ਜੋਧਪੁਰ ਪਾਖ਼ਰ ਦੀ ਖਿਡਾਰਨ ਦੀ ਭਾਰਤੀ ਟੀਮ ਦੇ ਕੈਂਪ ਲਈ ਹੋਈ ਚੋਣ

ਬਠਿੰਡਾ, 15 ਮਾਰਚ (ਜਸਵਿੰਦਰ ਸਿੰਘ ਜੱਸੀ, ਅਵਤਾਰ ਸਿੰਘ ਕੈਂਥ)- ਆਲ ਇੰਡੀਆ ਇੰਟਰ ਯੂਨੀਵਰਸਿਟੀ ਦੇ ਕਿਸ਼ਤੀ ਚਾਲਣ ਮੁਕਾਬਲਿਆਂ ਵਿਚ ਜੋਧਪੁਰ ਪਾਖ਼ਰ (ਬਠਿੰਡਾ) ਦੀ ਖਿਡਾਰਨ ਗਗਨਦੀਪ ਕੌਰ ਪੁੱਤਰੀ ਮਲਕੀਤ ਸਿੰਘ ਮਣਕੂ ਨੇ ਮੈਡਲ ਜਿੱਤਕੇ ਆਪਣੇ ਪਿੰਡ ਅਤੇ ਬਠਿੰਡਾ ਜ਼ਿਲ੍ਹੇ ਦਾ ਨਾਮ ਚਮਕਾਇਆ ਹੈ। ਇਹ ਮੁਕਾਬਲੇ ਹੈਦਰਾਬਾਦ (ਮੱਧ ਪ੍ਰਦੇਸ਼) ਵਿਖੇ ਹੋਏ ਹਨ। ਫਤਿਹ ਕਾਲਜ ਆਫ਼ ਇੰਸਟੀਚਿਊਟ ਰਾਮਪੁਰਾ ਵਿਚ ਬੀ. ਐਸ. ਸੀ. ਸੀ. ਐਸ. ਐਮ. ਭਾਗ ਪਹਿਲਾ ਦੀ ਵਿਦਿਆਰਥਣ ਖਿਡਾਰਨ ਗਗਨਦੀਪ ਕੌਰ ਨੇ ਪੰਜਾਬੀ ਯੂਨੀਵਰਸਿਟੀ ਪਟਿਆਲਾ ਦੀ ਤਰਫ਼ੋਂ ਕਿਸ਼ਤੀ ਚਾਲਣ ਮੁਕਾਬਲਿਆਂ ਵਿਚ ਹਿੱਸਾ ਲਿਆ ਅਤੇ ਰੋਇੰਗ-4 ਵਿਚ ਉਨ੍ਹਾਂ ਸਿਲਵਰ ਮੈਡਲ ਜਿੱਤਣ ਵਿੱਚ ਸਫ਼ਲਤਾ ਹਾਸਲ ਕੀਤੀ ਹੈ। ਇੰਟਰ ਯੂਨੀਵਰਸਿਟੀ ਮੁਕਾਬਲਿਆਂ ਵਿਚ ਸ਼ਾਨਦਾਰ ਪ੍ਰਦਰਸ਼ਨ ਦੇ ਚਲਦਿਆਂ ਗਗਨਦੀਪ ਕੌਰ ਦੀ ਚੋਣ ਅਪ੍ਰੈਲ ਮਹੀਨੇ ਵਿਚ ਕੇਰਲਾ ਵਿਖੇ ਲੱਗਣ ਵਾਲੇ ਭਾਰਤੀ ਟੀਮ ਦੇ ਕੈਂਪ ਲਈ ਹੋਈ ਹੈ। ਗਗਨ ਦੇ ਪਿਤਾ ਮਲਕੀਤ ਸਿੰਘ ਨੇ ਖੁਸ਼ੀ ਪ੍ਰਗਟ ਕਰਦਿਆਂ ਕਿਹਾ ਕਿ ਉਸ ਨੂੰ ਆਪਣੀ ਬੇਟੀ ਦੀ ਪ੍ਰਾਪਤੀ ‘ਤੇ ਮਾਣ ਹੈ। ਇਸ ਮੌਕੇ ਹੌਲਦਾਰ ਗੋਗੀ ਸਿੰਘ ਵੀ ਮੌਜੂਦ ਸਨ। ਅੰਤਰ ਰਾਸ਼ਟਰੀ ਕਬੱਡੀ ਪ੍ਰਮੋਟਰ ਕਾਕਾ ਕੈਨੇਡਾ ਨੇ ਖਿਡਾਰਨ ਗਗਨਦੀਪ ਦੀ ਪ੍ਰਾਪਤੀ ਅਤੇ ਚੋਣ ਨੂੰ ਬਠਿੰਡਾ ਜ਼ਿਲ੍ਹੇ ਲਈ ਮਾਣ ਵਾਲੀ ਗੱਲ ਦੱਸਿਆ ਹੈ।