ਵਾਹਣਾਂ ਵਿੱਚ ਤੇਲ ਦੀ ਥਾਂ ਪਾਣੀ ਭਰਣ ਵਾਲੇ ਪੈਟਰੋਲ ਪੰਪ ਨੂੰ ਕਿਸਾਨਾਂ ਨੇ ਘੇਰਿਆ

ਫ਼ੂਡ ਸਪਲਾਈ ਵਿਭਾਗ ਦੇ ਅਧਿਕਾਰੀਆਂ ਨੇ ਸੀਲ ਕੀਤਾ ਪੰਪ

ਭੀਖੀ, 2 ਅਕਤੂਬਰ (ਪੰਜਾਬ ਪੋਸਟ – ਕਮਲ ਜ਼ਿੰਦਲ) – ਮਾਨਸਾ ਦੇ ਪਿੰਡ ਤਮਕੋਟ ਵਿਖੇ ਚੱਲਦੇ ਇਕ ਪੈਟਰੋਲ ਪੰਪ ਦੀਆਂ ਮਸ਼ੀਨਾਂ ਵਿਚੋਂ ਗ੍ਰਾਹਕਾਂ ਦੇ ਵਹੀਕਲਾਂ ਵਿਚ ਪਟਰੋਲ/ ਡੀਜਲ ਦੀ ਜਗਾ ਪਾਣੀ ਭਰਨ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਤੇਲ ਦੀ ਜਗਾ ਵਹੀਕਲਾਂ ਵਿੱਚ ਪਾਣੀ ਭਰੇ ਜਾਣ ਕਾਰਨ ਗ਼ੁੱਸੇ ਵਿੱਚ ਆਏ ਕਿਸਾਨਾਂ ਨੇ ਪੈਟਰੋਲ ਪੰਪ ਨੂੰ ਘੇਰ ਕੇ ਇਸ ਦੀ ਜਾਣਕਾਰੀ ਅਧਿਕਾਰੀਆਂ ਨੂੰ ਦਿੱਤੇ ਜਾਣ ਤੋਂ ਬਾਅਦ ਮਾਨਸਾ ਦੇ ਫ਼ੂਡ ਸਪਲਾਈ ਵਿਭਾਗ ਨੇ ਪੈਟਰੋਲ ਪੰਪ ਨੂੰ ਸੀਲ ਕਰ ਦਿੱਤਾ ਹੈ
    ਪ੍ਰਾਪਤ ਜਾਣਕਾਰੀ ਅਨੁਸਾਰ ਜਿਲੇ ਦੇ ਪਿੰਡ ਤਮਕੋਟ ਵਿਖੇ ਲੱਗੇ ਹੋਏ ਜੀ.ਐਸ ਆਟੋ ਨਾਮੀ ਪਟਰੋਲ ਪੰਪ `ਤੇ ਪੈਟਰੋਲ ਡੀਜਲ ਵਿੱਚ ਮਿਲਾਵਟ ਕਰਕੇ ਲੋਕਾਂ ਨੂੰ ਪਟਰੋਲ ਡੀਜਲ ਦੀ ਥਾਂ ਪਾਣੀ ਹੀ ਵੇਚਿਆ ਜਾਂਦਾ ਸੀ ਅਤੇ ਇਸ ਪੰਪ `ਤੇ ਤੇਲ ਵਿੱਚ ਮਿਲਾਵਟ ਕਰ ਕੇ ਚਲਾਏ ਜਾਂਦੇ ਗੋਰਖ ਧੰਦੇ ਦੀ ਜਾਣਕਾਰੀ ਨੇੜਲੇ ਪਿੰਡਾਂ ਦੇ ਕਿਸਾਨਾਂ ਨੂੰ ਹੋਣ ਕਾਰਨ ਕਿਸਾਨਾਂ ਵਲੋਂ ਇਸ ਪੰਪ ਤੇ ਨਿਗਰਾਨੀ ਰੱਖੀ ਹੋਈ ਸੀ ਅਤੇ ਅੱਜ ਜਦ ਇਸ ਪਟਰੋਲ ਪੰਪ ਦੇ ਕਰਿੰਦਿਆਂ ਵਲੋਂ ਲੋਕਾਂ ਦੇ ਵਹੀਕਲਾਂ ਵਿੱਚ ਪਟਰੋਲ ਡੀਜਲ ਦੀ ਥਾਂ ਪਾਣੀ ਭਰ ਕੇ ਵੇਚਿਆ ਜਾ ਰਿਹਾ ਸੀ ਤਾਂ ਕਿਸਾਨਾਂ ਨੇ ਇਕੱਠੇ ਹੋ ਕੇ ਪੰਪ ਨੂੰ ਘੇਰ ਲਿਆ ਅਤੇ ਵਹੀਕਲਾਂ ਵਿੱਚ ਤੇਲ ਦੀ ਥਾਂ ਪਾਣੀ ਭਰੇ ਜਾਣ ਦੇ ਮਾਮਲੇ ਦਾ ਪਰਦਾਫਾਸ਼ ਕੀਤਾ।ਕਿਸਾਨ ਮਹਿੰਦਰ ਸਿੰਘ ਅਤੇ ਭਾਨ ਸਿੰਘ ਨੇ ਦੱਸਿਆ ਕਿ ਕਾਫੀ ਸਮੇਂ ਤੋਂ ਇਸ ਪਟਰੋਲ ਪੰਪ `ਤੇ ਮਿਲਾਵਟ ਕਰਕੇ ਲੋਕਾਂ ਨਾਲ ਧੋਖਾਧੜੀ ਕੀਤੀ ਜਾ ਰਹੀ ਸੀ।ਅੱਜ ਉਨਾਂ ਨੇ ਤੇਲ ਦੀ ਜਗਾ ਪਾਣੀ ਵੇਚ ਰਹੇ ਇਨਾਂ ਪੰਪ ਮਾਲਕਾਂ ਨੂੰ ਰੰਗੇ ਹੱਥੀਂ ਕਾਬੂ ਕਰਕੇ ਇਸ ਗੋਰਖ ਧੰਦੇ ਦਾ ਪਰਦਾ ਫਾਸ਼ ਕੀਤਾ ਹੈ ਊਨਾ ਪੰਪ ਮਾਲਕਾਂ ਖਿਲਾਫ ਸਖਤ ਕਾਰਵਾਈ ਦੀ ਮੰਗ ਕੀਤੀ ਹੈ ।
ਇਸ ਮੌਕੇ ਪਹੁੰਚੇ ਫ਼ੂਡ ਸਪਲਾਈ ਅਧਿਕਾਰੀਆਂ ਨੇ ਪੰਪ ਨੂੰ ਸੀਲ ਕਰ ਦਿੱਤਾ ਹੈ।ਫ਼ੂਡ ਸਪਲਾਈ ਮਾਨਸਾ ਦੇ ਇੰਸਪੈਕਟਰ ਮਨੋਜ ਗੋਇਲ ਨੇ ਦੱਸਿਆ ਕਿ ਪਟਰੋਲ ਪੰਪ ਦੀਆਂ ਮਸ਼ੀਨਾਂ ਵਿਚੋਂ ਪਟਰੋਲ/ ਡੀਜਲ ਦੀ ਥਾਂ `ਤੇ ਪਾਣੀ ਆ ਰਿਹਾ ਸੀ, ਜਿਸ ਕਾਰਨ ਉਨ੍ਹਾਂ ਵਲੋਂ ਪੰਪ ਨੂੰ ਸੀਲ ਕਰਕੇ ਸਬੰਧਤ ਕੰਪਨੀ ਨੂੰ ਸੂਚਿਤ ਕਰ ਦਿੱਤਾ ਹੈ।
ਦੂਜੇ ਪਾਸੇ ਇਸ ਪਟਰੋਲ ਪੰਪ ਦੇ ਮਾਲਕ ਰੋਹਿਤ ਬਾਂਸਲ ਨੇ ਇਸ ਮਾਮਲੇ ਤੋਂ ਆਪਣੇ ਆਪ ਨੂੰ ਅਣਜਾਣ ਦੱਸਦਿਆਂ ਕਿਹਾ ਕਿ ਕੱਲ ਪੰਪ `ਤੇ ਤੇਲ ਦੀ ਗੱਡੀ ਆਈ ਸੀ ਤੇਲ ਵਿੱਚ ਪਾਣੀ ਕਿਵੇ ਮਿਕਸ ਹੋਇਆ ਹੈ, ਜਾਂਚ ਕਰਕੇ ਹੀ ਪਤਾ ਲੱਗੇਗਾ।