ਭੂਮੀ ਵਿਭਾਗ ਦੀ ਟੀਮ ਅਤੇ ਪੁਲਿਸ ਪਾਰਟੀ ਨੇ ਹਟਾਏ ਦੋ ਖੋਖੇ ਤੇ ਨਜਾਇਜ਼ ਕਬਜ਼ੇ

ਅੰਮ੍ਰਿਤਸਰ, 3 ਸਤੰਬਰ (ਸੁਖਬੀਰ ਸਿੰਘ) – ਨਗਰ ਨਿਗਮ ਕਮਿਸ਼ਨਰ ਦੇ ਹੁਕਮਾਂ ‘ਤੇ ਅਸਟੇਟ ਅਫਸਰ ਧਰਮਿੰਦਰਜੀਤ ਸਿੰਘ ਦੀ ਅਗਵਾਈ ਹੇਠ ਭੂਮੀ ਵਿਭਾਗ ਦੀ ਟੀਮ ਅਤੇ ਪੁਲਿਸ ਕਮਿਸ਼ਨਰ ਅੰਮ੍ਰਿਤਸਰ ਵਲੋਂ ਭੇਜੀ ਗਈ ਪੁਲਿਸ ਪਾਰਟੀ ਦੇ ਸਹਿਯੋਗ ਨਾਲ ਸਥਾਨਕ ਨਾਈਆਂ ਵਾਲਾ ਮੋੜ ਨੇੜੇ ਡਾ. ਪਸਰੀਚਾ ਅਤੇ ਨਾਰੰਗ ਹਸਪਤਾਲ ਸਾਹਮਣੇ ਬਣੇ ਦੋ ਖੋਖਿਆਂ ਅਤੇ ਕਬੀਰ ਪਾਰਕ ਵਿਖੇ ਵਾਸ਼ਿੰਗ ਸੈਂਟਰ ਦੇ ਬਣੇ ਨਜਾਇਜ਼ ਰੈਂਪਾਂ ਨੂੰ ਡਿੱਚ ਮਸ਼ੀਨ ਦੀ ਮਦਦ ਨਾਲ ਹਟਾ ਦਿੱਤਾ ਗਿਆ।ਇਸੇ ਦੌਰਾਨ ਭੂਮੀ ਵਿਭਾਗ ਦੀ ਟੀਮ ਨੇ ਚਿਤਰਾ ਟਾਕੀਜ਼, ਹਾਲ ਗੇਟ, ਹੈਰੀਟੇਜ਼ ਸਟਰੀਟ, ਸੁਲਤਾਨਵਿੰਡ ਗੇਟ ਤੋਂ ਚਾਟੀਵਿੰਗ ਗੇਟ ਤੱਕ ਦੁਕਾਨਦਾਰਾਂ ਤੇ ਫੜੀਆਂ ਵਾਲਿਆਂ ਵਲੋਂ ਸੜਕ ਅਤੇ ਬਰਾਂਡਿਆਂ ਵਿੱਚ ਸਮਾਨ ਰੱਖ ਕੇ ਕੀਤੇ ਗਏ ਆਰਜ਼ੀ ਨਜਾਇਜ਼ ਕਬਜ਼ੇ ਹਟਾ ਕੇ ਉਨਾਂ ਦਾ ਸਮਾਨ ਜ਼ਬਤ ਕਰਕੇ ਨਗਰ ਨਿਗਮ ਦੇ ਸਟੋਰ ਵਿੱਚ ਜਮ੍ਹਾਂ ਕਰਵਾ ਦਿੱਤਾ।
ਇਸ ਕਾਰਵਾਈ ਸਮੇਂ ਇੰਸਪੈਕਟਰ ਰਾਜ ਕੁਮਾਰ, ਅਰੁਣ ਸਹਿਜਪਾਲ, ਮਨੋਜ ਕੁਮਾਰ, ਵਿਭਾਗੀ ਅਮਲਾ ਅਤੇ ਨਗਰ ਨਿਗਮ ਦੀ ਪੁਲਿਸ ਫੋਰਸ ਮੌਜ਼ੂਦ ਸੀ।