ਦਿੱਲੀ ਜਲ ਬੋਰਡ ਦੀ ਲਾਪਰਵਾਹੀ ਨਾਲ ਗੁਰਦੁਆਰਾ ਕੰਪਲੈਕਸ ਦੇ ਨੁਕਸਾਨ ਦਾ ਦਿੱਲੀ ਕਮੇਟੀ ਨੇ ਮੰਗਿਆ ਮੁਆਵਜ਼ਾ

ਨਵੀਂ ਦਿੱਲੀ, 20 ਜਨਵਰੀ (ਪੰਜਾਬ ਪੋਸਟ ਬਿਊਰੋ) – ਦਿੱਲੀ ਸਿੱਖ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਨੇ ਗੁਰਦੁਆਰਾ ਬਾਲਾ ਸਾਹਿਬ ਦੀ ਦੀਵਾਰ ਢਹਿਣ ਤੋਂ ਬਾਅਦ ਗੁਰਦੁਆਰਾ ਕੰਪਲੈਕਸ ਦੇ ਹੋਏ ਮਾਲੀ ਨੁਕਸਾਨ ਦੀ ਏਵਜ਼ ਵਿਚ ਦਿੱਲੀ ਸਰਕਾਰ ਤੋਂ 50 ਲੱਖ ਰੁਪਏ ਦਾ ਮੁਆਵਜਾ ਮੰਗਿਆ ਹੈ। ਦਰਅਸਲ ਦਿੱਲੀ ਜਲ ਬੋਰਡ ਦੀ ਪਾਈਪ ਲਾਈਨ 16 ਜਨਵਰੀ 2017 ਦੀ ਰਾਤ ਨੂੰ ਅਚਾਨਕ ਫੱਟ ਗਈ ਸੀ, ਜਿਸ ਕਰਕੇ ਗੁਰਦੁਆਰਾ ਬਾਲਾ ਸਾਹਿਬ ਦੀ 300 ਫੁੱਟ ਲੰਬੀ ਦੀਵਾਰ ਜਮੀਨਦੋਜ਼ ਹੋ ਗਈ ਸੀ। ਕਮੇਟੀ ਨੇ ਦੀਵਾਰ ਢਹਿਣ ਤੋਂ ਬਾਅਦ ਗੁਰਦੁਆਰਾ ਕੰਪਲੈਕਸ ਵਿਚ ਆਏ ਪਾਣੀ ਦੇ ਸੈਲਾਬ ਦਾ ਹਵਾਲਾ ਦਿੰਦੇ ਹੋਏ ਹੁਣ ਮੁਆਵਜਾ ਮੰਗਿਆ ਹੈ।

ਕਮੇਟੀ ਪ੍ਰਧਾਨ ਮਨਜੀਤ ਸਿੰਘ ਜੀ.ਕੇ ਨੇ ਦਿੱਲੀ ਦੇ ਮੁੱਖਮੰਤਰੀ ਅਰਵਿੰਦ ਕੇਜਰੀਵਾਲ ਨੂੰ ਭੇਜੇ ਪੱਤਰ ’ਚ ਹਾਦਸੇ ਦੀ ਜਾਣਕਾਰੀ ਸਾਂਝੀ ਕਰਦੇ ਹੋਏ ਘਟਨਾ ਨਾਲ ਸਬੰਧਿਤ 16 ਫੋਟੂਆਂ ਵੀ ਨੱਥੀ ਕੀਤੀਆਂ ਹਨ। ਪੱਤਰ ਅਨੁਸਾਰ ਬਰਸਾਤੀ ਪਾਣੀ ਦੀ ਰਿੰਗ ਰੋਡ, ਬਾਬਾ ਬੰਦਾ ਸਿੰਘ ਬਹਾਦਰ ਸੇਤੂ ਦੇ ਨਾਲ  ਤੋਂ ਜਾਂਦੀ ਵੱਡੀ ਪਾਈਪ ਲਾਈਨ ਦੇ ਅਚਾਨਕ ਫੱਟਣ ਕਰਕੇ ਗੁਰਦੁਆਰਾ ਸਾਹਿਬ ਦੀ 13 ਇੰਚ ਮੋਟੀ ਤੇ 13 ਫੁੱਟ ਉ_ਚੀ ਲਗਭਗ 300 ਫੁੱਟ ਲੰਬੀ ਦੀਵਾਰ ਪਾਣੀ ਦੇ ਤੇਜ ਸੈਲਾਬ ਕਰਕੇ ਜਮੀਨਦੋਜ਼ ਹੋ ਗਈ ਹੈ।ਪਾਣੀ ਦੇ ਆਏ ਹੜ ਕਰਕੇ ਹਸਪਤਾਲ ਦੀ ਬੇਸਮੈਂਟ ਅਤੇ ਨਾਲ ਦੀ ਇਮਾਰਤਾਂ ਦਾ ਵੱਡਾ ਨੁਕਸਾਨ ਹੋਇਆ ਹੈ।
ਇਸ ਢਹਿ-ਢੇਰੀ ਨੂੰ ਦਰੁੱਸਤ ਕਰਨ ਵਾਸਤੇ ਕਮੇਟੀ ਵੱਲੋਂ 50 ਲੱਖ ਰੁਪਏ ਦਾ ਖਰਚ ਆਉਣ ਦੀ ਸੰਭਾਵਨਾ ਜਤਾਉਂਦੇ ਹੋਏ ਦਿੱਲੀ ਸਰਕਾਰ ਨੂੰ ਇਸ ਸਬੰਧੀ ਮੁਆਵਜਾ ਦੇਣ ਦੀ ਮੰਗ ਕੀਤੀ ਗਈ ਹੈ। ਕਮੇਟੀ ਵੱਲੋਂ ਦੀਵਾਰ ਦੀ ਉਸਾਰੀ ਨੂੰ ਗੁਰਦੁਆਰਾ ਕੰਪਲੈਕਸ਼ ’ਚ ਸਮਾਜ ਵਿਰੋਧੀ ਅਨਸਰਾਂ ਦੇ ਬਿਨਾ ਰੋਕ-ਟੋਕ ਦਾਖਿਲੇ ਨੂੰ ਰੋਕਣ ਦੀ ਦਿਸ਼ਾ ਵਿਚ ਜਰੂਰੀ ਦੱਸਿਆ ਗਿਆ ਹੈ।