ਪਿਛਲੇ ਸੱਤ ਮਹੀਂਨੇ ਤੋਂ ਸੜਕ ਤੇ ਖੜ੍ਹਾ ਪਾਣੀ ਬੀਮਾਰੀਆਂ ਨੂੰ ਦੇ ਰਿਹਾ ਸੱਦਾ

ਲਾਪ੍ਰਵਾਹ ਅਧਿਕਾਰੀਆਂ ਤੇ ਨਹੀਂ ਪੈ ਰਿਹਾ ਕੋਈ ਅਸਰ

ਤਰਸਿੱਕਾ, 17 ਜੂਨ (ਕੰਵਲ ਜੋਧਾਨਗਰੀ, ਸੁਖਦੇਵ ਸਿੰਘ) – ਇੱਥੋਂ ਥੋੜੀ ਦੂਰ ਸਥਿਤ ਪਿੰਡ ਧਰਮੂਚੱਕ ਬਲਾਕ ਤਰਸਿੱਕਾ ਵਿਖੇ ਸੜਕ ਬਨਾਉਣ ਸਮੇਂ ਬੰਦ ਕੀਤੇ ਗਏ ਘਰਾਂ ਦੇ ਨਿਕਾਸੀ ਪਾਣੀ ਦਾ ਨਿਕਾਸ ਨਾ ਕੀਤੇ ਜਾਣ ਕਾਰਨ ਤਕਰੀਬਨ 10 ਘਰਾਂ ਦਾ ਗੰਦਾ ਪਾਣੀ ਰਸਤੇ ਤੇ ਖੜ੍ਹਾ ਹੋਣ ਕਾਰਨ ਆਸ ਪਾਸ ਦੇ ਘਰਾਂ ਦੇ ਡਿੱਗਣ ਦਾ ਕਾਰਨ ਬਨਣ ਦੇ ਨਾਲ-ਨਾਲ ਬੀਮਾਰੀਆਂ ਨੂੰ ਸੱਦਾ ਦੇ ਰਿਹਾ ਹੈ।ਇਸ ਸਬੰਧੀ ਜਾਣਕਾਰੀ ਦਿੰਦੇ ਹੋਏ ਭੁਪਿੰਦਰ ਸਿੰਘ ਅਤੇ ਸੁਖਵਿਦਰ ਸਿੰਘ ਨੇ ਦੱਸਿਆ ਕਿ ਉਹ ਬੀ ਡੀ ਪੀ ਓ ਦਫਤਰ ਤਰਸਿੱਕਾ ਵਿਖੇ ਇਸ ਸਬੰਧੀ ਕਈ ਵਾਰ ਦਰਖਾਸਤਾਂ ਦੇ ਚੁੱਕੇ ਹਨ, ਪ੍ਰੰਤੂ ਮਸਲਾ ਹੱਲ ਨਹੀਂ ਕੀਤਾ ਗਿਆ।ਘਰਾਂ ਦਾ ਇਹ ਗੰਦਾ ਪਾਣੀ ਉਨਾਂ ਦੇ ਘਰਾਂ ਦੇ ਨਾਲ ਹੀ ਗਲੀ ਬਾਬਾ ਜੀਵਨ ਦਾਸ ਵਿਖੇ ਖੜ੍ਹਾ ਰਹਿਦਾ ਹੈ, ਜਿਸ ਕਾਰਨ ਘਰਾਂ ਦੀਆਂ ਕੰਧਾਂ ਵਿੱਚ ਸਲਾਭ ਆ ਗਈ ਹੈ ਅਤੇ ਲੋਕਾਂ ਦਾ ਕਿਸੇ ਸਮੇਂ ਵੀ ਜਾਨੀ ਜਾਂ ਮਾਲੀ ਨੁਕਸਾਨ ਹੋ ਸਕਦਾ ਹੈ।
ਉਨਾਂ ਕਿਹਾ ਕਿ ਖੜ੍ਹੇ ਪਾਣੀ ਵਿੱਚੋਂ ਬਦਬੂ ਆ ਰਹੀ ਹੈ ਅਤੇ ਮੱਖੀਆਂ ਮੱਛਰਾਂ ਦੀ ਭਰਮਾਰ ਹੋਣ ਕਾਰਨ ਬੀਮਾਰੀਆਂ ਫੈਲਣ ਦਾ ਵੱਡਾ ਖਤਰਾ ਹੈ। ਉਧਰ ਐਸ. ਡੀ. ਓ, ਐਕਸੀਅਨ ਅਤੇ ਬੀ. ਡੀ. ਪੀ. ਓ ਨਾਲ ਇਸ ਸਬੰਧੀ ਸੰਪਰਕ ਕਰਨ ਦੀ ਕੋਸ਼ਿਸ਼ ਕੀਤੀ ਗਈ, ਪਰ ਉਹਨਾਂ ਨਾਲ ਸੰਪਰਕ ਨਹੀਂ ਹੋ ਸਕਿਆ ।