤ (ਜਗਦੀਪ ਸਿੰਘ ਸੱਗੂ)- ਵਿਛੜੇ ਬੱਚਿਆਂ ਨੂੰ ਮਾਪਿਆਂ ਨਾਲ ਮਿਲਾਉਣ ਦੇ ਮਕਸਦ ਨਾਲ ਭਾਰਤ ਸਰਕਾਰ ਅਤੇ ਡਾਇਰੈਕਟਰ ਸਮਾਜਿਕ ਸੁਰੱਖਿਆ ਅਤੇ ਇਸਤਰੀ ਤੇ ਬਾਲ ਵਿਕਾਸ ਵਿਭਾਗ ਪੰਜਾਬ ਵੱਲੋਂ ਜ਼ਿਲ੍ਹੇ ਵਿਚ ਡਿਪਟੀ ਕਮਿਸ਼ਨਰ ਸ੍ਰੀ ਵਰੁਣ ਰੂਜਮ ਦੀ ਅਗਵਾਈ ਹੇਠ ਚਲਾਏ ਜਾ ਰਹੇ ‘ਆਪ੍ਰੇਸ਼ਨ ਸਮਾਈਲ-2’ ਤਹਿਤ ਜ਼ਿਲ੍ਹਾ ਬਾਲ ਸੁਰੱਖਿਆ ਯੂਨਿਟ, ਚਾਈਲਡ ਹੈਲਪ ਲਾਈਨ ਅਤੇ ਪੁਲਿਸ ਵਿਭਾਗ ਦੇ ਸਾਂਝੇ ਉੱਦਮ ਨਾਲ ਬੀਤੇ ਮਹੀਨੇ ਦੌਰਾਨ ਚਾਰ ਬੱਚੇ ਪ੍ਰਾਪਤ ਕੀਤੇ ਗਏ ਹਨ। ਇਹ ਜਾਣਕਾਰੀ ਦਿੰਦਿਆਂ ‘ਆਪ੍ਰੇਸ਼ਨ ਸਮਾਈਲ-2’ ਦੇ ਨੋਡਲ ਅਫ਼ਸਰ ਵਧੀਕ ਡਿਪਟੀ ਕਮਿਸ਼ਨਰ (ਵਿਕਾਸ) ਸ੍ਰੀ ਐਸ. ਪੀ ਆਂਗਰਾ ਨੇ ਦੱਸਿਆ ਕਿ ਇਨ੍ਹਾਂ ਬੱਚਿਆਂ ਵਿਚ ਹਿਮਾਚਲ ਪ੍ਰਦੇਸ਼ ਦੇ ਚੰਬਾ ਜ਼ਿਲ੍ਹੇ ਦੇ ਪਿੰਡ ਡੇਨਕੁੰਡ ਦੀ 16 ਸਾਲਾਂ ਦੀ ਸਿਮਰਨ, ਦਿੱਲੀ ਦੇ ਇੰਦਰਪੁਰੀ ਦੀ ਜੇ. ਜੇ ਕਲੋਨੀ ਦੀ 8 ਸਾਲਾਂ ਦੀ ਨੈਨਾ, ਅਸਾਮ ਦੇ ਜ਼ਿਲ੍ਹਾ ਨਗਾਉਂ ਦੇ ਪਿੰਡ ਸ਼ੈਲਮਾਰੀ ਦਾ 14 ਸਾਲਾਂ ਦਾ ਆਰਿਆਫੁੱਲ ਖ਼ਾਨ ਅਤੇ ਰੈੱਡ ਕਰਾਸ ਤੋਂ ਪ੍ਰਾਪਤ ਹੋਈ ਕੁਝ ਦਿਨਾਂ ਦੀ ਬੱਚੀ ਸ਼ਾਮਿਲ ਹੈ।ਜ਼ਿਲ੍ਹਾ ਬਾਲ ਸੁਰੱਖਿਆ ਯੂਨਿਟ ਵੱਲੋਂ ਪੁਲਿਸ ਵਿਭਾਗ ਦੀ ਮਦਦ ਨਾਲ ਇਨ੍ਹਾਂ ਬੱਚਿਆਂ ਨੂੰ ਉਨ੍ਹਾਂ ਦੇ ਮਾਪਿਆਂ ਨਾਲ ਮਿਲਾਉਣ ਦੀ ਕਾਰਵਾਈ ਚੱਲ ਰਹੀ ਹੈ।