ਸਹਾਇਕ ਲਾਇਨਮੈਨਾਂ ਨੂੰ ਸੈਮੀ ਸਕਿੱਲਡ ਵਰਕਰ ਐਲਾਨਣ ਦਾ ਵਿਰੋਧ

ਭੀਖੀ/ ਝੁਨੀਰ, 3 ਜੁਲਾਈ (ਪੰਜਾਬ ਪੋਸਟ – ਕਮਲ ਕਾਂਤ) – ਇੰਪਲਾਇਜ ਫੈਡਰੇਸ਼ਨ ਪੀ.ਐਸ.ਈ.ਬੀ (ਪਹਿਲਵਾਨ) ਦੀ ਸਬ ਯੂਨਿਟ ਭੀਖੀ ਦੀ ਵਿਸ਼ੇਸ਼ ਮੀਟਿੰਗ ਨਰੋਤਮ ਸਿੰਘ ਧਲੇਵਾਂ ਦੀ ਪ੍ਰਧਾਨਗੀ ਹੇਠ ਹੋਈ। ਮੀਟਿੰਗ ਵਿੱਚ ਸੂਬਾ ਆਗੂ ਪਰਮਜੀਤ ਸਿੰਘ ਭੀਖੀ ਵਿਸ਼ੇਸ਼ ਤੌਰ `ਤੇ ਪੁੱਜੇ।ਮੀਟਿੰਗ ਨੂੰ ਸੰਬੋਧਨ ਕਰਦਿਆਂ ਆਗੂ ਨੇ ਕਿਹਾ ਕਿ ਜਿਸ ਅਨੁਸਾਰ ਨਵੀਂ ਭਰਤੀ ਵਾਲੇ ਸਹਾਇਕ ਲਾਇਨਮੈਨਾਂ ਨੂੰ ਸੈਮੀ ਸਕਿੱਲਡ ਵਰਕਰ ਐਲਾਨਿਆ ਗਿਆ ਹੈ, ਉਹ ਬਹੁਤ ਹੀ ਮੰਦਭਾਗਾ ਹੈ। ਕਿਉਂਕਿ ਇੰਨਾਂ ਕਰਮਚਾਰੀਆਂ ਵਲੋਂ ਮੈਟ੍ਰਿਕ, ਆਈ.ਟੀ.ਆਈ ਕਰਨ ਉਪਰੰਤ 2 ਸਾਲ ਅਪ੍ਰੈਟਿਸ ਪੀ.ਐਸ.ਪੀ.ਸੀ.ਐਲ ਦੇ ਅਦਾਰੇ ਵਿਚੋਂ ਕੀਤੀ ਹੈ ਜੋ ਕਿ ਆਈ.ਟੀ.ਆਈ ਹੋਲਡਰਾਂ ਨਾਲ ਸਰਾਸਰ ਧੱਕਾ ਹੈ। ਜਦਕਿ ਫੀਲਡ ਵਿੱਚ ਇੰਨਾਂ ਕਰਮਚਾਰੀਆਂ ਤੋਂ ਲਾਇਨਮੈਨ ਦਾ ਕੰਮ ਲਿਆ ਜਾ ਰਿਹਾ ਹੈ।ਜਥੇਬੰਦੀ ਵਲੋਂ ਇਸ ਫੈਸਲੇ ਦਾ ਪੂਰਨ ਵਿਰੋਧ ਕੀਤਾ ਗਿਆ। ਉਨਾਂ ਮੰਗ ਕੀਤੀ ਕਿ ਇੰਨਾਂ ਸਹਾਇਕ ਲਾਇਨਮੈਨਾਂ ਦੀ ਯੋਗਤਾ ਨੂੰ ਧਿਆਨ ਵਿੱਚ ਰੱਖਦੇ ਹੋਏ ਸਕਿੱਲਡ ਮੰਨਿਆ ਜਾਵੇ ਕਿਉਂਕਿ ਪਾਵਰਕਾਮ ਨੇ ਖੁੱਦ ਵੀ ਪਹਿਲਾਂ ਇੰਨਾਂ ਕਰਮਚਾਰੀਆਂ ਨੂੰ ਕਈ ਡਵੀਜਨਾਂ ਵਿੱਚ ਸਕਿੱਲਡ ਕਾਮਿਆਂ ਦੀ ਤਨਖਾਹ ਜਾਰੀ ਕੀਤੀ ਹੈ।ਉਨਾਂ ਕਿਹਾ ਕਿ ਜੇਕਰ ਪਾਵਰਕਾਮ ਇਸ ਫੈਸਲੇ `ਤੇ ਦੁਬਾਰਾ ਵਿਚਾਰ ਕਰਕੇ ਇਸ ਨੂੰ ਰੱਦ ਨਹੀ ਕਰਦੀ ਤਾਂ ਜਥੇਬੰਦੀ ਆਉਣ ਵਾਲੇ ਦਿਨਾਂ ਵਿੱਚ ਸੰਘਰਸ਼ ਕਰਨ ਲਈ ਮਜਬੂਰ ਹੋਵੇਗੀ।
        ਇਸ ਮੌਕੇ ਕਰਮਜੀਤ ਸਿੰਘ ਖੀਵਾ, ਤਰਸੇਮ ਸਿੰਘ ਅਲੀਸ਼ੇਰ, ਗੁਰਜੀਤ ਸਿੰਘ, ਕੁਲਦੀਪ ਸਿੰਘ ਬੱਪੀਆਣਾ, ਲਾਲ ਸਿੰਘ ਖੀਵਾ ਆਦਿ ਹਾਜਰ ਸਨ।