ਚੈਰੀਟੇਬਲ ਟਰਸਟ ਵੱਲੋਂ ਬਜ਼ੁੁੱਰਗ ਮਾਂ-ਪੁੱਤ ਨੂੰ ਟਰਾਈ ਸਾਈਕਲ, ਪੱਖਾ ਅਤੇ ਰਾਸ਼ਨ ਭੇਂਟ

ਪੱਟੀ, 5 ਜੂਨ (ਅਵਤਾਰ ਸਿੰਘ ਢਿੱਲੋਂ,ਰਣਜੀਤ ਮਾਹਲਾ)- ਸਥਾਨਕ ਬਾਬਾ ਦੀਪ ਸਿੰਘ ਚੈਰੀਟੇਬਲ ਟਰੱਸਟ (ਰਜਿ:) ਜੋ ਕਿ ਪਿਛਲੇ 10 ਸਾਲਾਂ ਤੋਂ ਸੰਗਤਾਂ ਦੇ ਸਹਿਯੋਗ ਨਾਲ ਪੱਟੀ ਸ਼ਹਿਰ ਅਤੇ ਨਾਲ ਲੱਗਦੇ ਪਿੰਡਾਂ ਵਿਚ ਅਤਿ ਗਰੀਬ, ਲੋੜਵੰਦ, ਲਾਚਾਰ ਅਤੇ ਇਲਾਜ ਤੋਂ ਵਿਹੂਣੇ ਮਰੀਜਾਂ ਦੀ ਸੇਵਾ ਦਾ ਕਾਰਜ਼ ਕਰਦਾ ਆ ਰਿਹਾ ਹੈ।ਜਿਸ ਦੇ ਤਹਿਤ ਕਾਬਲ ਸਿੰਘ 60 ਸਾਲ ਵਾਸੀ ਕਾਲੇਕੇ ਉਤਾੜ ਜੋ ਕਿ ਆਪਣੀ ਬਜੁੱਰਗ ਮਾਤਾ ਦੇ ਨਾਲ ਇਕ ਕਮਰੇ ਵਿਚ ਗੁਜ਼ਰ ਬਸਰ ਕਰ ਰਿਹਾ ਹੈ।ਕਾਬਲ ਸਿੰਘ ਜੋ ਕਿ ਚੱਲ ਫਿਰ ਨਹੀਂ ਸਕਦਾ ਅਤੇ ਦੋਨੋਂ ਮਾਂ-ਪੁੱਤ ਰੋਟੀ ਤੋਂ ਵੀ ਆਤੁਰ ਸਨ, ਦੀ ਸੂਚਨਾ ਪਿੰਡ ਵਾਸੀ ਵਲੱੋਂ ਬਾਬਾ ਦੀਪ ਸਿੰਘ ਚੈਰੀਟੇਬਲ ਟਰੱਸਟ ਨੂੰ ਦਿੱਤੀ ਗਈ ਜਿਸ ‘ਤੇ ਟਰੱਸਟ ਮੁੱਖੀ ਗੁਰਮੀਤ ਸਿੰਘ ਨੇ ਆਪਣੇ ਸਾਥੀਆਂ ਨਾਲ ਪਿੰਡ ਕਾਲੇਕੇ ਪਹੁੰਚ ਕੇ ਉਕਤ ਪਰਿਵਾਰ ਸਬੰਧੀ ਜਾਣਕਾਰੀ ਹਾਸਲ ਕਰਨ ਉਪਰੰਤ ਕਾਬਲ ਸਿੰਘ ਨੂੰ ਇਕ ਟਰਾਈ ਸਾਈਕਲ, ਛੱਤ ਵਾਲਾ ਪੱਖਾ ਟਰੱਸਟ ਵੱਲੋਂ ਭੇਂਟ ਕੀਤਾ ਅਤੇ ਸਿੱਖ ਸੇਵਾ ਸੁਸਾਇਟੀ ਲਹਿਰ ਯੁ.ਕੇ ਦੇ ਸਹਿਯੋਗ ਨਾਲ ਪਰਿਵਾਰ ਦਾ ਇਕ ਸਾਲ ਲਈ ਮਹੀਨਾਵਾਰੀ ਰਾਸ਼ਨ ਦੇਣ ਦਾ ਪ੍ਰਬੰਧ ਕੀਤਾ।ਟਰੱਸਟ ਵਲੋਂ ਸਮੂਹ ਐਨ.ਆਰ.ਆਈ ਵੀਰਾਂ ਅਤੇ ਸ਼ਹਿਰ ਦੀਆਂ ਸੰਗਤਾਂ ਦਾ ਧੰਨਵਾਦ ਕੀਤਾ ਗਿਆ।ਇਸ ਮੌਕੇ ਤੇ ਡਾ. ਜਸਪਾਲ ਸਿੰਘ, ਗੁਰਮੀਤ ਸਿੰਘ ਮਿਸਤਰੀ, ਸੁਖਪਾਲ ਸਿੰਘ, ਕੁਲਵਿੰਦਰ ਸਿੰਘ, ਜੋਗਾ ਸਿੰਘ, ਡਾ. ਸਰਬਪਰੀਤ ਸਿੰਘ ਆਦਿ ਹਾਜਰ ਸਨ।