ਗੰਗਾਧਰ ਹੀ ਸ਼ਕਤੀਮਾਨ ਏ (ਕਾਵਿ ਵਿਅੰਗ)

ਦਿੱਲੀ ‘ਚ ਝਾੜੂ ਦੀ ਜਿੱਤ ਹੋਈ, ਵਿਰੋਧੀ ਖਿੱਚ ਨਾ ਸਕੇ ਲੋਕਾਂ ਦਾ ਧਿਆਨ ਮੀਆਂ
ਲੋਕਤੰਤਰ ਦੇ ਮੈਦਾਨ ਅੰਦਰ ਜਿੱਤ ਲਈ, ਸਭ ਨੇ ਪੁੱਠੇ ਸਿੱਧੇ ਦਾਗੇ ਸੀ ਬਿਆਨ ਮੀਆਂ

ਕੇਜਰੀਵਾਲ ਨੇ ਸਭ ਨੂੰ ਮਾਫ ਕੀਤਾ,ਤੇ ਜਨਤਾ ਦਾ ਮੰਨਿਆ ਅਹਿਸਾਨ ਮੀਆਂ
ਧਰਮ ਦੀ ਰਾਜਨੀਤੀ ਵੰਡ ਪਾਉਂਦੀ, ਚੰਗੇ ਕੰਮ ਕਰੀਏ ਤਾ ਰਹਿੰਦਾ ਏ ਈਮਾਨ ਮੀਆਂ

ਗੱਪਾਂ ਜਾਂ ਝੂਠੀਆਂ ਸੌਹਾਂ ਨਾਲ ਨਾ ਦੇਸ਼ ਚੱਲਦੇ, ਏਸ ਗੱਲ ਦਾ ਰੱਖਿਓ ਧਿਆਨ ਮੀਆਂ
ਨਾਲ ਨਸ਼ਿਆਂ ਚੁੱਲੇ ਹੋਏ ਠੰਡੇ, ਤੇ ਪਿੰਡ ਪਿੰਡ ਤੱਪਦੇ ਨੇ ਹੁਣ ਤਾਂ ਸਮਸ਼ਾਨ ਮੀਆਂ

ਕਈ ਆਪਣੇ ਮੁਨਾਫੇ ਲਈ ਦੇਸ਼ ਨੂੰ ਲੁੱਟੀ ਜਾਂਦੇ, ਡਾਢੇ ਬਣੇ ਕਿਓਂ ਹੈਵਾਨ ਮੀਆਂ
ਵਾੜ ਹੀ ਖੇਤ ਨੂੰ ਲੋਕੋ ਖਾਣ ਲੱਗੀ ਤੇ ਹਦੋਂ ਵੱਧ ਕਰੀ ਜਾਂਦੀ ਏ ਨੁਕਸਾਨ ਮੀਆਂ

ਜੇ ਪੰਜਾਬ ਨੂੰ ਹੱਸਦਾ ਵੇਖਣਾ ਹੈ, ਤਾਂ ਬਦਲਣਾ ਪਊ ਵਾਰੋ ਵਾਰੀ ਦਾ ਰੁਝਾਨ ਮੀਆਂ
ਲੋਕੋ ਸੰਧੂ ਤਾਂ ਕਦ ਦਾ ਰੌਲਾ ਪਾਈ ਜਾਂਦਾ, ਕਿ ਗੰਗਾਧਰ ਹੀ ਹੈ ਸ਼ਕਤੀਮਾਨ ਮੀਆਂ।

ਬਲਤੇਜ ਸੰਧੂ ਬੁਰਜ਼
ਮੋ – 94658 18158