Friday, February 23, 2024

ਜਿੱਤੀ ਬਾਜ਼ੀ (ਅੰਦਰ ਦੀ ਗੱਲ)

ਅੰਦਰ ਦੀ ਗੱਲ ਕਰ ਬੈਠਾ ਹਾਂ,
ਜਿੱਤੀ ਬਾਜ਼ੀ ਹਰ ਬੈਠਾ ਹਾਂ।
ਆਪਣਾ ਸਮਝ ਕੀਤੀ ਗ਼ਲਤੀ,
ਗਰਮੀ ਵਿੱਚ ਵੀ ਠਰ ਬੈਠਾਂ ਹਾਂ।
ਜਖਮ ਅੱਲ੍ਹੇ ਜਿਹੜੇ ਮੇਰੇ,
ਨਮਕ ਉਹਨਾਂ `ਤੇ ਧਰ ਬੈਠਾ ਹਾਂ।
ਸਮੇਂ ਨਾਲ਼ ਸਭਨਾਂ ਨੇ ਮਰਨਾ,
ਸਮੇਂ ਤੋਂ ਪਹਿਲਾਂ ਮਰ ਬੈਠਾਂ ਹਾਂ।
ਕਦੇ ਕੀੜੀ ਲੜੀ ਮਹਿਸੂਸ ਸੀ ਹੁੰਦੀ,
ਹੁਣ ਵਾਰ ਤੀਰਾਂ ਦੇ ਜ਼ਰ ਬੈਠਾ ਹਾਂ।
ਚਿਹਰੇ `ਤੇ ਮੁਸਕਰਾਹਟ ਝੂਠੀ,
ਅੰਦਰੋ-ਅੰਦਰੀ ਭਰ ਬੈਠਾ ਹਾਂ।
ਮਨ ਦੀ ਭਟਕਣ ਮੁੱਕਦੀ ਨਾਹੀ,
ਭਾਵੇਂ ਆਪਣੇ ਘਰ ਬੈਠਾਂ ਹਾਂ।
ਅੰਦਰ ਦਾ ਰੌਲ਼ਾ ਸ਼ਾਂਤ ਨਾ ਹੋਇਆ,
ਜਦ ਵੀ ਰੱਬ ਦੇ ਦਰ ਬੈਠਾਂ ਹਾਂ।
`ਮੈਂ` ਨੂੰ ਮਾਰ ਮੁਕਾਵਣ ਦੀ ਗੱਲ,
ਜਿਵੇਂ ਸੁੱਕੇ ਛੱਪੜ `ਚ ਤਰ ਬੈਠਾਂ ਹਾਂ।
ਹੁਣ ਤੇ ਸੁਖਬੀਰ ਨੂੰ ਰੱਖ ਲੈ ਰੱਬਾ,
ਸਿਰ ਚਰਨਾਂ `ਤੇ ਧਰ ਬੈਠਾਂ ਹਾਂ।

ਸੁਖਬੀਰ ਸਿੰਘ ਖੁਰਮਣੀਆਂ
ਛੇਹਰਟਾ, ਅੰਮ੍ਰਿਤਸਰ
ਮੋ – 9855512677

Check Also

ਯੂਨੀਵਰਸਿਟੀ `ਚ ਡਾ. ਹਰਮਿੰਦਰ ਸਿੰਘ ਬੇਦੀ ਦੀ ਸਵੈ-ਜੀਵਨੀ “ਲੇਖੇ ਆਵਹਿ ਭਾਗ” ‘ਤੇ ਵਿਚਾਰ-ਗੋਸ਼ਟੀ

ਅੰਮ੍ਰਿਤਸਰ, 22 ਫਰਵਰੀ (ਸੁਖਬੀਰ ਸਿੰਘ ਖੁਰਮਣੀਆਂ) – ਗੁਰੂ ਨਾਨਕ ਦੇਵ ਯੂਨੀਵਰਸਿਟੀ ਦੇ ਪੰਜਾਬੀ ਅਧਿਐਨ ਸਕੂਲ …