ਗੁਰਬਾਣੀ ਦੀਆਂ ਗਲਤ ਤੁਕਾਂ ਲਿਖ ਕੇ, ਥਾਣਿਆਂ ਵਿਚ ਹੋ ਰਹੀ ਹੈ ਗੁਰਬਾਣੀ ਦੀ ਬੇਅਦਬੀ ?

ਬਠਿੰਡਾ, 7 ਮਈ (ਪੰਜਾਬ ਪੋਸਟ- ਅਵਤਾਰ ਸਿੰਘ ਕੈਂਥ, ਜਸਵਿੰਦਰ ਸਿੰਘ ਜੱਸੀ) – ਇਸ ਨੂੰ ਅਣਪੜ੍ਹਤਾ ਕਿਹਾ ਜਾਵੇ ਜਾਂ ਗੁਰਬਾਣੀ ਨਾਲ ਜਾਣਬੁੱਝ ਕੇ ਕੀਤਾ ਜਾ ਰਿਹਾ ਹੈ ਖਿਲਵਾੜ।ਅੱਜਕਲ੍ਹ ਥਾਣਿਆਂ ਵਿੱਚ ਪਵਿੱਤਰ ਗੁਰਬਾਣੀ ਦੀਆਂ ਗਲਤ ਤੁਕਾਂ ਤਾਂ ਲਿਖੀਆਂ ਆਮ ਮਿਲਦੀਆਂ ਹਨ।ਪਰ ਥਾਣਾ ਸਿਵਲ ਲਾਈਨਜ਼ ਬਠਿੰਡਾ ਵਿਖੇ ਵੀ ਕੁੱਝ ਅਜਿਹਾ ਹੋਇਆ ਹੈ, ਜਿਥੇ ਗੁਰਬਾਣੀ ਦੇ ਪਵਿੱਤਰ ਸ਼ਬਦਾਂ ਨੂੰ ਵਿਗਾੜਿਆ ਗਿਆ ਹੈ।ਥਾਣੇ ਅੰਦਰ ਕੰਧਾਂ ਉਪਰ ਲੱਗੇ ਫਲਕੈਸਾਂ ’ਤੇ ਲਿਖੀਆਂ ਤੁਕਾਂ ਨਾਲ ਸਿੱਖ ਹਿਰਦਿਆਂ ਨੂੰ ਠੇਸ ਪੁੱਜ ਰਹੀ ਹੈ।ਅਜਿਹਾ ਕਿਉਂ ਹੋਇਆ ਹੈ? ਕੀ ਥਾਣੇ ਦੇ ਮੁਲਾਜਮਾਂ ਨੂੰ ਗੁਰਬਾਣੀ ਦਾ ਰਤਾ ਭਰ ਵੀ ਗਿਆਨ ਨਹੀ ? ਸਿੱਖ ਚਿੰਤਕਾਂ ਦਾ ਕਹਿਣਾ ਹੈ ਕਿ ਕਿਸੇ ਸਮੇਂ ਗੁਰੂ ਸਾਹਿਬ ਜੀ ਨੇ ਰਾਮਰਾਏ ਨੂੰ ਇਕ ਸ਼ਬਦ ਬਲਦਣ ਬਦਲੇ ਸਿੱਖੀ ਵਿਚੋਂ ਖਾਰਜ ਕਰ ਦਿੱਤਾ ਸੀ। ਥਾਣੇ ’ਚ ਜੋ ਗੁਰਬਾਣੀ ਦੀ ਤੁਕ ਲਿਖੀ ਗਈ ਹੈ, ਉਹ ਇਸ ਤਰ੍ਹਾਂ ਹੈ ‘‘ਸੋ ਕਿਓ ਮੰਦਾ ਆਖਿਅੇ ਜਿਸ ਜੰਮੇ ਰਾਜਾਨ।।’’ ਜੋ ਕਿ ਪੂਰੀ ਤਰ੍ਹਾਂ ਨਾਲ ਗੁਰਬਾਣੀ ਨਾਲ ਖਿਲਵਾੜ ਹੈ ਜਦੋਂ ਕਿ ਗੁਰਬਾਣੀ ਦੀ ਪਵਿੱਤਰ ਤੁਕ ਹੈ ‘‘‘ਸੋ ਕਿਉ ਮੰਦਾ ਆਖੀਐ ਜਿਤੁ ਜੰਮਹਿ ਰਾਜਾਨ।।’