ਖ਼ਾਲਸਾ ਕਾਲਜ ਇੰਜੀਨੀਅਰਿੰਗ ਨੇ ਸੀ.ਪੀ.ਐਸ. ਲੈਬ ਸਬੰਧੀ ਆਈ.ਆਈ.ਟੀ ਨਾਲ ਕੀਤਾ ਸਮਝੌਤਾ

ਅੰਮ੍ਰਿਤਸਰ, 26 ਸਤੰਬਰ (ਸੁਖਬੀਰ ਸਿੰਘ ਖੁਰਮਣੀਆਂ) – ਖਾਲਸਾ ਕਾਲਜ ਆਫ਼ ਇੰਜੀਨੀਅਰਿੰਗ ਐਂਡ ਟੈਕਨਾਲੋਜੀ ਰਣਜੀਤ ਐਵਨਿਊ ਨੇ ਨਵੀਨਤਾ ਅਤੇ ਡੂੰਘੀ ਤਕਨੀਕੀ ਤਰੱਕੀ ਨੂੰ ਉਤਸ਼ਾਹਿਤ ਕਰਨ ਦੇ ਮਹੱਤਵ ਤਹਿਤ ਆਈ.ਆਈ.ਟੀ ਰੋਪੜ ਦੇ ਐਗਰੀਕਲਚਰ ਐਂਡ ਵਾਟਰ ਟੈਕਨਾਲੋਜੀ ਡਿਵੈਲਪਮੈਂਟ ਹੱਬ (ਏ.ਡਬਲਯੂ.ਟੀ.ਡੀ.ਐਚ) ਨਾਲ ਇਕ ਸਮਝੌਤਾ ਪੱਤਰ ’ਤੇ ਦਸਤਖ਼ਤ ਕੀਤੇ ਹਨ।ਕਾਲਜ ਕੈਂਪਸ ਵਿਖੇ ਇਕ ਅਤਿ-ਆਧੁਨਿਕ ਸਾਈਬਰ-ਫਿਜ਼ੀਕਲ ਸਿਸਟਮ (ਸੀ.ਪੀ.ਐਸ) ਲੈਬ ਸਥਾਪਿਤ ਕਰਨ ਦੇ ਮਕਸਦ ਤਹਿਤ ਆਈ.ਆਈ.ਟੀ ਰੋਪੜ ਟੈਕਨਾਲੋਜੀ ਅਤੇ ਇਨੋਵੇਸ਼ਨ ਫਾਊਂਡੇਸ਼ਨ ਦੀ ਸੀ.ਈ.ਓ ਡਾ. ਰਾਧਿਕਾ ਤ੍ਰਿਖਾ ਅਤੇ ਕਾਲਜ ਡਾਇਰੈਕਟਰ ਡਾ. ਮੰਜ਼ੂ ਬਾਲਾ ਦਰਮਿਆਨ ਸਹਿਮਤੀ ਪੱਤਰ ਹਸਤਾਖਰ ਕੀਤੇ ਗਏ ਹਨ।
ਖ਼ਾਲਸਾ ਕਾਲਜ ਗਵਰਨਿੰਗ ਕੌਂਸਲ ਦੇ ਆਨਰੇਰੀ ਸਕੱਤਰ ਰਜਿੰਦਰ ਮੋਹਨ ਸਿੰਘ ਛੀਨਾ ਨੇ ਉਕਤ ਸਮਝੌਤੇ ਲਈ ਡਾ. ਮੰਜ਼ੂ ਬਾਲਾ ਨੂੰ ਵਧਾਈ ਦਿੰਦਿਆਂ ਕਿਹਾ ਕਿ ਕਾਲਜ ਇੰਜੀਨੀਅਰਿੰਗ ਸਿੱਖਿਆ ਅਤੇ ਟੈਕਨਾਲੋਜੀ ਖੋਜ਼ ਨੂੰ ਮੋਹਰੀ ਕਤਾਰ ’ਚ ਲਿਆਉਣ ਲਈ ਤੱਤਪਰ ਹੈ।ਉਨ੍ਹਾਂ ਕਿਹਾ ਸੀ.ਪੀ.ਐਸ ਲੈਬ ਇੱਕ ਗੇਮ-ਚੇਂਜ਼ਰ ਹੋਵੇਗੀ।
ਡਾ. ਮੰਜ਼ੂ ਬਾਲਾ ਨੇ ਦੱਸਿਆ ਕਿ ਕਾਲਜ ਕੈਂਪਸ ਵਿਖੇ ਇੱਕ ਗਤੀਸ਼ੀਲ ਸਹਿਯੋਗ ਦੀ ਸ਼ੁਰੂਆਤ ਨੂੰ ਧਿਆਨ ’ਚ ਰੱਖਦਿਆਂ ਇਹ ਸਮਝੌਤਾ ਕੀਤਾ ਗਿਆ ਹੈ।ਇਹ ਸਾਂਝੇਦਾਰੀ ਇੰਟਰਨੈਟ ਆਫ਼ ਥਿੰਗਜ਼ (ਆਈ.ਓ.ਟੀ) ਅਤੇ ਸਾਈਬਰ-ਭੌਤਿਕ ਪ੍ਰਣਾਲੀਆਂ ’ਚ ਖੋਜ ਅਤੇ ਸਿਖਲਾਈ ਨੂੰ ਹੁਲਾਰਾ ਦੇਣ ਲਈ ਕੀਤੀ ਗਈ ਹੈ, ਜੋ ਵਿਦਿਆਰਥੀਆਂ ਨੂੰ ਇਨ੍ਹਾਂ ਨਾਜ਼ੁਕ ਖੇਤਰਾਂ ’ਚ ਬੇਸ਼ਕੀਮਤੀ ਅਨੁਭਵ ਪ੍ਰਦਾਨ ਕਰਦੀ ਹੈ।
ਡਾ. ਰਾਧਿਕਾ ਤ੍ਰਿਖਾ ਨੇ ਕਿਹਾ ਕਿ ਏ.ਡਬਲਯੂ.ਟੀ.ਡੀ.ਐਚ ਟਿਕਾਊ ਤਕਨੀਕੀ ਹੱਲਾਂ ਨੂੰ ਚਲਾਉਣ ਲਈ ਵਚਨਬੱਧ ਹੈ ਅਤੇ ਕਾਲਜ ਨਾਲ ਉਕਤ ਸਹਿਯੋਗ ਵਿਦਿਆਰਥੀਆਂ ਨੂੰ ਵਿਹਾਰਕ, ਪ੍ਰਭਾਵਸ਼ਾਲੀ ਨਤੀਜਿਆਂ ’ਚ ਅਤਿ-ਆਧੁਨਿਕ ਨਵੀਨਤਾਵਾਂ ’ਤੇ ਕੰਮ ਅਤੇ ਖੋਜ਼ ਦਾ ਅਨੁਵਾਦ ਕਰਨ ’ਚ ਮਦਦ ਕਰੇਗਾ।ਡਾ. ਤ੍ਰਿਖਾ ਨੇ ਕਿਹਾ ਕਿ ਵਿਦਿਆਰਥੀਆਂ ਨੂੰ ਉਨ੍ਹਾਂ ਦੇ ਪ੍ਰੋਜੈਕਟਾਂ ਲਈ 3 ਲੱਖ ਰੁਪਏ ਤੱਕ ਦੀ ਵਿੱਤੀ ਸਹਾਇਤਾ ਵੀ ਦਿੱਤੀ ਜਾਵੇਗੀ।
ਇਸ ਮੌਕੇ ਸੀਨੀਅਰ ਮੈਨੇਜਰ ਆਤਿਫ ਜਮਾਲ, ਯੰਗ ਪ੍ਰੋਫੈਸ਼ਨਲ ਸੋਨੀਆ ਸ਼ਰਮਾ (ਦੋਵੇਂ ਆਈ.ਆਈ.ਟੀ ਰੋਪੜ), ਕਾਲਜ ਰਜਿਸਟਰਾਰ ਇੰਜ਼: ਬਿਕਰਮਜੀਤ ਸਿੰਘ, ਰਾਜੀਵ ਸ਼ਰਮਾ, ਆਈ.ਕਿਊ.ਏ.ਸੀਕੋਆਰਡੀਨੇਟਰ ਡਾ. ਮਾਲਤੀ ਪੁਰੀ ਹਾਜ਼ਰ ਸਨ।