ਕੇਜਰੀਵਾਲ ਵਿੱਚ ਹਿੰਮਤ ਹੈ ਤਾਂ ਅਦਾਲਤ ‘ਚ ਰੋਜ਼ਾਨਾ ਸੁਣਵਾਈ ਲਈ ਅਰਜ਼ੀ ਦੇਵੇ- ਮਜੀਠੀਆ

ਅੰਮ੍ਰਿਤਸਰ, 14 ਅਕਤੂਬਰ (ਜਗਦੀਪ ਸਿੰਘ ਸੱਗੂ)- ਮਾਲ ਤੇ ਲੋਕ ਸੰਪਰਕ ਮੰਤਰੀ ਬਿਕਰਮ ਸਿੰਘ ਮਜੀਠੀਆ ਨੇ ‘ਪਾਪ’ ਪਾਰਟੀ ਦੇ ਕਨਵੀਨਰ ਅਰਵਿੰਦਰ ਕੇਜਰੀਵਾਲ ਨੂੰ ਵੰਗਾਰਦੇ ਹੋਏ ਕਿਹਾ ਹੈ ਕਿ ਜੇਕਰ ਉਸ ਵਿੱਚ ਹਿੰਮਤ ਹੈ ਤਾਂ ਉਹ ਮੇਰੇ ਵੱਲੋਂ ਦਰਜ ਕਰਵਾਏ ਗਏ ਅਪਰਾਧਿਕ ਮਾਣਹਾਨੀ ਦੇ ਕੇਸ ਦੀ ਸੁਣਵਾਈ ਵਿੱਚ ਕੱਲ੍ਹ ਨੂੰ ਅੰਮ੍ਰਿਤਸਰ ਦੀ ਅਦਾਲਤ ਵਿੱਚ ਪੇਸ਼ ਹੋਵੇ ਅਤੇ ਅਦਾਲਤ ਨੂੰ ਕੇਸ ‘ਤੇ ਰੋਜ਼ਾਨਾ ਸੁਣਵਾਈ ਕਰਨ ਲਈ ਬੇਨਤੀ ਕਰੇ, ਨਾ ਕਿ ਆਪਣੇ ਪਾਰਟੀ ਨੇਤਾਵਾਂ ਅਸੀਸ਼ ਖੇਤਾਨ ਜਾਂ ਸੰਜੈ ਸਿੰਘ ਵਾਂਗ ਕੇਸ ਨੂੰ ਲਮਕਾਉਣ ਵਾਲੇ ਪਾਸੇ ਲੱਗੇ। ਅੱਜ ਜਾਰੀ ਪ੍ਰੈੱਸ ਬਿਆਨ ਵਿੱਚ ਮਜੀਠੀਆ ਨੇ ਕਿਹਾ ਕਿ ਕੱਲ੍ਹ ਨੂੰ ਅੰਮ੍ਰਿਤਸਰ ਦੀ ਅਦਾਲਤ ਵਿੱਚ ਕੇਸ ਦੀ ਸੁਣਵਾਈ ਹੈ ਅਤੇ ਜੇਕਰ ਕੇਜਰੀਵਾਲ ਸੱਚਾ ਹੈ ਤਾਂ ਅਦਾਲਤ ਨੂੰ ਰੋਜ਼ਾਨਾ ਕੇਸ ਦੀ ਸੁਣਵਾਈ ਕਰਕੇ ਜਲਦੀ ਫੈਸਲਾ ਕਰਨ ਦੀ ਬੇਨਤੀ ਕਰੇ, ਜਿਸ ਨਾਲ ਸੱਚ-ਝੂਠ ਛੇਤੀ ਸਾਹਮਣੇ ਆ ਜਾਵੇਗਾ। ਉਨ੍ਹਾਂ ਕਿਹਾ ਕਿ ਕੇਜਰੀਵਾਲ ਕੇਸ ਨੂੰ ਜ਼ਿਆਦਾ ਦੇਰ ਲਮਕਾ ਨਹੀਂ ਸਕੇਗਾ ਅਤੇ ਛੇਤੀ ਹੀ ਜੇਲ੍ਹ ਵਿੱਚ ਹੋਵੇਗਾ।