ਪੰਥਕ ਸੇਵਾ ਦਲ ਸਿਆਸੀ ਮੁਫਾਦਾਂ ਲਈ ਉਨ੍ਹਾਂ ਦੇ ਨਾਂ ਦੀ ਦੁਰਵਰਤੋਂ ਨਾ ਕਰੇ – ਬੀਬੀ ਅਰੋੜਾ

ਨਵੀਂ ਦਿੱਲੀ, 20 ਜਨਵਰੀ (ਪੰਜਾਬ ਪੋਸਟ ਬਿਊਰੋ) – ਇਸਤਰੀ ਅਕਾਲੀ ਦਲ ਦਿੱਲੀ ਇਕਾਈ ਦੀ ਆਗੂ ਬੀਬੀ ਸਨਮੀਤ ਕੌਰ ਅਰੋੜਾ ਨੂੰ ਪੰਥਕ ਸੇਵਾ ਦਲ ਵੱਲੋਂ ਬੀਤੇ ਦਿਨੀਂ ਆਪਣੇ ਦਲ ਦੀ ਇਸਤਰੀ ਵਿੰਗ ਦਾ ਪ੍ਰਧਾਨ ਨਿਯੁੱਕਤ ਕਰਨ ਦੇ ਮੀਡੀਆ ਰਾਹੀਂ ਕੀਤੇ ਗਏ ਦਾਅਵੇ ਨੂੰ ਬੀਬੀ ਅਰੋੜਾ ਨੇ ਝੂਠਾ ਕਰਾਰ ਦਿੱਤਾ ਹੈ। ਬੀਬੀ ਅਰੋੜਾ ਨੇ ਕਿਹਾ ਕਿ ਉਹ ਸ਼੍ਰੋਮਣੀ ਅਕਾਲੀ ਦਲ ਦੀ ਕੱਲ ਵੀ ਸਿਪਾਹੀ ਸਨ ਤੇ ਅੱਜ ਵੀ ਪਾਰਟੀ ਦਾ ਹਿੱਸਾ ਹਨ। 18 ਜਨਵਰੀ 2017 ਨੂੰ ਉਨ੍ਹਾਂ ਨੂੰ ਕਥਿਤ ਤੌਰ ’ਤੇ ਪੰਥਕ ਸੇਵਾ ਦਲ ਵੱਲੋਂ ਆਪਣੀ ਇਸਤਰੀ ਵਿੰਗ ਦਾ ਪ੍ਰਧਾਨ ਨਿਯੁਕਤ ਕਰਨ ਦੇ ਮੀਡੀਆ ਨੂੰ ਜਾਰੀ ਕੀਤੇ ਗਏ ਪ੍ਰੈਸ ਨੋਟ ਤੇ ਵੀ ਬੀਬੀ ਅਰੋੜਾ ਨੇ ਸਵਾਲ ਖੜੇ ਕੀਤੇ।

ਉਨ੍ਹਾਂ ਕਿਹਾ ਕਿ 18 ਜਨਵਰੀ ਨੂੰ ਜਦੋਂ ਇਸ ਸਬੰਧੀ ਝੂਠਾ ਪ੍ਰੈਸ ਨੋਟ ਪੰਥਕ ਸੇਵਾ ਦਲ ਵੱਲੋਂ ਜਾਰੀ ਕੀਤਾ ਗਿਆ।ਉਸ ਵੇਲੇ ਉਹ ਦਿੱਲੀ ਕਮੇਟੀ ਪ੍ਰਧਾਨ ਮਨਜੀਤ ਸਿੰਘ ਜੀ.ਕੇ ਵੱਲੋਂ ਪਾਰਟੀ ਦਫਤਰ ਵਿਖੇ 27 ਜਨਵਰੀ ਦੇ ਪ੍ਰੋਗਰਾਮ ਬਾਰੇ ਲਈ ਗਈ ਬੈਠਕ ’ਚ ਮੌਜੂਦ ਸੀ। ਬੀਬੀ ਅਰੋੜਾ ਨੇ ਸਾਫ਼ ਕੀਤਾ ਕਿ ਆਪਣੇ ਗ੍ਰਹਿ ਖੇਤਰ ਲਾਜਪਤ ਨਗਰ ਦੇ ਗੁਰੂ ਰਾਮਦਾਸ ਸੇਵਕ ਜਥੇ ਦੇ ਮੁੱਖੀ ਪਰਮਜੀਤ ਸਿੰਘ ਭਾਟੀਆ ਵੱਲੋਂ ਰੱਖੀ ਗਈ ਮੀਟਿੰਗ ’ਚ ਭਾਗ ਲੈਣ ਲਈ ਉਹ ਬਤੌਰ ਜਥੇ ਦੇ ਮੈਂਬਰ ਵੱਜੋਂ ਗਈ ਸੀ, ਪਰ ਇਸ ਦੌਰਾਨ ਮੇਰੀ ਹਾਜ਼ਰੀ ਨੂੰ ਜਿਸ ਤਰੀਕੇ ਨਾਲ ਨਿਜ਼ੀ ਸਿਆਸੀ ਮੁਫਾਦਾ ਲਈ ਪੰਥਕ ਸੇਵਾ ਦਲ ਨੇ ਵਰਤਣ ਦੀ ਕੋਸ਼ਿਸ਼ ਕੀਤੀ ਹ,ੈ ਉਹ ਚੰਗੇ ਸਿਆਸੀ ਆਚਾਰ-ਵਿਚਾਰ ਦੇ ਦਾਇਰੇ ਵਿਚ ਨਹੀਂ ਆਉਂਦੀ ਹੈ।