ਖ਼ਾਲਸਾ ਕਾਲਜ ਇੰਜੀਨੀਅਰਿੰਗ ਵਿਖੇ ਅਲਟਰਾਟੈਕ ਸੀਮੈਂਟ ਵਲੋਂ ਸੈਂਟਰ ਆਫ਼ ਐਕਸੀਲੈਂਸ ਸਥਾਪਿਤ

ਅੰਮ੍ਰਿਤਸਰ, 11 ਫਰਵਰੀ ( ਸੁਖਬੀਰ ਸਿੰਘ ਖੁਰਮਣੀਆਂ) – ਖਾਲਸਾ ਕਾਲਜ ਆਫ਼ ਇੰਜੀਨੀਅਰਿੰਗ ਐਂਡ ਟੈਕਨਾਲੋਜੀ ਰਣਜੀਤ ਐਵਨਿਊ ਵਿਖੇ ਅਲਟਰਾਟੈਕ ਸੀਮੈਂਟ ਲਿਮ. ਦੁਆਰਾ ਇਕ ਨਵਾਂ ਸੈਂਟਰ ਆਫ਼ ਐਕਸੀਲੈਂਸ ਸਥਾਪਿਤ ਕੀਤਾ ਗਿਆ ਹੈ।ਇਸ ਸਥਾਪਨਾ ਦਾ ਉਦੇਸ਼ ਵਿਦਿਆਰਥੀਆਂ ਨੂੰ ਨਿਰਮਾਣ ਖੇਤਰ ’ਚ ਨਵੀਨਤਮ ਤਰੱਕੀਆਂ ਦਾ ਵਿਹਾਰਕ ਅਨੁਭਵ ਅਤੇ ਐਕਸਪੋਜ਼ਰ ਪ੍ਰਦਾਨ ਕਰਕੇ ਅਕਾਦਮਿਕ ਅਤੇ ਉਦਯੋਗ ਵਿਚਕਾਰ ਪਾੜੇ ਨੂੰ ਪੂਰਾ ਕਰਨਾ ਹੈ।
ਕਾਲਜ ਡਾਇਰੈਕਟਰ ਡਾ. ਮੰਜ਼ੂ ਬਾਲਾ ਨੇ ਕਿਹਾ ਕਿ ਸੈਂਟਰ ਦੇ ਉਦਘਾਟਨ ਦੌਰਾਨ ਇੰਜ: ਰਾਹੁਲ ਗੋਇਲ, ਜ਼ੋਨਲ ਹੈਡ, ਟੈਕਨੀਕਲ ਕਸਟਮਰ ਸਲਿਊਸ਼ਨ, ਅਲਟਰਾਟੈਕ ਸੀਮੈਂਟ ਮੌਜ਼ੂਦ ਸਨ।ਉਨ੍ਹਾਂ ਕਿਹਾ ਕਿ ਸੈਂਟਰ ’ਚ ਕਾਲਮ ਬੀਮ ਮਾਡਲ, ਵੱਖ-ਵੱਖ ਸਮੱਗਰੀਆਂ ਵਾਲਾ ਟਾਈਲ ਐਪਲੀਕੇਸ਼ਨ, ਪੌੜੀਆਂ, ਡੁਰਾਪਲੂਸ, ਲਾਈਟਕੋਨ, ਫਾਈਬਰਕੋਨ, ਸਜਾਵਟ, ਕਲੋਰਕੋਨ, ਐਕਵਾਸੀਲ, ਰੈਗੂਲਰ ਕੰਕਰੀਟ, ਪਰਵੀਅਸ ਕੰਕਰੀਟ ਆਦਿ ਮਾਡਲਾਂ ਸਮੇਤ ਈਪੌਕਸੀ ਗ੍ਰਾਊਟ ਬਾਲਟੀ, ਵਾਟਰਪਰੂਫਿੰਗ ਕਿੱਟ, ਇਲਾਸਟੋਮੇਰਿਕ ਵਾਟਰਪਰੂਫ ਕੋਟਿੰਗ ਬਾਲਟੀ, ਵਾਟਰਪ੍ਰੂਫਿੰਗ ਕੋਟ, ਡੀ.ਪੀ.ਸੀ ਕੋਟਿੰਗ ਬਾਲਟੀ ਅਤੇ ਹੋਰ ਬਹੁਤ ਸਾਰੇ ਪ੍ਰੋਟੋਟਾਈਪ ਲਗਾਏ ਗਏ ਹਨ।
ਇਸ ਦੌਰਾਨ ਡਾ. ਮੰਜ਼ੂਦ ਬਾਲਾ ਅਤੇ ਗੋਇਲ ਨਾਲ ਵਿਵੇਕ ਜੈਨ (ਜ਼ੋਨਲ ਹੈਡ, ਮਾਰਕੀਟਿੰਗ, ਅਲਟਰਾਟੈਕ ਸੀਮੈਂਟ ਲਿਮ.), ਬਰਜਿੰਦਰ ਪਾਲ ਸਿੰਘ (ਰੀਜਨਲ ਟੈਕਨੀਕਲ ਹੈਡ, ਅਲਟਰਾਟੈਕ ਸੀਮੈਂਟ ਲਿਮ.), ਇੰਜ: ਹਿਤੇਂਦਰ ਕਪੂਰ (ਟੇਰੀਟਰੀ ਰੀਜਨਲ ਹੈਡ, ਅਲਟਰਾਟੈਕ ਸੀਮੈਂਟ ਲਿਮਟਿਡ), ਇੰਜ: ਬਿਕਰਮਜੀਤ ਸਿੰਘ (ਰਜਿਸਟਰਾਰ), ਡਾ. ਪ੍ਰਿੰਸ ਕਰਨਦੀਪ ਸਿੰਘ (ਐਚ.ਓ.ਡੀ ਸਿਵਲ ਇੰਜੀਨੀਅਰਿੰਗ) ਮੌਜ਼ੂਦ ਸਨ।
ਡਾ. ਬਾਲਾ ਨੇ ਕਿਹਾ ਕਿ ਇਸ ਨਾਲ ਵਿਦਿਆਰਥੀਆਂ ਨੂੰ ਅਸਲ ਦੁਨੀਆਂ ਦਾ ਅਨੁਭਵ ਮਿਲੇਗਾ ਅਤੇ ਉਹ ਉਦਯੋਗ ਦੇ ਰੁਝਾਨਾਂ ਨਾਲ ਅਪਡੇਟ ਰਹਿਣ ਲਈ ਵਿਹਾਰਕ ਗਿਆਨ ਪ੍ਰਾਪਤ ਕਰਨਗੇ।ਇਸ ਤੋਂ ਇਲਾਵਾ ਵਿਦਿਆਰਥੀ ਨਵੀਨਤਮ ਟਿਕਾਊ ਨਿਰਮਾਣ ਅਭਿਆਸਾਂ ਬਾਰੇ ਸਮਝ ਪ੍ਰਾਪਤ ਕਰਨਗੇ, ਜਿਸ ਨਾਲ ਉਹ ਨੌਕਰੀ ਬਾਜ਼ਾਰ ’ਚ ਵਧੇਰੇ ਪ੍ਰਤੀਯੋਗੀ ਬਣ ਜਾਣਗੇ।
ਇਸ ਮੌਕੇ ਗੋਇਲ ਨੇ ਇੰਜੀਨੀਅਰਿੰਗ ਦੇ ਵਿਦਿਆਰਥੀਆਂ ’ਚ ਤਕਨੀਕੀ ਸਿੱਖਿਆ ਅਤੇ ਹੁਨਰ ਵਿਕਾਸ ਨੂੰ ਉਤਸ਼ਾਹਿਤ ਕਰਨ ਲਈ ਆਪਣੀ ਵਚਨਬੱਧਤਾ ਨੁੰ ਉਜਾਗਰ ਕੀਤਾ।ਉਨ੍ਹਾਂ ਉਮੀਦ ਜ਼ਾਹਿਰ ਕਰਦਿਆਂ ਕਿਹਾ ਕਿ ਇਹ ਕੇਂਦਰ ਵਿਦਿਆਰਥੀਆਂ ਨੂੰ ਉਸਾਰੀ ਤਕਨਾਲੋਜੀ ਦਾ ਸਿੱਧਾ ਸੰਪਰਕ ਅਤੇ ਨਵੀਨਤਾਕਾਰੀ ਇਮਾਰਤ ਸਮੱਗਰੀ ਨਾਲ ਵਿਹਾਰਕ ਅਨੁਭਵ ਪ੍ਰਦਾਨ ਕਰੇਗਾ।ਉਨ੍ਹਾਂ ਯਕੀਨੀ ਜਾਹਿਰ ਕਰਦਿਆਂ ਕਿਹਾ ਕਿ ਕੰਪਨੀ ਬਠਿੰਡਾ, ਰਾਜਪੁਰਾ ਵਿਖੇ ਉਨ੍ਹਾਂ ਦੇ ਵੱਖ-ਵੱਖ ਆਰ.ਐਮ.ਸੀ ਪਲਾਂਟਾਂ ’ਤੇ ਮੁਫਤ ਇੰਟਰਨਸ਼ਿਪ, ਸਿਖਲਾਈ ਅਤੇ ਮਾਹਿਰਾਂ ਦੇ ਸਲਾਹ-ਮਸ਼ਵਰੇ ਦੇ ਸਮੇਤ ਮੁਫ਼ਤ ਉਦਯੋਗਿਕ ਦੌਰੇ ਪ੍ਰਦਾਨ ਕਰੇਗੀ।